उत्तर कोरियाले क्षेप्यास्त्र निर्माण रोकेको छैन : राष्ट्रसंघ

रोयटर्स

न्युयोर्क — राष्ट्रसंघको प्रतिबन्धका बाबजुद उत्तर कोरियाले आफ्नो परमाणु तथा क्षेप्यास्त्र कार्यक्रमलाई निरन्तरता दिइरहेको छ । करिब ६ महिना लामो अध्ययनपछि शुक्रबार राष्ट्रसंघीय सुरक्षा परिषद्मा बुझाइएको एक गोप्य अध्ययन प्रतिवेदनमा उक्त तथ्य उल्लेख छ ।

प्रतिवेदन विभिन्न स्वतन्त्र विज्ञहरुले राष्ट्रसंघीय प्रतिबन्धको कार्यान्वयनबारे अध्ययन गरेपछि तयार पारिएको हो । स्वतन्त्र विज्ञहरूको समूहले उक्त गोप्य अध्ययन प्रतिवेदन सुरक्षा परिषद्लाई शुक्रबार बुझाएको हो ।

Yamaha

‘उत्तर कोरियाले आफ्ना परमाणु तथा क्षेप्यास्त्र कार्यक्रमहरू रोकेको छैन र राष्ट्रसंघको प्रतिबन्धको उल्लंघन गर्दै गैरकानुनी रूपमा जहाजबाट पेट्रोलियम पदार्थको ओसारपसार बढाउनुका साथै सन् २०१८ मा कोइला ओसारपसार गरेको छ,’ प्रतिवदेनको पृष्ठ १४९ मा उल्लेख छ ।

यद्यपि, उक्त प्रतिवेदनबारे राष्ट्रसंघका लागि उत्तर कोरियाली प्रतिनिधिले भने प्रतिक्रिया दिन अस्वीकार गरेका छन् । प्रतिवेदनमा उत्तर कोरियाले सिरियासँग सैनिक सहकार्य गरेको तथा यमनका हुथी विद्रोहीलाई हतियार बेच्ने प्रयास गरेको पनि उल्लेख छ ।

प्रतिवदेनका अनुसार उत्तर कोरियाली ब्यालेस्टिक क्षेप्यास्त्र निर्माणमा संलग्न प्राविधिकहरुले सन् २०११, २०१६ र २०१७ मा सिरियाको भ्रमण गरेको समेत उल्लेख छ । अध्ययनका क्रममा यमनका हुथी नेताले सन् २०१६ को जुलाई १३ मा उत्तर कोरियालीलाई लेखेको पत्रसमेत प्राप्त भएको थियो । पत्रमा हुथी नेताले उत्तर कोरियाली प्राविधिकलाई ‘हतियार निर्माणको प्रविधि र आपसी सम्बन्धबारे छलफल गर्न सिरियाको राजधानी दमास्कसमा भेट्न’ प्रस्ताव गरिएको थियो ।

त्यसैगरी, प्योङयाङले जहाजबाट गैरकानुनी रूपमा पेट्रोलियम पदार्थको ओसारपसारलाई ‘व्यापक रूपमा बढाएको’ प्रतिवेदनले उल्लेख गरेको छ । गत साता अमेरिकी गुप्तचर अधिकारीहरूले ट्रम्प प्रशासनसँगको न्यानो सम्बन्धका बाबजुद उत्तर कोरियाले नयाँ ब्यालेस्टिक क्षेप्यास्त्रको विकास गरिरहेको जनाएका थिए ।

यसअघि ब्यालेस्टिक क्षेप्यास्त्र निर्माण गरिएको स्थानमै त्यस्तो गतिविधि जारी राखेको जासुसी भूउपग्रहबाट थाहा भएको अमेरिकी अधिकारीलाई उद्धृत गर्दै दि वासिङटन पोस्टले समाचार प्रकाशित गरेको थियो ।

अमेरिकी राष्ट्रपति डोनाल्ड ट्रम्प र उत्तर कोरियाली नेता किम जोङ–उनबीच गत जुन १२ मा सिंगापुरमा ऐतिहासिक शिखर बैठक भएको थियो । बैठकमा ट्रम्प र किमबीच कोरियाली द्वीपलाई नि:शस्त्रीकरण गर्ने सहमति भएको थियो ।

त्यसपछि ट्रम्पले उत्तर कोरियाबाट ‘अमेरिकालाई परमाणु हतियारको कुनै पनि खतरा नरहेको’ बताएका थिए । तर प्योङयाङको परमाणु तथा क्षेप्यास्त्र कार्यक्रम रोक्ने विषयमा कुनै ठोस प्रक्रिया र प्रतिबद्धताबिना सहमति गरेको भन्दै ट्रम्पको आलोचना भएको थियो ।

परमाणु तथा क्षेप्यास्त्र कार्यक्रमका कारण उत्तर कोरियाले कैयौं प्रतिबन्ध झेलिरहेको छ । उत्तर कोरियामाथि राष्ट्रसंघ, युरोपेली संघ, अमेरिका, जापान, दक्षिण कोरिया तथा चीनले आर्थिक तथा व्यापारिक प्रतिबन्ध लगाउँदै आएका छन् । राष्ट्रसंघले प्योङयाङमाथि सन् २००६ यता कोइला, फलाम, कपडा, कच्चा तेल तथा पेट्रोलियम पदार्थमाथि प्रतिबन्ध लगाउँदै आएको छ ।

ट्रम्प र किमबीचको सिंगापुर बैठकपछि उत्तर कोरियाले औपचारिक रूपमा चीनलाई आफूविरुद्ध लगाउँदै आएको प्रतिबन्ध हटाउन आग्रह गरेको थियो । तर चीनले भने हालसम्म पनि केही प्रतिक्रिया दिएको छैन ।

Esewa Pasal

प्रकाशित : श्रावण १९, २०७५ २०:३१
प्रतिक्रिया
पठाउनुहोस्
ADVERTISEMENT

स्क्रब टाइफस संक्रमण बढ्दै

असार तेस्रो सातायता २७ बिरामी, २७ जिल्लामा संक्रमण देखियो
अतुल मिश्र

काठमाडौँ — असार तेस्रो सातायता शुक्रराज ट्रोपिकल तथा सरुवा रोग अस्पताल आउने स्क्रब टाइफस बिरामीको संख्या २७ पुगेको छ । यिनमा २० महिला र सात पुरुष छन् । यो संख्या भदौसम्म अझ बढ्न सक्ने विशेषज्ञहरू बताउँछन् । 

संक्रमितमा कडाखाले टाउको दुखाइ, सास फेर्न गाह्रो हुने, १०३/१०४ डिग्रीसम्म ज्वरो आउने, जीउ दुख्ने, आँखा हल्का रातो हुने, पसिना बढी आउने, लिम्फ ग्रन्थी सुन्निनेजस्ता लक्षण देखिने डा. शेरबहादुर पुनले जानकारी दिए । पछिल्ला केही वर्षको तथ्यांक विश्लेषण गर्दा सबैभन्दा बढी संक्रमण साउन र भदौमा देखिने गरेको छ ।

स्क्रब टाइफस ‘रिकेटसिया’ जीवाणु संक्रमित सूक्ष्म किरा (माइट) को टोकाइबाट फैलिन्छ । यो किरा मुख्यत: खेत, झाडी र घाँसमा रहने मुसा प्रजातिको जीवमा पाइन्छ ।

पुनका अनुसार गत वर्ष किराले टोकेको ठाउँमा दाग देखिने गथ्र्यो । ‘यसपालि आएका बिरामीमा त्यस्तो दाग देखिएको छैन,’ उनले भने । स्क्रब टाइफसलाई टाइफाइड भनी गलत निदान भइरहेको तर्फ सचेत गराउँदै पुनले छिटो उपचार गरे कुनै जटिलता नआउने औंल्याए ।

सात महिनायता मुलुकका २७ जिल्लामा स्क्रब टाइफस देखिएको इपिडिमियोलजी तथा रोग नियन्त्रण महाशाखाका निर्देशक डा. विवेककुमार लालले जनाए । यिनमा ललितपुर, सिन्धुपाल्चोक, गोर्खा, झापा, बारा, रौतहट, सर्लाही, चितवन, धादिङ, मकवानपुर, नुवाकोट, रामेछाप, बाग्लुङ, कास्की, स्याङ्जा, अर्घाखाँची, बाँके, बर्दिया, गुल्मी, कपिलवस्तु, नवलपरासी, पाल्पा, प्यूठान, रूपन्देही, दैलेख, बझाङ, कैलाली छन् ।

स्क्रब टाइफस संक्रमण आशंका गरिएका बिरामीलाई स्वास्थ्यकर्मीले प्रयोगशाला प्रतिवेदन आउनुअघि नै एन्टिबायोटिक दिन सक्ने डा. लाल बताउँछन् । ‘यस्ता बिरामीलाई ‘डक्सिसाइक्लिन’ वा ‘टेट्रासाइक्लिन’ तथा एन्टिबायोटिकका माध्यमले उपयुक्त उपचार गरिए ४८ घण्टाभित्रै सुधार हुन थाल्छ,’ उनले भने ।

चिकित्सकका अनुसार बेलैमा उपयुक्त उपचार नपाउँदा जटिलता निम्तिन सक्छ । बिरामीमा दीर्घकालीन रूपमा श्रवण क्षमता गुम्ने, न्यून रक्तचाप, अंगमा क्षति, मृगौला फेल हुने, निमोनियाँजस्ता सेकेन्डरी ब्याक्टेरियल संक्रमण, छारे रोग, सुस्ती, मासु कुहिनेजस्ता समस्या देखिन सक्छन् । तत्काललाई रोग निको भए पनि भविष्यमा देखिन सक्ने दीर्घकालीन समस्या टार्न बिरामीले केही महिना नियमित स्वास्थ्य परीक्षण गराउनुपर्ने डा. लालले बताए ।

बेलायतस्थित नेसनल हेल्थ सर्भिस (एनएचएस) का अनुसार रिकेटसिया संक्रमित जुम्राको टोकाइबाट समेत स्क्रब टाइफस हुन सक्छ । यो जुम्रा संक्रमित भइसकेकाहरूको शरीरमा हुन्छ । ट्रेन, बस, पार्क, सार्वजनिक स्थलमा सुत्नेहरूमा पनि हुन सक्छ । रिकेटसिया संक्रमित सुल्सुले, उपियाँ वा सूक्ष्म किराको टोकाइबाट पनि यस्तो संक्रमण हुन्छ ।


लक्षण
१०२/१०४ सम्मको कडा ज्वरो
काम ज्वरो आउन सक्छ
कडा प्रकृतिको टाउको दुखाइ
किराले टोकेको ठाउमा रातो डामर जस्तो दाग देखिनु
पसिना धेरै आउनु
पखाला लाग्नु
शरीरका मुख्य अंगले विस्तारै काम गर्न छाडनु
समयमै उपचार नभए कडा श्वासप्रश्वासको समस्या देखिनु
बढी संक्रमण हुँदा गर्धन, नितम्ब, पाखुरामाथि गाँठो हुनु

प्रकाशित : श्रावण १९, २०७५ २०:२८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT