सडक सुरक्षा माग्दै विद्यार्थीद्वारा प्रदर्शन

रोयटर्स

ढाका — बंगलादेशको राजधानी ढाकामा एक साताअघि सडक दुर्घटनामा विद्यार्थीको मृत्यु भएपछि विरोधमा उत्रेका विद्यार्थीहरूले नवौं दिन पनि प्रदर्शन जारी राखेका छन् ।

करिब १ करोड ८० लाख जनसंख्या रहेको राजधानी ढाका विगत ९ दिनदेखि विद्यार्थीको विरोधका कारण ठप्पप्राय: छ । विरोधमा उत्रेका विद्यार्थीले यातायात कानुनको परिवर्तनको माग गर्दै आएका छन् ।

उनीहरूले सडक तथा ट्राफिक क्षेत्रमा भ्रष्टाचार नियन्त्रण तथा सवारी चालक अनुमतिपत्र वितरणमा कडाइको मागसमेत गरेका छन् । विरोध प्रदर्शनमा सहभागी एक १७ वर्षीय विद्यार्थीले भने, ‘हामीले चाहेको भ्रष्टाचार नियन्त्रण होस् र सवारी चालक अनुमतिपत्र चकलेटजस्तो नबाँडियोस् भन्ने हो ।’

ढाकामा गतसाता गाडीको ठक्करले २ विद्यार्थीको मृत्यु भएपछि दसौं हजार विद्यार्थी विरोध प्रदर्शनमा उत्रेका हुन् । गत जुलाई २९ मा एक बसले यात्रु चढाउन अर्को बससँग प्रतिस्पर्धा गर्दा अनियन्त्रित भई ठक्कर दिँदा २ विद्यार्थीको ज्यान गएको थियो । प्रधानमन्त्री शेख हसिनाले विरोध प्रदर्शनलाई विपक्षीले राजनीतिक उद्देश्य प्राप्तिका लागि सरकारविरुद्ध प्रयोग गरेको दाबी गरेकी छन् । विपक्षीले भने उक्त आरोपको खण्डन गरेका छन् । सरकारको चेतावनीका बाबजुद सोमबार पनि ढाकाका विभिन्न स्थानमा आफ्नो विद्यालयको पोसाक लगाएर भेला भएका विद्यार्थीले सवारी आवागमन ठप्प पारेका थिए । यद्यपि उनीहरूले आपत्कालीन सेवाका सवारीसाधनलाई भने चल्न दिएको बीबीसीले जनाएको छ ।

आइतबार बंगलादेशस्थित अमेरिकी राजदूत चढेको गाडीमाथि आक्रमण गरिएको थियो । अमेरिकी राजदूत मार्सिया बर्निक्याट रातिको खाना खाएर फर्केका बेला मोटरसाइकलमा आएका हतियारसहितका व्यक्तिले आक्रमण गरेका थिए । ढाका प्रहरीले उक्त आक्रमणबारे अनुसन्धान गरिरहेको जनाएको छ । उक्त घटनाअघि अमेरिकी दूतावासले प्रहरीले प्रदर्शनकारीमाथि अनावश्यक हस्तक्षेप गरिरहेको जनाएको थियो ।

बंगलादेशमा सडकसम्बन्धी कानुनहरूको कार्यान्वयन फितलो रहेको स्थानीय सञ्चारमाध्यमले जनाएका छन् । विद्यार्थीले निजी बस सञ्जालहरूले ट्राफिक नियमको उल्लंघन गर्ने कारण दुर्घटनामा वृद्धि भएको दाबी गर्छन् । ढाकामा हरेक वर्ष ४ हजारभन्दा बढी मानिसको सडक दुर्घटनामा परी मृत्यु हुने गरेको छ । बंगालादेशमा भने वार्षिक १२ हजारभन्दा बढी मानिसले सडक दुर्घटनाका कारण ज्यान गुमाउँछन् ।

सजाय बढाउने सरकारी निर्णय
बंगलादेश सरकारले असुरक्षित सवारी चलाई दुर्घटना गराउने चाकललाई हुने कारबाहीमा कडा पार्ने निर्णय गरेको छ । कानुनमन्त्री अनिसुल हकले सडक दुर्घटनाका कारण कसैको मृत्यु भएमा चालकलाई हुने ३ वर्षको जेल सजाय बढाएर ५ वर्ष पुर्‍याइएको छ । हकले भने, ‘प्रतास्वित कानुनअनुसार लापरबाही गरी सवारी चलाउँदा कसैको मृत्यु भएमा ५ वर्षको काराबास सजाय भोग्नुपर्नेछ ।’

यसअघि कानुन मन्त्रालयतका एक अधिकारीले ‘सडक दुर्घटनाका कारण कुनै व्यक्तिको मृत्यु भएमा हदैसम्मको कारबाहीको व्यवस्थासहित कानुन संशोधन गर्न लागिएको’ बताएका थिए । उनले सरकारले लापरबाहीपूर्वक सवारी चलाउनेलाई मृत्युदण्डको सजायको व्यवस्था गर्न लागिएको दाबी गरेका थिए । सडक दुर्घटनाका दोषीलाई मृत्युदण्ड दिने कानुन विश्वका अति कम देशमा मात्र छ ।

फोटोग्राफर पक्राउ

Yamaha

प्रदर्शनका क्रममा प्रहरीले सामाजिक अभियन्ता र फोटोग्राफर सहिदुल अलामलाई पक्राउ गरेको थियो ।
बंगलादेशको अखबार डेली स्टारले उनीमाथि सामाजिक सञ्जाल फेसबुकमार्फत प्रपोगान्डा मच्चाएको आरोप लगाइएको छ । अलामलाई सूचना तथा सञ्चार प्रविधि कानुनअनुसार मुद्दा चलाइएको छ । राजधानी ढाकास्थित अदालतले उनलाई ७ दिन हिरासतमा राख्ने अनुमति दिएको अखबारले जनाएको छ ।

अलामले हसिनाको सत्तारूढ दलले विरोध प्रदर्शनमा उत्रेका विद्यार्थीमाथि आक्रमण प्रयास गरेको बताएका थिए । अलामको संस्था ‘ड्रिक पिक्चर्स लाइब्रेरी’ ले आफूलाई प्रहरी गुप्तचर बताउने करिब ३०/३५ जनाको समूहका सादा पोसाक लगाएका व्यक्तिले उनलाई पक्रेर लगेको जनाएको छ ।

कार्यालय रहेको भवनका सुरक्षाकर्मीले अलामलाई जबर्जस्ती कारमा राख्दा चिच्याएको बताए । ढाकाका प्रहरी सहायक कमिसनर ओबाइदुर रहमानले अलामलाई सोधपुछका लगि नियन्त्रणमा लिइएको बताए ।
मानवअधिकारवादी संस्था एम्नेस्टी इन्टरनेसनलले अलामलाई बिनासर्त तत्काल रिहा गर्न माग गरेको छ । एम्नेस्टीले अल–जजिरालाई अन्तरवार्ता दिएका कारण उनलाई नियन्त्रणमा लिइएको दाबी गरेको छ । उक्त अन्तरवार्ता उनले प्रदर्शनकारीमाथि अनावश्यक दमन गरेको भन्दै सरकारको कडा आलोचना गरेका थिए ।

अधिकारीहरूले उनमाथि छानबिन भइरहेको उल्लेख गरेका छन् । ‘उनले विभिन्न आमसञ्चारमाध्यमलाई गलत सूचना दिएको तथा भड्काउपूर्ण अभिव्यक्ति दिएको मुद्दामा हामीले अनुसन्धान गरिरहेका छौं ।’

Esewa Pasal

प्रकाशित : श्रावण २२, २०७५ ०८:१६
प्रतिक्रिया
पठाउनुहोस्

‘ऐतिहासिक खेलमा जितले कोसेढुंगा’

विनोद पाण्डे

काठमाडौँ — नेपालको पहिलो वान–डे अन्तर्राष्ट्रिय ऐतिहासिक हुनुका साथै पहिलो जितले कोसेढुंगा थपिएको कप्तान पारस खड्काले बताएका छन् । नेपालले बुधबार एमस्ट्राडमको एमस्टलभिनस्थित भीआरए मैदानमा नेदरल्यान्ड्ससँग खेल्दै वान–डे अन्तर्राष्ट्रिय क्रिकेटको ढोका खोलेको थियो ।

‘नेदरल्यान्ड्ससँगको शृंखलापछि आस गरौं आउँदा दिनमा नेपालले यस्तो द्विपक्षीय र त्रिकोणात्मक शृंखला जतिसक्दो खेल्नेछ । समर्थकमा उत्साह पनि त्यहीअनुसार बढ्नेछ,’ सोमबार युरोप भ्रमणबाट स्वदेश फर्किएपछि कप्तान पारसले भने, ‘यसको प्रभाव भोलिका दिनमा अझ बढी देखिन्छ होला । किनभने यो पहिलो जित हो ।’

नेपालले दुई साता भ्रमणको सुरुआत इंग्ल्यान्डबाट गरेको थियो । लन्डनमा चार अभ्यास खेल खेलेपछि नेपालले लर्डसमा मेरिलेबोन क्रिकेट क्लब (एमसीसी) सँग र नेदरल्यान्ड्ससँग खेल्ने कार्यक्रम थियो । तर वर्षाका कारण लर्डसमा पूरा नतिजा आउन सकेन । एमसीसीसँग ६–६ ओभरमा छोटयाइएको खेलमा नेपालले ९ विकेटको जित हात पारे पनि नेदरल्यान्ड्ससँगको ट्वान्टी–२० अन्तर्राष्ट्रिय खेल वर्षाले पूरा हुन दिएन ।

नेदरल्यान्ड्ससँग एमस्ट्राडममा दुई वान–डे अन्तर्राष्ट्रिय खेल शृंखला १–१ को बराबरीमा टुंगिएको थियो । नेपालले पहिलो खेलमा नेदरल्यान्ड्सलाई १ सय ८९ रनमा अलआउट गरे पनि जित हात पार्न सकेन । ज्ञानेन्द्र मल्ल र अनिलकुमार शाहले पहिलो वान–डेमा अर्धशतकीय साझेदारी गरे पनि नेपालले त्यसको फाइदा उठाउन सकेन । दोस्रो खेलमा भने पारसले अन्तिम ओभर बलिङ गर्दै १ रनको रोचक र सनसनीपूर्ण जित दिलाएका थिए ।

उनले अन्तिम ओभरमा नेदरल्यान्ड्सलाई ६ रन चाहिने अवस्थामा बलिङ गर्न जाँदा आफूलाई कुनै दबाब नभएको जनाउँदै भने, ‘हामी खेलाडीहरूलाई यस्तो दबाबमा खेल्ने बानी परिसकेको छ । मैदानभित्र प्रवेश गरिसकेपछि हरेकपल्ट जिताउन कोसिस गर्ने हो । आशा गरौं नेपाली क्रिकेटले आउँदा दिनमा अझ माथिल्लो स्तरमा यस्तो जित हासिल गर्न सकोस् ।’


सोमपाल कामी


नेपालले लगत्तै एसिया कप छनोट खेल्दैछ । आफ्नो टोलीको ध्यान त्यसैमा हुने पारसले जनाए । मलेसियामा अगस्ट २९ देखि सेप्टेम्बर ६ सम्म हुने प्रतियोगितामा यूएई, हङकङ, मलेसिया, ओमान र सिंगापुरसँग प्रतिस्पर्धा गर्नेछ । विजेता टोली यूएईमा हुने एसिया कपमा पुग्नेछ । कप्तान पारसले भने, ‘एसिया कप छनोट नजिक आइरहेछ, त्यो पनि महत्त्वपूर्ण छ । हामीले आगामी दिनमा नेदरल्यान्ड्ससँग जस्तै जितको प्रयास गरिराख्नेछौं ।’


शक्ति गौचन


पहिलो खेलमा राम्रो सुरुआत गरेर हार्दा
जहिल्यै पनि राम्रो सुरुआत भएनौं भन्थ्यौं । राम्रो सुरुआत हुँदा त्यसलाई सदुपयोग गर्न सकेनौं । यो स्तर पनि यस्तै छ, सजिलो केही छैन । वान–डे क्रिकेटमा सबै सय ओभर राम्रो खेल्नु जरुरी छ । पहिलो खेलमा हामीले पहिलो इनिङ्स राम्रो गरेका थियौं । तर ब्याटिङमा २० ओभरपछि लय गुमाउन पुग्यौं । साझेदारी गर्न नसक्दा लक्ष्यमा पुग्न सकेनौं ।

दोस्रो खेलमा अन्तिम ओभर बलिङ गर्दा
जसरी हुन्छ खेल जिताउनुपर्छ भन्ने थियो । खेल हो कहिले जितिन्छ, कहिले हारिन्छ । यसपालि जित्यौं । हामी पनि नेपालले जसरी हुन्छ जितोस् भन्ने नै चाहन्थ्यौं । खेलिसकेपछि कति चिजहरू बानी पर्छ । खेलको त्यो मोमेन्ट खासै सोचिँदैन । त्यो मोमेन्टलाई कसरी ल्याउने भन्ने मात्र सोचिन्छ । भाग्य हाम्रै पक्षमा थियो ।

एसिया कप छनोटबारे
प्रतिस्पर्धा राम्रो हुन्छ । यूएई, हङकङ अहिले कागजमा राम्रा देखिएका छन् । ओमान पनि राम्रै छ । एसियामा सबैले एकअर्कालाई चुनौती दिन सक्छन् । त्यसैले आगामी दिनमा हामीलाई पनि चुनौती छ । एसिया कप छनोटमा एउटा मात्र अवसर छ । त्यो हो, जितेर एसिया कपमा भारत र पाकिस्तानसँग खेल्ने । त्यसैले हामीलाई यो ठूलो अवसर छ । आशा छ हामीले यो प्रतियोगिता जितेर त्यो अवसर आफ्नो पक्षमा पार्नेछौं ।

नेदरल्यान्ड्सको नेपालमा खेल्ने इच्छा
त्यसका लागि आईसीसी र नेपालको क्रिकेट बोर्डले मिलेर यसलाई सुल्झाउनुपर्छ । नेपाल क्रिकेट संघ (क्यान)
निलम्बनमा रहेसम्म हामीले मात्र गरेर केही हुँदैन।

शरदको चोट
शरद (भेषावकर) लाई औंलामा चोट लागेको हो । एक्सरेहरू गरेपछि २–४ दिनमा अझ पूर्ण विवरण आउँछ । पहिलो खेलमा फिल्डिङ गर्दा बलले हातमा लागेर उनी घाइते भएका थिए ।

प्रकाशित : श्रावण २२, २०७५ ०८:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT