रहेनन् करुणानिधि

एजेन्सी

चेन्नाई — तमिलनाडुका पूर्व मुख्यमन्त्री तथा डीएमके पार्टीका अध्यक्ष एम करुणानिधिको मंगलबार मृत्यु भएको हो । चेन्नाईस्थित एक अस्पतालमा उपचाररत करुणानिधिको ९४ वर्षको उमेरमा मृत्यु भएको हो ।

तमिल नाडु सरकारले उनको मृत्युप्रति शोक व्यक्त गर्दै बुधबार सार्वजनिक बिदा दिने निर्णय गरेको भारतीय सञ्चारमाध्यमले जनाएका छन् ।

Yamaha

गत जुलाई २८ मा उनलाई उपचारका लागि अस्पताल भर्ना गरिएको थियो । उनी सन् १९२४ को जुन ३ मा तमिलनाडुको नागापट्टिनम जिल्लामा भएको थियो ।

करुणानिधिको सन् २०१६ देखि स्वास्थ्यमा समस्या देखिएपछि पटकपटक उपचार गराइरहेका थिए । उनी खराब स्वास्थ्यका कारण दुई वर्षयता राजनीतिमा भने निष्क्रिय थिए ।

सन् २०१६ मा उनका छोरा एमके स्टालिनले कार्यकारी अध्यक्षको रूपमा डीएमके पार्टी सञ्चालन गरेका थिए । करुणानिधि सन् १९६९ को जुलाई २७ मा पार्टीको अध्यक्ष बनेका थिए ।

मंगलबार उनको मृत्युको खबर सार्वजनिक भएसँगै अस्पतालबाहिर उनका समर्थकको भीड लागेको थियो ।

करिब ८ दशक राजनीतिमा सक्रिय करुणानिधि ५ पटकसम्म तमिलनाडुको मुख्यमन्त्री भए । १३ पटक विधानसभा निर्वाचनमा प्रतिस्पर्धा गरेका करुणानिधिले कुनै पनि चुनाव हारेनन् । उनी सन् २०१६ को विधानसभा निर्वाचनमा सबैभन्दा बढी मतान्तरले विजयी भएका थिए ।

करुणानिधिले करिब ५० वटा तमिल भाषामा निर्मित फिल्मको पटकथा तथा संवादसमेत लेखका थिए ।

भारतका प्रधानमन्त्री नरेन्द्र मोदीले करुणानिधिको निधनप्रति दु:ख व्यक्त गरेका छन् । उनले सामाजिक सञ्जाल ट्वीटरमार्फत ‘भारतले एक वरिष्ठ राजनीतिज्ञ गुमाएको’ जनाए ।

मोदीले भनेका छन्, ‘हामीले भारतको माटोसँग जोडिएका एक असल नेता गुमायौं । उनी एक अत्यन्त सफल लेखक थिए र उनले आफ्नो सम्पूर्ण जीवन गरिबको सेवामा समर्पित गरे ।’

प्रकाशित : श्रावण २२, २०७५ २१:२९
प्रतिक्रिया
पठाउनुहोस्

पुनः निर्माणको गति बढाउन प्राधिकरणको निर्देशन

रासस

काठमाडौँ — राष्ट्रिय पुनः निर्माण प्राधिकरणले भूकम्प पछिको पुनः निर्माणका कामलाई पूर्ववत् जारी राख्न भूकम्प प्रभावित ३२ जिल्लाका स्थानीय तहलाई अनुरोध गरेको छ । प्राधिकरणले यसअघि २०७३ पुससम्म अनुदान सम्झौता गरी पहिलो किस्ता रु ५० हजार लिएका लाभग्राहीलाई २०७४ असारसम्म दोस्रो किस्ता लिइसक्नुपर्ने निर्णय गरेको थियो ।

प्राविधिक, निर्माण सामग्रीको अभावलगायत कारणले दोस्रो किस्ता लिन नसक्ने सङ्ख्या अझै तीन लाखभन्दा बढी छ ।

मंगलबारसम्म प्राधिकरणमा प्राप्त तथ्याङ्कअनुसार दोस्रो किस्ताका लागि चार लाख ९३ हजार २०० लाभग्राही प्रमाणीकरण भएका छन् । प्रमाणीकरण भएपछि पीडितले अनुदान पाउन समय लाग्ने भएकाले म्याद थप्ने तयारी गरिएको प्राधिकरणका सहप्रवक्ता मनोहर घिमिरेले जानकारी दिए । लाभग्राही सूचीमा आठ लाख सात हजार ४८६ परिवार सूचीकृत छन् । असार तेस्रो साता नै दोस्रो किस्ता वितरण गर्ने समय थपका लागि निर्देशक समितिको बैठक डाकिएको थियो । असार २० गतेको मन्त्रिपरिषद्को निर्णयानुसार प्राधिकरणका प्रमुख कार्यकारी अधिकृत युवराज भुसाल पदमुक्त भएपछि बैठक स्थगित भयो ।

एक महिनादेखि प्रमुख कार्यकारी अधिकृत नहुँदा नीति निर्धारणका काम हुन नसके पनि नियमित कामका लागि कुनै समस्या नरहेको प्राधिकरणले जनाएको छ । प्रमुख कार्यकारी अधिकृतको अध्यक्षतामा कार्यकारी समितिको बैठकले नियमित रुपमा आइपर्ने पुनः निर्माणका समस्या समाधान गर्ने कार्यविधि छ ।

भूकम्प प्रभावित ३२ वटै जिल्लाका जिल्ला आयोजना कार्यान्वयन एकाई अनुदान व्यवस्थापन तथा स्थानीय पूर्वाधार र भवनलाई काम नियमित गर्न पत्राचार गरिएको सहप्रवक्ता घिमिरेले बताए । प्रभावित जिल्लाका सबै स्थानीय तहलाई पनि अनुदान सिफारिशलगायत पुनः निर्माणका काम पूर्ववत् गर्न निर्देशन दिइएको उनले बताए ।

प्रकाशित : श्रावण २२, २०७५ २१:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT