क्यानाडा–साउदी विवाद: हवाई सेवा बन्द
रियाद — साउदी अरबको सरकारी वायुसेवाले टोरोन्टो आउजाउ गर्ने उडानहरू स्थगित गरेको जनाएको छ । वायुसेवाले आगामी सोमबारदेखि हवाई सेवा रद्द गरिएकाले त्यसपछिका टिकट बिक्री नगर्न आदेश दिएको साउदी प्रेस एजेन्सीले जनाएको छ ।
साउदी अरबले पक्राउ गरेका नागरिक अगुवा र महिला अधिकारकर्मीको क्यानाडाले रिहाइ गर्न माग गरेपछि उक्त निर्णय गरेको हो ।
साउदी अरबले आफ्नो आन्तरिक मामिलामा ‘हस्तक्षेप’ भएको भन्दै क्यानाडासँगका सबै व्यापारिक कारोबार बन्द गर्नुका साथै क्यानाडाका राजदूतलाई समेत देशनिकाला गरेको छ । साउदीले टोरन्टोस्थित आफ्ना राजदूतलाई समेत फिर्ता बोलाइसकेको छ । सन् २०१६ मा क्यानाडा र साउदी अरबबीच ३ अर्ब अमेरिकी डलरभन्दा बढीको कारोबार भएको थियो ।
साउदी अरबको पछिल्लो कदमबारे जवाफ दिँदै क्यानाडाले ‘मानव अधिकारको पक्षमा गरेको वकालत जारी राख्ने’ बताएको छ । साउदी अरबमा पक्राउ पर्नेमा चर्चित ब्लगर रइफ बादवीकी बहिनी एवं मानव अधिकारकर्मी समार बादवी पनि छिन् । रइफ हाल जेलमा रहेकी छन् ।