अस्ट्रेलियामा खडेरीको समस्या, सरकारद्वारा ५ सय ७६ मिलियन डलर सहयोग घोषणा

नारायण खड्का

अस्ट्रेलिया — अस्ट्रेलियामा खडेरीको समस्या विकराल बन्दै गएको छ । अस्ट्रेलिया सरकारले देशकै ठूलो राज्य न्यु साउथ वेल्सलाई सुख्खाग्रस्त क्षेत्र घोषणा गरेको छ । सुख्खाबाट पीडित किसानलाई राहत दिन ५ सय ७६ मिलियन डलर बराबरको राहतको घोषणा गरिएको छ । 

सुख्खाका कारण न्यु साउथ वेल्स, क्वीन्सल्यान्ड, पश्चिम अस्ट्रेलिया र दक्षिण अस्ट्रेलियाका ग्रामीण भेगका किसान मारमा परेका छन् । उनीहरुले आफूले अहिलेसम्म कहिल्यै नभोगेको र नदेखेको सुख्खा भोग्नुपरेको पीडा ब्यक्त गरेका छन् ।

Yamaha

सुख्खाग्रस्त क्षेत्रको भ्रमणमा गएका प्रधानमन्त्री माल्कम टर्नबुलले देशले दसकौंपछिको खराब समस्या भोग्नुपरेको बताएका छन् । उनले मौसमको सुधार हुने आशा व्यक्त गरे । तर, सुख्खाका कारण किसानहरुले जनावारलाई खाने कुरासमेत खुवाउन नपाएको बताएका छन् ।

खडेरीका कारण किसानहरु समस्यामा परेपछि अस्ट्रेलियामा रहेका बैंकहरुले सहायता रकमलगायतका सहयोगको घोषणा गरिसकेका छन् । टेलिभिजन च्यानल, स्थानीय परोपकारी संस्थाहरुले समेत सहयोगका विभिन्न कार्यक्रम सुरु गरेका छन् । यस अभियानमा यहाँ सञ्चालनमा रहेका ठूला व्यावसायिक सुपरमार्केटले समेत सहयोगको घोषणा गरिरहेका छन् ।

विभिन्न सहयोगबाट संकलिन रकमले खडेरीबाट पीडित किसानलाई सहयोग गर्ने बताइएको छ । खडेरीबाट सबैभन्दा बढी पीडित न्यु साउथ वेल्स राज्यका किसानलाई विभिन्न शीर्षकमा राहत दिन राज्य सरकारले करिब १ अर्ब डलरबराबरको सहयोगको घोषणा गरेको छ भने अन्य राज्यले समेत किसानलाई सहयोग पुर्‍याउन सहयोग रकम घोषणा गरिसकेका छन् ।

खडेरीबाट पीडित किसानले सरकारलाई सहयोग गर्न आग्रह गरेका छन् । सुख्खाका कारण रुखहरुसमेत मर्न थालेका छन् भने पानी नपरेका कारण जनावारलाई बचाउन मुस्किल परेको किसानहरुले बताएका छन् । समाचारमाध्यमहरुले अस्ट्रेलियामा यसवर्ष देखिएको सुख्खा करिब आधा शताब्दीकै खराब रहेको बताएका छन् ।

Esewa Pasal

प्रकाशित : श्रावण २४, २०७५ २१:५१
ADVERTISEMENT
प्रतिक्रिया
पठाउनुहोस्
ADVERTISEMENT

स्ट्रेस भयो ? ‘ब्रेक रुम’ आउनुस्

नारायण खड्का

अष्ट्रेलिया — तपाईलाई स्ट्रेस भयो वा केही कुरामा तनाव सृजना भयो ? के गर्नुहुन्छ ? चुप लागेर बस्नुहुन्छ, संगीत वा एकान्तको सहारा लिनुहुन्छ अथवा मेडिटेसन गर्नुहुन्छ ?

तस्बिरः एबिसी न्युज

तर अष्ट्रेलियाको सिड्नी, मेलबर्न लगायतका सहरमा भने गज्जबको उपाय निकालिइएको छ । ‘ब्रेक रुम’ जानुस । जे जे सामान फुटाउन राखिएको छ । तोड्‌नुस्, फुटाउनुस् र आफुलाई हलुका बनाउनुस् ।

यो ‘ब्रेक रुम’ मा फुटाउनका लागि फर्निचर, भाँडाकुडाका साथै बोतल, पुराना टिभी, प्रिन्टर लगायतका सामानहरु राखिएको हुन्छ ।

सुरक्षित कपडा लगाएर बेस बल ब्याट लिएर उक्त कोठामा छिरेपछि तोकिएको समयभित्र ग्राहकले आफूलाई तोड्न र फुटाउन मन लागेका वस्तुहरु फुटाउन सक्छन् ।

यसले आफुमा भएको तनावलाई कम गर्न मद्दत पुग्ने दाबी गरिएको छ । यदी तनावबाट आफू पीडित नभए अरु कसैका लागि यस कामको लागि भौचर खरिद गरेर दिन सकिने प्रावधान समेत राखिएको छ ।

सिड्नी, मेलबर्न लगायतका सहरहरुमा केही समयअघि स्थापना गरिएको यो ‘ब्रेक रुम’ मा जानका लागि निश्चित रकम भने तिनुपर्ने हुन्छ ।

यसको स्थापनाकर्ताहरुले भने उक्त कोठामा जाने ग्राहकको सुरक्षाको लागि सोही अनुसारको पहिरन लगाउनुपर्ने लगायतका नियमहरु राखेका छन् ।

स्थानीय सञ्चारमाध्यमलाई एक सञ्चालकले आफूहरुसँग शिक्षक, वकिल, डाक्टर, विद्यार्थी मात्र नभएर परिवार पनि साथै आउने गरेको बताएका छन् ।

उक्त कोठामा केही व्यक्तिहरु फरक अनुभवका लागि आउने गरेका भएपनि केही ग्राहकहरु आफ्नो रिस र तनावलाई कम गर्न आउने गरेको उनले अनुभव सुनाएका छन् ।

यस किसिमको ‘ब्रेक रुम’ अहिलेसम्म पर्थ, सनसाईन कोष्टमा समेत खोलिएको छ । न्यूनतम ३५ अष्ट्रेलियन डलर (करिब ३ हजार रुपैया) खर्च लाग्ने यो कोठामा धेरै ग्राहकहरु भने महिलाहरु हुने गरेको जनाइएको छ ।

प्रकाशित : श्रावण २३, २०७५ १६:४४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT