बेलायतमा आप्रवासी नियन्त्रण नगर्न सिफारिस

नवीन पोखरेल

लन्डन — तत्कालीन प्रधानमन्त्री डेभिड क्यामरनले सन् २०१० मा ब्रिटेनमै बसोबास गर्ने उद्देश्यले आउने मानिसको संख्या लाखौंबाट घटाएर हजारौंमा झार्ने घोषणा गरेका थिए । त्यतिबेला वर्तमान प्रधानमन्त्री टेरेजा मे गृहमन्त्री थिइन् ।

सरकारको नीतिले अन्तर्राष्ट्रिय विद्यार्थी र वर्क परमिटमा रहेका ईयूबाहेकका कामदार निसाना बने । यद्यपि सरकारको त्यो लक्ष्य पूरा भएको छैन । पछिल्लो तथ्यांकअनुसार ब्रिटेनमा खुद आप्रवासन २ लाख ४० हजार छ ।

Yamaha

यही परिवेशमा बेलायतस्थित व्यवसायीहरूको एउटा ठूलो सञ्जाल दि कन्फेडेरेसन अफ ब्रिटिस इन्डस्ट्री (सीबीआई)ले सरकारलाई आप्रवासन मुख्य लक्ष्य नबनाउन सुझाएको छ ।

सीबीआईले १८ क्षेत्रका एक लाख २९ हजार फर्महरूको राय, सल्लाहपछि प्रतिवेदन प्रस्तुत गर्दै बेलायत ईयूबाट बहिगर्मन (ब्रेक्जिट) भएपछि नयाँ अध्यागमन नीतिको आवश्यकतामाथि जोड दिई ब्रिटेनमा दक्ष कामदारको खाँचो पूरा गर्न युरोपेली नागरिकलाई भिजा नलिई आवतजावत गर्न आग्रह गरेको हो ।

उक्त निकायले ब्रिटिस र युरोपेली नागरिकलाई यात्रा गर्दा विमानस्थल र बन्दरगाह सीमामा सहज तरिका अपनाउन पनि आग्रह गरेको छ । ‘ब्रिटेनमा नर्सदेखि सफ्टवेयर इन्जिनियरसम्म पहिल्यैदेखि नै जनशक्ति अभाव छ । त्यसकारण सैद्धान्तिक बहसभन्दा छिटो, दीगो र प्रमाणमा आधारित कार्य गर्न आवश्यक छ’ सीबीआईका डेपुटी डिरेक्टर जनरल जोस हार्डीले भनेका छन्, ‘यो हाम्रै राष्ट्रकै भविष्यका लागि हो । व्यवसायलाई धेरै क्षेत्रमा फरक फरक सीपको खाँचो छ न कि उत्कृष्टमात्र ।’
‘ग्लोबल ब्रिटेन’ का लागि ब्रिटेनले विश्वलाई नै स्वागत गरिरहेको सन्देश दिन जरुरी रहेको पनि हार्डीले जोड दिए ।
ब्रिटेनको गृह मन्त्रालयले भने अध्यागमनसम्बन्धी लक्ष्य हटाउने कुनै योजना नभएको जनाएको छ । ‘ब्रिटेनमा अनियन्त्रित आप्रवासनका पक्षमा जनमत छैन’ गृह मन्त्रालयले भन्यो, ‘युरोपेली संघ छाडेपछि हामीले ईयू मुलुकहरुबाट हुने खुला आवतजावत बन्द गर्नेछौं र पुरै संयुक्त अधिराज्यको सर्वोत्तम हितमा हुने एउटा प्रणाली लागू गर्नेछौं ।’

तर, त्यो प्रणाली कस्तो हुनेछ भन्नेबारे ब्रिटिस सरकारले अझै केही बताएको छैन । सरकारको टियर टु भिजा प्रणालीले युरोपेलीबाहेकका मुलुकबाट कामदार आउन जटिल भइरहेको छ । उक्त कडाइले विशेषगरी चिकित्सक, नर्स र अरु अत्यावश्यक क्षेत्रका दक्ष कामदार बेलायत आउन झन्झट छ ।

सन् २०१६ को ब्रेक्जिट जनमतसंग्रहपछि गैर युरोपेली नागरिक बेलायत आउने क्रम घटेको छ । तर, नवनियुक्त गृहमन्त्री साजिद जाविदले सरकारले उच्च दक्ष जनशक्तिका लागि भिजा प्रणाली सहज बनाउन पुनर्विचार गर्ने आश्वासन दिएका छन् ।

प्रकाशित : श्रावण २६, २०७५ २१:१५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

साफ यू–१५ गर्ल्स च्याम्पियनसिप : नेपालको विजयी सुरुआत

कान्तिपुर संवाददाता

काठमाडौँ — नेपाली यू–१५ गर्ल्स फुटबल टोलीले भुटानमा जारी साफ यू–१५ गर्ल्स च्याम्पियनसिपको पहिलो खेलमा शनिबार पाकिस्तानलाई ४–० ले पराजित गरेको छ । चाङलमिथाङ रंगशालामा पाकिस्तानी टोलीमाथि पूरै समय हाबी रहेको नेपाली टोलीले दुवै हाफमा २–२ गोल गरेको थियो ।

नेपालले आठौं मिनेटमा अनुष्का शेर्पाको गोलबाट अग्रता लिएको हो । सुष्मा तामाङको सुरुआती हेडर पोस्टमा लागेर फर्केपछि अनुष्काले त्यसमै हेडर गोल गरिन् । त्यसको ६ मिनेटपछि नै नेपालले दोस्रो गोल थप्यो । अनुष्काको पासमा सविता रानामगरले दायाँ विंग्सबाट क्रस गरेको बल सिधै पोस्टभित्र छिरेको थियो ।

दोस्रो हाफमा नेपालले दुई गोल थप्यो । सविताले ५६ औं मिनेटमा खाली पोस्टमा गोल गर्दै अग्रता बढाइन् । रजनी ठोकरले बायाँ विंग्सबाट दिएको क्रस पाकिस्तानकी गोलरक्षक आयशा नसिमले ठम्याउन नसक्दा सविताले सहज गर्ने मौका पाइन् । तीन मिनेटपछि रजनीले नेपालका लागि चौथो गोल गरेर अग्रता दिलाइन् । उनले पेनाल्टी क्षेत्रबाहिरबाट गरेको फितलो प्रहारलाई गोलरक्षक नसिमले रोक्न सकिनन् ।

शनिबारै अर्को खेलमा आयोजक भुटानले श्रीलंकालाई ६–० को फराकिलो अन्तरले हरायो । भुटानको जितमा फरवार्ड सोनाम ल्हामोले ह्याट्रिक गरिन् । नेपालले समूह ‘बी’ को अन्तिम खेलमा सोमबार बंगलादेशको सामना गर्नेछ । बंगलादेशले पहिलो खेलमा पाकिस्तानलाई १४–० ले पराजित गरेको थियो । श्रीलंकालाई १२–० ले पराजित गरेको भारत र भुटान पनि समूह ‘ए’ को अन्तिम खेलमा सोमबार नै भिड्ने छन् । जित हासिल गरेका चारै टोली सेमिफाइनल पुगिसकेका छन् ।

प्रकाशित : श्रावण २६, २०७५ २१:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT