आतंकवादको चपेटामा बेलायत

सुरक्षा संयन्त्रले करिब ७ सय सम्भाव्य आतंकवादी हमलाबारे अनुसन्धान गरिरहेको सार्वजनिक
कान्तिपुर संवाददाता

लन्डन — गत मंगलबार बिहान बेलायती संसद् भवन बाहिर पैदल तथा साइकल यात्रुमाथि जानी जानी कार ठोक्काउने सालिह खातेरलाई हत्या प्रयाससहित २ भिन्न अभियोग लगाइएको छ । सुडानी मुलका २९ वर्षीय खातेर बेलायतको बर्मिघम निवासी हुन् ।

३ जना घाइते हुने गरी भएको घटनालाई मेट प्रहरीले आतंकवादी आक्रमणका रुपमा हेरेको छ । सालिहलाई आज वेष्टमिनिष्टर म्याजिस्ट्रेटस कोर्टमा उपस्थित गराइनेछ ।

Yamaha


घटनापछि बेलायती सुरक्षा संयन्त्र थप सतर्क बनेको छ । संसद् भवन नजिक आतंककारी हमला ठानिएको घटनापछि बेलायतको सुरक्षा संयन्त्रले करिब ७ सय सम्भाव्य आतंकवादी हमलाबारे अनुसन्धान गरिरहेको सार्वजनिक भएको छ ।
बेलायती प्रधानमन्त्री प्रधानमन्त्री टेरेजा मेले देशको इतिहासमै सबैभन्दा बढी आतंककारी हमलाको खतरा व्यहोरिरहेको चेतावनी दिएपछि यो जानकारी सार्वजनिक भएको हो ।

अधिकारीहरुले आतंककारी हमलाको स्रोत हुनसक्ने ठानिएका ६ सय ७६ सम्भाव्य घटनाबारे अनुसन्धान भइरहेको जनाएका छन् । ६ महिनाअघि त्यस्ता ५ सय मात्र घटनाबारे अनुसन्धान भइरहेको थियो । उनीहरुले सुरक्षा दलहरु तथा आतंकवाद विरोधी प्रहरीले गएको झण्डै डेढ वर्षयता १३ वटा इस्लामवादी योजनाहरु विफल पारिदिएको जनाएका छन् । त्यस्तै चरम दक्षिणपन्थीहरुले बनाएका थप ४ योजना पनि असफल पारिएको उनीहरुले बताए ।

डेली एक्सप्रेसले जनाएअनुसार सन् २०१० देखि २०१७ सम्म आतंकवादी क्रियाकलापका संलग्न रहेको अभियोगमा २ हजार २९ लाई गिरफ्तार गरिसकिएको छ । गत डिसेम्बरसम्म एक वर्षको अवधिमा ४ सय १२ जना पक्राउ परेका थिए । बेलायती सुरक्षामन्त्री बेन वालेसले इस्लामिक उग्रवादी र चरम दक्षिणपन्थी दुवैबाट आतंकवादी आक्रमण योजना बढिरहेको र सुरक्षा संयन्त्रले प्रत्यक्ष अनुसन्धान पनि जारी राखेको बताए ।

प्रधानमन्त्री मेले निरन्तर आक्रमण बढिरहँदा देशवासीलाई एकै ठाउँमा जुट्न आव्हान गरेकी छन् । गत मंगलबार वर्ष दिनभित्र दोश्रो पटक संसद् भवन बाहिर वेष्टमिनिस्टर आक्रमण भएपछि प्रधानमन्त्रीले भनिन्, ‘दोस्रो पटक सहनशीलता र स्वतन्त्रताको प्रतिक हाम्रो प्रजातन्त्रको घरको ढोका छेउमै भयानक दृश्य देख्नुपर्‍यो । आतंकवादको धम्की ब्रिटेनमा उच्च छ । तर, म सबैलाई होसियार रहन र आफ्नो दैनिकी यथावत सञ्चालन गर्न आग्रह गर्दछु ।’

उग्रवादीहरुको लक्ष्य आतंक र हिंसामार्फत आफूहरुलाई विभाजित गर्ने भएपनि त्यो कहिल्यै सफल नहुने विश्वास प्रधानमन्त्री मेको छ ।

सन् २०१७ मा बेलायत अन्य युरोपेली मुलुकको तुलनामा सबैभन्दा बढि आतंकवादी आक्रमणको चपेटामा पर्‍यो । युरोपोलले युरोपका अन्य देशभन्दा बेलायतले धेरै आक्रमण सामना गरेको जनाएको हो ।

गत वर्ष आइसीसबाट प्रभावित आक्रमणबाट बेलायतको वेस्टमिनिस्टर, म्यानचेस्टर र लन्डन ब्रीजमा ३६ जनाले ज्यान गुमाएका थिए ।

युरोपोलका अनुसार बेलायतपछि स्पेनमा १६, स्वीडेनमा ५, फ्रान्समा ३, फिनल्याण्डमा २ र जर्मनीमा एकजनाले आतंककारी आक्रमणमा ज्यान गुमाए । घटनामा युरोपभर ८ सय घाइते भएका थिए ।

Esewa Pasal

प्रकाशित : भाद्र ३, २०७५ १९:११
प्रतिक्रिया
पठाउनुहोस्
ADVERTISEMENT

त्रिविमा नेपालभाषा पढ्ने बढे

गणेश राई

काठमाडौँ — त्रिभुवन विश्वविद्यालय (त्रिवि)ले स्नातकोत्तर सेमेस्टर प्रणाली सुरु गरेपछि नेपालभाषा (नेवारी) पढ्नेको संख्या बढेको छ । यतिखेर नेपालभाषा स्नातकोत्तर तहमा २२ जना विद्यार्थी पढ्दैछन् भने सातजनाले विद्यावारिधी शोध गर्दैछन् ।

‘त्रिविमा वार्षिक परीक्षा प्रणाली हुँदा नेपालभाषा स्नातकोत्तर तहमा विद्यार्थी आठ–दस जनामात्र हुन्थे,’ त्रिवि नेपालभाषा केन्द्रीय विभाग प्रमुख डा. ओमकारेश्वर श्रेष्ठले भने, ‘सेमेस्टर प्रणाली सुरु भएपछि अहिले विद्यार्थी संख्यामात्र होइन शैक्षिक गुणस्तरसमेत बढेको छ। हिन्दी, संस्कृत विभागको तुलनामा नेपालभाषा बढी प्रभावकारी रुपमा अघि बढेको छ।’ नेपालभाषा केन्द्रीय विभागले गुणस्तर अभिवृद्धिका निम्ति आइतबार गरेको अभिमुखीकरण गोष्ठीमा उक्त जानकारी दिएका हुन्।

प्रमुख श्रेष्ठका अनुसार विभागले नेपालभाषाको पाँच खम्बाका रुपमा भाषा, साहित्य, इतिहास, अनुसन्धान र समालोचना विधालाई लिएको छ। ‘शैक्षिक सामग्रीको अभाव छ,’ विभाग स्थापना भएको ३८ वर्ष पुगेको उल्लेख गर्दै उनले भने, ‘अहिले सेमेस्टर प्रणालीलाई थप बलियो तुल्याउन अभिमुखीकरण गोष्ठी गर्दैछौं।’

त्रिविकी शिक्षाध्यक्ष प्राध्यापक सुधा त्रिपाठीले गोष्ठीको उद्घाटन गर्दै अन्तर्राष्ट्रिय अभ्यासअनुसार सेमेस्टर प्रणाली लागू गरिएको बताइन्। ‘विश्वविद्यालयले सेमेस्टर प्रणाली लागू गर्नु रहरमात्र होइन, बाध्यता हो,’ विश्वभरि नै सेमेस्टर प्रणाली सञ्चालन रहेको उल्लेख गर्दै उनले भनिन्, ‘आधा पढाइ नेपालमा र आधा पढाइ विश्वका कुनै पनि विश्वविद्यालयमा पढ्न जानसक्ने व्यवस्थाका क्रेडिट ट्रान्सफरका निम्ति सेमेस्टर चाहिएको हो।’

शिक्षाध्यक्ष त्रिपाठीले सेमेस्टर प्रणालीलाई शिक्षक, प्रशिक्षक र विद्यार्थीमाझ प्रभावकारी कार्यान्वयनका निम्ति वेबनर सेरिजमा तालिम तथा प्रशिक्षण तालिम सुरु गरेको बताइन्। उक्त सेरिजको दोस्रो भाग सञ्चालन रहेको समेत जनाइन्।
केन्द्रीय विभागअन्तर्गत स्नातकोत्तर तह र विद्यावारिधिमात्र गराइन्छ। दुई सेमेस्टरदेखि नेपालभाषा पठनपाठन जारी छ। विद्यार्थीले ऐतिहासिक अभिलेख तथा प्राचीन भाषा अध्ययन अनुसन्धानका निम्ति ब्राह्मीलिपि, कुटिलालिपि, रन्जनालिपि, प्रचलित नेवा:लिपि, भुजिमोललिपि सिकाइन्छ। शोधार्थीले सामाजिकशास्त्र, मानवशास्त्र, संस्कृति, इतिहास, भाषा र साहित्य विषय रोज्न पाउँछन्।
सिक्किमकी आरिकमाला प्रधान मातृभाषा संरक्षण अभियानकै निम्ति त्रिविमा नेपालभाषा स्नोतकोत्तर पढ्न आएको बताइन्। ‘भाषा घरमा बोलेरमात्रै नहुने भयो, पढ्ने, लेख्ने र समाजलाई बुझ्न जरुरी ठानेर नेपालभाषा पढेको हुँ,’ यतिखेर शोधकार्यमा व्यस्त रहेको बताउँदै उनले भनिन्, ‘नेपालको राणाशासन पछिको पहिलो प्रधानन्यायधीश हरिप्रसाद प्रधानले नेपालभाषा साहित्य श्रीवृद्धिमा पुर्‍याउनु भएको योगदानलाई लिएर शोध गर्दैछु।’

त्रिविअन्तर्गत पाटन संयुक्त क्याम्पस, पद्मकन्या क्याम्पसमा नेपालभाषा स्नातक तहको पठनपाठन हुने गरेको छ। साथै कक्षा ११ र १२ मा समेत नेपालभाषा ऐच्छिक विषयका रुपमा पढाइन्छ। नेपालका समृद्ध भाषामध्ये नेपालभाषा एक मानिन्छ। नेपालभाषा बोल्नेको संख्या ८ लाख ४६ हजारभन्दा बढी छ। सबैभन्दा बढी काठमाडौं उपत्यकामा यो बोलिन्छ।
विद्यावारिधि शोधार्थी राजनलाल जोशीका अनुसार नेपालभाषामा दुईवटा दैनिक, दर्जन साप्ताहिक र मासिक पत्रिका प्रकाशन हुने गरेको छ। त्यसैगरी वार्षिक दुई सय हाराहारीमा नेपालभाषाका पुस्तक प्रकाशन हुने गरेको छ।


त्रिभुवन विश्वविद्यालय नेपालभाषा केन्द्रीय विभागले गरेको गुणस्तर अभिवृद्धि अभिमुखीकरण गोष्ठीमा विचार व्यक्त गर्दै शिक्षाध्यक्ष प्राध्यापक सुधा त्रिपाठी। तस्बिर : गणेश राई/कान्तिपुर

प्रकाशित : भाद्र ३, २०७५ १९:०१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT