केरला बाढीमा मृतकको संख्या ३५७ पुग्यो

रोयटर्स

कोची — भारतको दक्षिणी प्रान्त केरलामा केही दिनयताको भारी वर्षा सँगैको बाढीपहिरोका कारण मृत्यु हुनेको संख्या ३ सय ५७ पुगेको छ । बाढीका कारण करिब ३ अर्ब डलर बराबरका संरचनामा क्षति भएको जनाइएको छ ।

अधिकारीहरुले पछिल्लो २४ घण्टामा ३३ जनाको शव भेटिएको बताएका छन् । बाढीका कारण हजारौं नागरिक विस्थापित बनेका छन् । मृतकको संख्या अझै बढ्न सक्ने जनाइएको छ । भारतीय मौसम पूर्वानुमान संस्थाले आगामी केही दिन वर्षा हुने भएकाले डुबानको समस्या थप विकराल बन्न सक्ने चेतावनी दिएका छन् ।

Yamaha


बाढीका कारण करिब ८ लाख मानिसहरु विस्थापित भएका छन् । केरलाका मुख्यमन्त्री पिनरायी भिजयानले भने, ‘७ लाख २४ हजार ६ सय ४९ विस्थापितहरु ५ हजार ६ सय ४५ अस्थाई शिविरमा छन् ।’ उनले २२ हजार ३४ को उद्धार गरिएको जनाए ।

भिजयानले पानीको बहाव नघटेकाले केही सयम संकट कायमै रहने जनाए । उनले उद्धारका लागि सुरक्षाकर्मी खटिरहेको जनाउँदै विस्थापितलाई पानी तथा खानेकुरा आपूर्तिमा समस्या भएको जनाए ।
भारतीय सञ्चारमाध्यमका अनुसार बाढी प्रभावितको उद्धारका लागि सुरक्षाकर्मीहरु हेलिकप्टर तथा डुंगासहित खटाइएको जनाएका छन् । भारतको केरलाबाट बग्ने ३ दर्जनभन्दा बढी नदी अरबी समुद्र पुग्छन् । बाढीका कारण इडुक्की, मालापुराम, कोझीकोडे वायानाडा र इर्नाकुलामलगायतका जिल्ला बढी प्रभावित भएका छन् ।
शनिबार बाढी प्रभावित क्षेत्रको भ्रमण गरेका भारतीय प्रधानमन्त्री नरेन्द्र मोदीले मृतकका परिवार तथा घाइतेलाई राहतको घोषणा गरेका थिए ।

प्रकाशित : भाद्र ३, २०७५ २०:५४
प्रतिक्रिया
पठाउनुहोस्
ADVERTISEMENT

केरलामा शताब्दीकै भीषण बाढी

कम्तीमा १८६ को मृत्यु
रोयटर्स

कोची — भारतको दक्षिणी प्रान्त केरलामा केही दिनयताको भारी वर्षासँगै बाढीपहिरोका कारण कम्तीमा १ सय ८६ जनाको मृत्यु भएको छ । अधिकारीहरूले बाढीका कारण २ लाख ५० हजारभन्दा बढी मानिस घरबारविहीन भएको जनाएका छन् ।

अधिकांशको पहिरोले भत्केका भग्नावशेषमा पुरिएर तथा डबेर ज्यान गएको हो । बाढीग्रस्त क्षेत्रका कतिपय घरको छतमा पर्खाइमा बसेका मानिसको उद्धार गर्न नसकिएको जनाएका छन् । अधिकारीहरूले उद्धारका लागि ३८ वटा हेलिकोप्टरसहित हजारौं सुरक्षाकर्मी खटाइएको जनाएका छन् ।

एएफपी समाचार संस्थाका अनुसार उद्धार प्रयासमा सघाउन ३ सयभन्दा बढी डुंगा प्रयोग गरिएका छन् । बाढीपहिरोका कारण केरला राज्यमा अहिलेसम्म २ लाख १७ हजार मानिस अस्थायी शिविरमा बसिरहेको जनाएको छ ।

मौसमविद्हरूले अझै केही दिन निरन्तर पानी परिरहने बताएका छन् । भारतीय सञ्चारमाध्यमहरूले कोचिन अन्तर्राष्ट्रिय विमानस्थल एक साताका लागि बन्द गरिएको जनाएका छन् ।

बाढीको प्रकोपसँगै केरलाका १४ जिल्लाका शैक्षिक संस्थाहरू बन्द गरिएको स्थानीय टेलिभिजनले जनाएका छन् । कतिपय जिल्लाले सुरक्षाको कारण देखाउँदै पर्यटकको भ्रमण बन्देज लगाएका छन् । भारतको जलवायु विभागले केरलामा ‘रेड अलर्ट’ जारी गरेको छ । उद्धारकर्मीहरूले बाढीमा फसेका मानिसलाई सुरक्षित स्थानमा लैजान प्रयास गरिरहेका छन् । बाढीपहिरोका कारण केही अझै बेपत्ता रहेको स्थानीय सञ्चारमाध्यमले जनाएका छन् ।

केरलाका मुख्यमन्त्री पिनरायी भिजयानले मृतकको संख्या अझै बढ्न सक्ने बताएका छन् । उनले भने, ‘हामीले केरलाको इतिहासमै पहिलो पटक यस्तो विपत्को सामना गरिरहेका छौं ।’ उनले पानी प्रशोधन जलाशयका सबै गेटहरू खोलिएको बताए । भारतबाट अरबी समुद्र पुग्ने ४१ नदी केरलाबाट बग्छन् । यसैबीच, भारतीय प्रधानमन्त्री नरेन्द्र मोदीले बाढी प्रभावित क्षेत्रको भ्रमण गरेका छन् । बाढीग्रस्त क्षेत्रको स्थलगत अवलोकनपछि मोदीले निधन भएकाका परिवारलाई प्रतिव्यक्ति दुई लाख भारतीय रुपैयाँ राहत दिने घोषणा गरेका हुन् ।मोदीले केरला राज्यका लागि केन्द्र सरकारका तर्फबाट ५ सय करोड सहायता रकम दिने बताएका थिए ।

प्रकाशित : भाद्र ३, २०७५ ०९:२५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT