तान्जानियामा डुंगा दुर्घटना, एक सय बढीको मृत्यु, दर्जनौं वेपत्ता
नैरोबी — तान्जानियामा रहेको अफ्रिकाको ठूलो ताल भिक्टोरियामा भएको डुंगा दुर्घटनामा कम्तीमा एकसयजनाको मृत्यु हुनको साथै दर्जनौं वेपत्ता भएका छन् ।
बेपत्ताहरुको खोजीकार्य शुरु गरिएको र उनीहरुको जीवितै उद्धारका लागि प्रयास जारी रहेको तान्जानियाको सरकारी सञ्चारमाध्यमले जानकारी दिएको छ ।
त्यहाँको उकारा द्वीपनजिकै बिहीबार अपराह्न करिब एकसय यात्रु सवार रहेको सो डुंगा दुर्घटना भएको थियो । दर्जनौंको सङ्ख्यामा बेपत्ता रहेका व्यक्तिले ज्यान गुमाउने डर भएको उकेरेवे जिल्ला परिषदका प्रमुख जर्ज न्यामाहाले चिन्ता व्यक्त गरेकाछन् ।
तान्जानियाको सरकारी निकायका अनुसार यस डुंगामा कति व्यक्ति सवार रहेका थिए भन्ने स्पष्ट भएको छैन । डुंगा दुर्घटनाको कारण हालसम्म थाह नभएको तर यसप्रकारको दुर्घटनामा बारम्बार क्षमताभन्दा बढी व्यक्ति डुंगामा सवार रहेका कारण नै हुने गरेको सम्बन्धित अधिकारीहरुले दाबी गरेका छन् ।
प्रकाशित : आश्विन ५, २०७५ १८:१४