‘कारबाही गरे कडा प्रतिवाद’

साउदी अरबका राजकुमारका कतिपय नीतिका कडा आलोचक खसोग्गी गत अक्टोबर २ देखि टर्कीस्थित साउदी कन्सुलेट कार्यलयबाट बेपत्ता भएका थिए । टर्कीले उनको साउदी अरबले हत्या गरेको दाबी गर्दै आएको छ । तर, साउदीले भने उक्त आरोपको खण्डन गर्दै खसोग्गी त्यसै दिन कार्यलयबाट बाहिरिएको बताउँदै आएको छ ।

अमेरिकी राष्ट्रपति डोनाल्ड ट्रम्पले शनिबार साउदी अरब खसोग्गीको हत्यामा जिम्मेवार भए उसलाई कडा ‘दण्ड’ दिने बताएका थिए । सीबीएस टेलिभिजनसँगको अन्तर्वार्तामा ट्रम्पले ‘यदि टर्कीको आरोप सत्य भए त्यसको नतिजा निकै भयानक हुने’ चेतावनी दिएका थिए ।

यसैबीच, बेलायत र अमेरिकाले साउदी अरबमा हुने अन्तर्राष्ट्रिय सम्मेलन खसोग्गीको बेपत्ता प्रकरणको घटनालाई लिएर बहिष्कार गर्ने विषयमा विचार गरिरहेको जनाइएको छ ।

कूटनीतिक स्रोतलाई उल्लेख गर्दै अमेरिकी अर्थमन्त्री स्टेभेन मुन्चिन र बेलायतका अन्तर्राष्ट्रिय व्यापार मामिलासम्बन्धी मन्त्री लियाम फक्स सम्मेलनमा नजान सक्ने बीबीसीले जनाएको छ । मुन्चिनले वासिङ्टनले ‘घटनाको सूचना संकलन गरिरहेको र वास्तविकता बुझ्न प्रयास गरिरहेको’ जनाएका छन् ।

विश्व बैंक प्रमुख जिम किमले आफू सम्मेलनमा सहभागी नहुने जनाइसकेका छन् । त्यसैगरी, भर्जिन ग्रुप प्रमुख रिचार्ड ब्रान्सनले १ खर्ब डलर लगानीका विषमा साउदी अधिकारीसँगको वार्ता पनि रद्द गरिसरेका छन् ।

साउदीले खसोग्गीको हत्या गराएको पुष्टि भए त्यसको भत्र्सना गर्दै संयुक्त वक्तव्य जारी गर्ने विषयमा पनि अमेरिकी र युरोपेली कूटनीतिज्ञहरूले विचार गरिरहेका छन् । सुधारका मुद्दालाई प्रवद्र्धन गर्ने उद्देश्यका साथ साउदी राजकुमारले सम्मेलनको आयोजना गर्न लागेका हुन् ।

अमेरिकी तथा बेलायती मन्त्री सम्मेलनमा सहभागी नभए साउदी अरब आफ्ना दुई महत्त्वपूर्ण साझेदारबाट बहिष्कृत भएको मानिनेछ । बेलायतको अन्तर्राष्ट्रिय व्यापार मामिलासम्बन्धी मन्त्रालयका प्रवक्ताले सम्मेलनमा सहभागी हुने/नहुनेबारे टुंगो भने लागिनसकेको बताए ।

यसअघि, राष्ट्रसंघले साउदी अरबका पत्रकार जमाल खसोग्गीको हत्या प्रकरणबारे ‘सत्यतथ्य सार्वजनिक गर्न’ माग गरिसकेको छ । महासचिव एन्टोनियो गुटेरेजले खसोग्गीको अवस्थाप्रति आफू चिन्तित रहेको उल्लेख गर्दै ‘घटनामा जिम्मेवार पक्षले जवाफ दिनुपर्ने’ बताएका थिए ।