डढेलो प्रभावित क्षेत्रमा ट्रम्प

अमेरिकी अधिकारीले करिब १ हजार हराइरहेको जनाएका छन् । हराउनेको संख्या अझै बढ्न सक्ने बताइएको छ । आगलागीले ध्वस्त प्याराडाइज नगरमा बोल्दै राष्ट्रपति ट्रम्पले ‘यस्तो दृश्य देख्दा आफूलाई निकै दु:ख लागेको’ बताए ।

उनले कमजोर व्यवस्थापनका कारण यस्तो विपद् उत्पन्न भएको दाबी गरे । ‘हामीले व्यवस्थापनमा सुधार गर्नुपर्ने आवश्यकता छ र वातावरण संरक्षणवादी समूहसँग सहकार्य गर्नु जरुरी छ,’ उनले भने, ‘मलाई लाग्छ, यस्तो विनाश हामीले फेरि हेर्नुपर्ने छैन ।’

विज्ञहरूले जलवायु परिवर्तन तथा मौसमलगायत डढेलोका प्रमुख कारक रहेको जनाएका छन् । प्याराडाइज नगरमा ट्रम्पले कानुन कार्यान्वयन गराउने निकाय, राजनीतिज्ञ र उद्धारकर्ताको भने उनले प्रशंसा गरे ।

डढेलोबाट ध्वस्त प्याराडाइज नगरलाई पूर्ण रूपमा पुनर्निर्माण गर्नुपर्ने अधिकारीले जनाएका छन् । ‘क्याम्प फायर’ सुरु भएको करिब दस दिन पुगिसक्दा सुरक्षाकर्मी र तालिम प्राप्त कुकुरहरू फरेन्सिक टोलीलाई शव खोज्न सघाइरहेका छन् ।

डढेलो करिब ५० प्रतिशत नियन्त्रणमा आइसकेको अधिकारीले जनाएका छन् । यद्यपि, उनीहरूले डढेलो पूर्ण रूपमा नियन्त्रणमा लिन अझै दुई साता लाग्न सक्ने बताए ।