अस्ट्रेलियाका विदेशी वाणिज्य दूतावासमा शंकास्पद प्याकेट

केन्द्रीय प्रहरीद्धारा छानबिन सुरु
नारायण खड्का

अस्ट्रेलिया — अस्ट्रेलियामा रहेका दर्जन बढी विदेशी वाणिज्य दूतावासहरुमा शंकास्पद प्याकेजहरु भेटिएको छ । शंकास्पद प्याकेटहरू भेटिएपछि यहाँस्थित केन्द्रीय तथा राज्य प्रहरीले अनुसन्धान सुरु गरेको छ । प्याकेटहरूमा फाईबर र हानिकारक एस्बेस्टस (सिलिकेट तत्त्व) राखिएको यहाँका सञ्चारमाध्यमहरूले जनाएका छन् । 

मेलवर्नस्थित दक्षिण कोरियाको वाणिज्य दूतावसको कार्यालयमा भेटिएको शंकास्पद वस्तु निकालिदै । तस्बिर: ईपीए ।

सञ्चारमाध्यमहरूका अनुसार अस्ट्रेलियाको मेलबर्न र क्यानबेरामा रहेको दर्जन बढी वाणिज्य दूतावासको कार्यलयहरुमा यस्ता शंकास्पद प्याकेटहरू पठाइएको थियो ।

यहाँ रहेका न्यूजिल्याण्ड, अमेरिका, भारत, बेलायत, जापान, पाकिस्तान, कोरिया, जर्मनी, स्पेन, स्विजरल्याण्ड, इजिप्ट, क्रोएसिया लगायतका मुलुकहरूको वाणिज्य दूतावासमा यस्ता प्याकेटहरू भेटिएका हुन् । केही वाणिज्य दूतावासहरुले शंकास्पद सामान भेटिएपछि प्रहरीले कारबाही जारी रहेको पुष्टि गरेको भए पनि कुनै हानी नभएको बताएका छन् ।

वाणिज्य दूतावसहरुमा भेटिएका शंकास्पद वस्तु खाम मार्फत बरामद गरिएको थियो । जसमध्ये केही वाणिज्य दूतावासहरुमा पठाइएको खाममा प्लास्टिक पाइएको थियो ।

यसै गरी भिक्टोरियाको प्रहरीले मेलबर्नमा रहेका केही वाणिज्य दूतावासहरुले शंकास्पद वस्तु पाएको पुष्टि गरेको छ भने यो कार्य लक्षित भए पनि सर्वसाधारणहरू लगायत कसैलाई हानी नपुगेको जनाएको छ । समाचारहरूमा क्यानबेरामा रहेका केही दूतावासहरू प्रभावित भएको बताइएपनि कुन दूतावास प्रभावित भए भन्नेबारेमा कुनै उल्लेख गरिएको छैन ।

अस्ट्रेलियाले केही वर्षयता आफ्नो देशको सुरक्षामा विशेष ध्यान दिँदै आएको छ । सुरक्षा संवेदनशीलताको हिसाबले अस्ट्रेलियाले सुरक्षा सम्बन्धी कानुन कडा बनाउँदै आएको छ ।

प्रकाशित : पुस २५, २०७५ १५:५०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

अस्ट्रेलियामा ज्ञान बाँड्दै पारस

नारायण खड्का

अस्ट्रेलिया — नेपाली राष्ट्रिय क्रिकेट टोलीका कप्तान पारस खड्का अहिले अस्ट्रेलियाका विभिन्न सहरमा व्यस्त छन् । उनी व्यावसायिक प्रतियोगिता खेल्न नभई अहिले अस्ट्रेलियामै जन्मिएका दोस्रो पुस्ताका नेपाली बालकालिकालाई क्रिकेट सिकाइरहेका छन् ।

मेलबर्न, सिड्नी, एडिलेडलगायतका विभिन्न सहरमा एक्सपर्ट एजुकेसनले आयोजना गरेको क्रिकेट महोत्सवमा सहभागी हुन दुई साताअघि अस्ट्रेलिया आइपुगेका उनी बालबालिकालाई क्रिकेट सिकाउनुका साथै भेटघाटमा व्यस्त छन् । उनी, राष्ट्रिय टोलीका सदस्य दीपेन्द्रसिंह ऐरी र नेपाली यू–१९ टोलीका पूर्व खेलाडी सुवास प्रधान अस्ट्रेलियामा क्रिकेट खेलिरहेका विभिन्न नेपाली खेलाडीमात्र नभएर अस्ट्रेलियाली क्रिकेट बोर्डका प्रतिनिधिसँग समेत भेटघाटमा छन् ।

‘मेरो अहिलेको भ्रमणको मुख्य उद्देश्य नै नेपाली क्रिकेट र क्रिकेट खेलबारे यहाँ रहेका नेपाली खेलाडी र साना भाइबहिनीलाई जानकारी दिनु र सिकाउनु हो,’ पारसले भने, ‘अर्काेतिर यो भ्रमणबाट नेपाली क्रिकेटलाई अस्ट्रेलियामा प्रवद्र्धन गर्न मदत पुग्ने विश्वास छ ।’ उनलाई अस्ट्रेलियाली क्रिकेट बोर्डले सम्मानस्वरुप भारतसँगको टेस्ट हेर्न सिड्नीमा बोलाएको थियो भने उनले त्यहाँ नेपाली क्रिकेट तथा क्रिकेटरका बारेमा अधिकारीसँग छलफलसमेत गरेका थिए । ‘अस्ट्रेलिया खेललाई उच्च महत्व दिने र माया गर्ने देश भएकाले समेत यहाँ क्रिकेट तथा क्रिकेटरलाई सम्मान दिने गरिन्छ,’ उनले सुनाए ।

पारसले अस्ट्रेलियामा रहेका नेपाली युवा यहाँका विभिन्न क्लबमा रहेर खेलिरहेका कारण समेत नेपाली क्रिकेटको भविष्य राम्रो रहेको दाबी गरे । उनले सन्दीप लामिछानेले बिग–बासमा खेलेपछि अन्य खेलाडीलाई समेत राम्रो खेले विश्वभरि अवसर छ भन्ने हौसला मिलेको सुनाए । ‘अहिले अस्ट्रेलियामा मात्र नभएर विश्वभर नै राम्रो क्रिकेट खेल्नसक्ने नेपाली खेलाडीका लागि वातावरण बनेको छ भने यहाँ जुन तहमा क्लब क्रिकेट खेलिरहेको भए पनि नेपालका लागि राम्रो अवसर सिर्जना भइरहेको छ ।’

‘नेपाली क्रिकेटलाई प्रवद्र्धन गरौं’ भन्ने उद्देश्यसाथ एक्सपर्टले पारस र दीपेन्द्रलाई अस्ट्रेलिया ल्याएर क्रिकेट महोत्सव आयोजना गरेको हो । पोखरामा हुने लिग प्रतियोगितामा अस्ट्रेलियामा रहेका दुई उत्कृष्ट खेलाडीलाई अवसर दिइने पारसले सुनाए । ‘हामीले चाहेको भनेको नेपाल र अस्ट्रेलियामा रहेर क्रिकेट खेलिरहेका नेपाली क्रिकेटरबीच सौहार्द र व्यावसायिक सम्बन्ध स्थापना गर्ने र यहाँका भाइबहिनीलाई क्रिकेटसम्बन्धी ज्ञान दिने नै हो,’ पारसले भने ।

प्रकाशित : पुस २४, २०७५ ०८:१८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT