आक्रमणमा परी ४२ गोठालाको मृत्यु

सिन्ह्वा

जुबा — हतियारधारी व्यक्तिहरूको समूहको आक्रमणमा परी सुडानमा कम्तीमा ४२ जना गोठालको मृत्यु भएको छ । सुडानको बेह राज्यमा पर्ने डुचान र कोलाबिल क्षेत्रमा हतियारधारी समूहले पशुचौपायाका गोठालाहरूको हत्या गरेको हो । 

प्रतिकात्मक तस्बिर

उनीहरूको आक्रमणमा परी अन्य ७८ जना गोठाला घाइते भएको पनि अधिकारीहरूले बुधवार जानकारी दिएका छन्।

अकोबो राज्यका गभर्नर जोहनसन गुनी बिलुले सिन्ह्वालाई दिएको जानकारी अनुसार गत गत आइतबार यो घटना भएको हो।

'मुर्ले आदिवासी समूहले गरेको अमानवीय व्यवहारप्रति हामीलाई पश्चात्ताप छ, यो घटना एकदमै अमानवीय र स्थानीय बासिन्दालाई आक्रान्त पार्ने खालको छ,'बिलुले भने।

उनले हतियारधारी समूहको आक्रमणमा परी मारिनेमा अधिकांश महिला र बालबालिका रहेको जानकारी दिए। घाइतेहरूको अवस्था स्थिर रहेको र सयभन्दा बढी पशु चौपाया चोरी भएको अधिकारीहरूले जनाएका छन्।

घटना भएको क्षेत्र दशकौँदेखि साम्प्रदायिक तथा जातीय हिंसाबाट प्रभावित हुँदै आएको छ। त्यस क्षेत्रमा बालयौन दुर्व्यवहार लगायतका अन्य हिंसा पनि हुने गरेको छ।

प्रकाशित : पुस २६, २०७५ १४:३०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

दूरसञ्चार प्राधिकरणमा सञ्चारमन्त्रीको छड्के, २४ घण्टाभित्र विवरण पेश गर्न निर्देशन

विजय तिमल्सिना

काठमाडौँ — सञ्चार तथा सूचना प्रविधि मन्त्री गोकुल बाँस्कोटाले नेपाल दूरसञ्चार प्राधिकरणमा बुधबार अनुगमन गरेका छन् । विभागीय मन्त्रीका हिसालबे प्राधिकरण कार्यालय अनुगमनका लागि पुगेको मन्त्री बाँस्कोटाले जानकारी दिए ।

सवा १० बजे प्राधिकरण कार्यालय पुगेका मन्त्री बाँस्कोटाले छुट्टाछुट्टै विभाग पुगेर प्रगति विवरण माग गरेका थिए । प्राधिकरण अन्तर्गत सञ्चालित विभिन्न परियोजनाको प्रगतिबारे आफूले चासो राखेको र २४ घण्टाभित्र प्रगति विवरण उपलब्ध गराउन निर्देशन दिएको मन्त्री बाँस्कोटाले जानकारी दिए ।

दुई वर्षमा काम सक्ने गरी अप्टिकल फाइबर विस्तारको लागि यूटीएल र स्मार्ट टेलिकम प्रालिलाई प्राधिकरणले जिम्मा दिएको थियो । उक्त परियोजनाको काम सुरु नभएकोको विषयमा पनि मन्त्री बाँस्कोटाले चासो राख्दै प्रगति विवरण पेश गर्न निर्देशन दिएका थिए ।

यस्तै, ग्रामीण दूरसञ्चार कोषअन्तर्गत प्राधिकरणले सञ्चालन गरेको परियोजनाको काम समयमै नसकिएको विषयमा पनि २४ घण्टाभित्र विवरण पेश गर्न निर्देशन दिएको बाँस्कोटाले बताए ।

प्राधिकरणका प्रवक्ता मीनप्रसाद अर्यालले मन्त्री बाँस्कोटाले कर्मचारीको हाजिरीसहित प्राधिकरणको वर्तमान अवस्थाबारे अनुगमन गरेको जानकारी दिए ।

‘ग्रामीण दूरसञ्चार कोष, फ्रिक्वेन्सी, लाइसेन्सजस्ता विषयमा सोधपुछ गर्नुभयो र विवरण उपलब्ध गराउन निर्देशन दिनु भएको छ,’ उनले भने,‘मन्त्रीले सबै शाखा र विभागमा पुगेर सोधपुछ गर्नुभएको थियो ।’

प्रकाशित : पुस २६, २०७५ १४:२६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT