फेलिक्स कंगोका राष्ट्रपति 

एएफपी

किन्सासा — प्रजातान्त्रिक गणतन्त्र कंगोका विपक्षी नेता फेलिक्स सिसेकेडी राष्ट्रपति पदमा निर्वाचित भएको निर्वाचन आयोगले जनाएको छ ।

प्रजातान्त्रिक गणतन्त्र कंगोका राष्ट्रपतिमा विजयी भएपछि समर्थकहरूमाझ फेलिक्स सिसेकेडी । तस्बिर : एजेन्सी

‘चुनावमा खसेको मतको सबैभन्दा बढी अर्थात् करिब ३९ प्रतिशत मत ल्याएर फेलिक्स सिसेकेडी कंगोको राष्ट्रपतिमा चयन हुनुभएको छ,’ स्वतन्त्र राष्ट्रिय चुनाव आयोगका प्रमुख कोर्नेल नान्गाले भने ।

बिहीबार बिहान निर्वाचन परिणाम घोषणा भएलगत्तै प्रतिस्पर्धी मार्टिन फायुलुले ‘चुनावी कु’ भएको प्रतिक्रिया दिएका छन् । फायुलुले करिब ३५ प्रतिशत मत प्राप्त गरे । ‘चुनावको नतिजा बिल्कुलै भरोसायोग्य छैन,’ फायुलुले रेडियो फ्रान्स इन्टरनेसनलसँग भने ।

उनको प्रतिक्रियासँगै कंगोमा थप हिंसा भड्कने सम्भावना देखिएको अन्तर्राष्ट्रिय सञ्चारमाध्यमले जनाएका छन् । राष्ट्रसंघका महासचिव एन्टोनियो गुटेरेजले ‘सबै पक्षलाई शान्त रहन तथा हिंसात्मक गतिविधिबाट टाढै रहन’ आग्रह गरेका छन् ।

गृहयुद्धको मार खेपिरहेको कंगोमा १८ वर्षको अवधिमा यो पहिलो सत्ता हस्तान्तरण हो । राष्ट्रपतिको चुनावमा पटकपटकका ढिलाइका कारण कंगोमा हिंसात्मक घटनामा वृद्धि हुँदै आएका थिए । निर्वाचित भएलगत्तै फेलिक्सले राष्ट्रिय एकतालाई सुदृढ तुल्याउन सबैसँग मिलेर काम गर्ने प्रतिबद्धता जनाएका छन् ।

उनले हत्या हिंसाको शृखंलाबीच मुलुकको नेतृत्वमा रहेका राष्ट्रपति जोसेफ काबिलालाई ‘लोकतान्त्रिक परिवर्तनका साझेदार’ का रूपमा हेर्न आमजनतासमक्ष आग्रह गरे । विगत १८ वर्षदेखि राष्ट्रपति रहेका काबिलाले भने उम्मेदवारी दिएका थिएनन् । सन् १९६० मा बेल्जियमबाट स्वतन्त्र भएयता कंगोमा शान्तिपूर्ण रूपमा सत्ता हस्तान्तरण हुन सकेको छैन । चुनावी नतिजा सार्वजनिक हुनासाथ सिसेकेडीका समर्थकहरूले खुसियाली मनाएका थिए ।

‘म राष्ट्रपति जोसेफ काबिलाप्रति कृतज्ञ छु । हामीले उहाँलाई कहिल्यै बैरीका रूपमा हेर्ने छैनौं,’ सिसेकेडीले समर्थकलाई सम्बोधन गर्दै भने । राष्ट्रपति जोसेफ काबिलाको समर्थनमा प्रतिस्पर्धा गरेका इम्मानुएल रामाजानी साडारीले तेस्रो स्थानमा चित्त बुझाए ।

उनले २४ प्रतिशत मत प्राप्त गरे । चुनावी अभियानका क्रममा सिसेकेडीले कंगोमा कानुनी शासन स्थापित गर्ने, भ्रष्टाचारविरुद्ध लड्ने तथा पूर्वी क्षेत्रमा शान्ति ल्याउने बताएका थिए । तर आलोचकहरूले उनमा अनुभवको कमी रहेको बताउने गरेका छन् ।

प्रकाशित : पुस २७, २०७५ ०८:४५
ADVERTISEMENT
प्रतिक्रिया
पठाउनुहोस्
ADVERTISEMENT

‘व्यापार विवाद चाँडै समाधान हुन्छ’

एएफपी

बेइजिङ — चीनले अमेरिकी प्रतिनिधिमण्डलसँग भएको वार्तामा उल्लेख्य प्रगति भएको जनाउँदै व्यापार विवाद चाँडै समाधान हुने बताएको छ । बेइजिङमा भएको वार्तामा दुई देशबीच जारी व्यापार विवाद समाधान गर्ने आधार तयार भएको चीनले बिहीबार जनाएको छ ।

अमेरिका र चीनबीच लामा समयदेखि जारी व्यापार विवाद अन्त्यका लागि वार्ता गर्न अमेरिकी प्रतिनिधिमण्डल सोमबार बेइजिङ पुगेको थियो । गत डिसेम्बरमा जी–२० सम्मेलनको अवसरमा अर्जेन्टिनामा अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी चिनफिङबीच दुई देशले गरेको करवृद्धि ९० दिनका लागि नबढाउने सहमति गरेका थिए ।

उनीहरूबीच समस्या समाधानका लागि वार्ता गर्ने निर्णय भएबमोजिम अमेरिकी प्रतिनिधिमण्डल चीन पुगेको हो । ‘दुवै देशका वार्ता टोलीले ‘सविस्तार, गहिराइमा पुगेर र सावधानीपूर्वक’ विचारहरूको आदानप्रदान गरेका छन् । जसले आपसी समझदारी बढेको छ र आपसी चासोका विषय समाधान गर्ने आधार तयार भएको छ,’ चिनियाँ वाणिज्य मन्त्रालयद्वारा जारी विज्ञप्तिमा भनिएको छ, ‘दुवै पक्षले निकट सम्बन्धलाई स्थापित गर्दै अघि बढ्ने विषयमा सहमति भएको छ ।’

दुई देशबीचको वार्तामा आगामी मार्चयता व्यापार विवाद अन्त्य गर्न सम्झौता गर्ने र थप करवृद्धि रोक्ने विषयमा दुवै पक्ष सकारात्मक भएको जनाइएको छ । वार्तामा अमेरिकी पक्षले आफ्ना प्रविधि र बौद्धिक सम्पत्तिको बलजफती रूपान्तरण र चोरी गरेको आरोप लगाउनुका साथै चिनियाँ कम्पनीलाई अधिक सरकारी अनुदान दिएर अमेरिकी उत्पादनलाई धराशयी पार्ने प्रवृत्ति रोक्न माग गरेको छ । यसबारे सोधिएको प्रश्नमा चीनका वाणिज्य मन्त्रालयका प्रवक्ता गाओ फेङले भने, ‘वार्तामा संरचनागत विषयलाई केन्द्रित गरिएको छ ।’

बेइजिङ वार्तामा सहभागी अमेरिकी व्यापार तथा कृषि मामिला उपमन्त्री टेड म्याककिन्नीले भने, ‘वार्ता निकै सकारात्मक भएको छ ।’ गत मंगलबार अमेरिकी राष्ट्रपति ट्रम्पले ट्वीट गर्दै चीनमा जारी व्यापार वार्ता निकै राम्रोसँग अघि बढेको बताएका थिए ।
अमेरिकाले व्यापार असन्तुलन बढेकाले ट्रम्प प्रशासनले बेइजिङमाथि बढीभन्दा बढी अमेरिकी सामान खरिद गर्न दबाब दिएको र चिनियाँ बजार विदेशी कम्पनीका लागि सहज बनाउन आग्रह गरेको छ ।

अमेरिकी वाणिज्य मन्त्री विल्बर रोसले अमेरिकी टेलिभिजन सीएनबीसीलाई बुधबार दिएको अन्तर्वार्तामा दुवै मुलुकबीच सम्झौता हुने प्रवल सम्भावना रहेको बताएका थिए । ‘व्यापार युद्धबाट चिनियाँ अर्थतन्त्रलाई बढी नोक्सान हुनेछ । चीनले अरू मुलुकको भन्दा बढी सामान अमेरिकामै बिक्री गर्दछ ।’

प्रकाशित : पुस २७, २०७५ ०८:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT