कारबम आक्रमणमा २१ को मृत्यु
बोगोटा — कोलोम्बियाको एक सैनिक विद्यायलमा भएको कारबम आक्रमणमा कम्तीमा २१ जनाको मृत्यु भएको छ । सैनिक तालिम भइरहेको समयमा गरिएको आक्रमणमा ६८ घाइते भएका अधिकारीले जनाएका छन् ।
घटनालगत्तै सरकारले ३ दिने राष्ट्रिय शोकको घोषणा गरेको छ । अधिकारीहरुले उक्त घटना १६ वर्ष यताकै भीषण आक्रमण भएको बताएका छन् । आतंककारीहरुले ८० किलोग्रामको विस्फोटक पदार्थ बोकेको एक सवारी साधन विस्फोट गराएका रक्षा मन्त्रालयले जनाएको छ ।
घटनामा घाइतेमध्ये ५८ जना उपचारपछि घर फर्केका बताइएको छ । रक्षा मन्त्रालयले शुरुमा घटनाका कारण ११ जनाको मृत्यु भएको जनाएको थियो ।
कोलोम्बियाका राष्ट्रपति इभान डुक्वेले घटनापछि दु:ख व्यक्त गर्दै ‘कोलोम्बियाली जनताले आतंकवादलाई अस्वीकार गर्ने तथा आतंकवादविरुद्ध एक भएर लड्ने’ दाबी गरेका छन् । आक्रमणको हालसम्म कुनै पनि समूहले जिम्मेवारी लिएका छैन ।
