हजारे अनशनमा
काठमाडौँ — लोकपाल नियुक्तिको माग राख्दै भारतका सामाजिक अभियन्ता अन्ना हजारेले बुधबारदेखि अनशन सुरु गरेका छन् । उनले महाराष्ट्रस्थित आफ्नो गाउँ रालेगण सिद्धिमा बुधबार बिहानबाट अनशन सुरु गरेका हुन् ।
लोकपालसँग भ्रष्टाचारको मामिलासम्बन्धी जोसुकैलाई उजुरी सुनुवाइ गर्ने अधिकार दिइएको छ । लोकपाल विधेयक पारित भएको ५ वर्ष बितिसक्दा पनि मोदी सरकारले लोकपाल नियुक्ति नगरेपछि हजारे सरकारसँग रुष्ट छन् ।
उनले प्रधानमन्त्री नरेन्द्र मोदीलाई यस विषयमा पटकपटक चिठ्ठी लेखे पनि कुनै सुनुवाइ नभएको भारतीय सञ्चारमाध्यमहरुले जनाएका छन् । यस्तै, महाराष्ट्र राज्यमा लोकायुक्त विधेयक पारित हुनुपर्ने मागसमेत हजारेले राखेका छन् ।
आफ्नो अनशन देश र जनताको पक्षमा रहेको हजारेको दाबी छ । माग पूरा नभएसम्म अनशन जारी राख्ने अडान हजारेको रहेको भारतीय सञ्चारमाध्यमहरुले जनाएका छन् ।
प्रकाशित : माघ १६, २०७५ १६:४६
