भारतमा रेल दुर्घटनामा ७ को मृत्यु

भारतीय रेल मन्त्रालयका अनुसार विहारको राजधानी पटनाबाट ५० किलोमिटर टाढा सीमाञ्चल एक्सप्रेसको रेल दुर्घटनामा परेको हो । रेलले अकस्मात् पटरी छाडेपछि दुर्घटना भएको हो ।

दुर्घटनापीडितलाई भारत सरकारले आर्थिक सहयोगको घोषणा गरेको छ । दुर्घटनामा मृत्यु भएकाका परिवारलाई ५ लाख भारतीय रुपैयाँ, गम्भीर घाइतेलाई एक लाख र सामान्य घाइतेलाई ५० हजार दिने घोषणा भएको भारतीय सञ्चार माध्यमले जनाएका छन् ।

भारतीय रेल सेवाका प्रवक्ता स्मिता शर्माले घाइतेको उपचारखर्च रेल सञ्चालकले बेहोर्ने बताइन् । अधिकारीका अनुसार दुर्घटनाका बेला अधिकांश यात्रु निदाइरहेका थिए । रेल आइतबार बिहान ९ बजे दिल्लीस्थित आनन्द विहार रेलवे स्टेसनमा पुग्ने तालिका थियो ।

भारतमा दैनिक करिब २ करोड ३० लाख मानिसले रेल यात्रा गर्छन् तर पुरानो संरचना र सुरक्षाको कमीका कारण पटकपटक दुर्घटना हुने गरेको छ । गत वर्ष भारतको अमृतसरमा गुडिरहेको रेल पटरी छाडेर मानिसको भीडमा पुगेपछि कम्तीमा ६० जनाको ज्यान गएको थियो ।