युरोपेली सांसदलाई देशनिकाला
काराकस — भेनेजुएलाले भ्रमणका क्रममा रहेका ५ युरोपेली सांसदलाई आइतबार देशनिकाला गरेको छ । विपक्षी नेता खुवान गुआइडोले सरकारी कदमलाई ‘अविवेकी निर्णय’ को संज्ञा दिएका छन् ।
युरोपेली सांसदलाई देशनिकाला गर्नुको कारण भने उल्लेख गरिएको छैन । भ्रमण टोलीका नेता एवं स्पेनका तर्फबाट युरोपेली सांसद एस्टब्यान गोन्जालेज पोन्सले देशनिकाला गर्नुको कारण आफूलाई नबताइएको जनाए ।
उनले भने, ‘हामीलाई भेनेजुएला छाड्न भनिएको छ । पासपोर्ट खोसिएको छ । देश निकालाको कारणबारे केही बताइएको छैन ।’ यद्यपि यस घटनाले राष्ट्रपति निकोलस मडुरो र अन्तर्राष्ट्रिय समुदायबीचको तनाव अझ बढाएको छ ।
भेनेजुएलाका विपक्षी नेता गुआइडोले आफूलाई अन्तरिम राष्ट्रपति घोषित गरेका थिए । त्यसको केही दिनमा युरोपेली संघले गुआइडोलाई समर्थन गरेपछि मडुरो रुष्ट भएका छन् । गुआइडोलाई समर्थन गर्ने ५० भन्दा बढी राष्ट्रमध्ये ३० युरोपेली छन् ।
गतवर्ष भएको विवादास्पद चुनावमार्फत राष्ट्रपतिमा निर्वाचित मडुरोले जनवरी १० मा दोस्रो कार्यकालका लागि शपथ लिएपछि भेनेजुएलामा विरोध प्रदर्शन चर्केको हो । मडुरोले चुनावमा धाँधली गरेको विपक्षीको आरोप छ । मडुरोको शासनकालमा भेनेजुएलामा भएको मुद्रास्फीति, खाद्यपदार्थ तथा औषधिको अभावका कारण करिब ३० लाख मानिसले भेनेजुएला छाडिसकेका छन् ।
विपक्षी नेताको आग्रहमा अमेरिकाले भेनेजुएलासँग सीमा जोडिएको कोलम्बियाको कुकुटामा खाद्यान्न, औषधि तथा सरसरफाइका सामान ओरालेको छ । तर मडुरोले उक्त सामग्री देशभित्र प्रवेश गराउन नदिने बताएका छन् ।
गुआइडोले उक्त सहायता सामग्री फेब्रुअरी २३ मा ६ लाख मानिसले भेनेजुएला पुर्याउने बताएका छन् । यसअघि अमेरिकी देशहरूले भेनेजुएलाका लागि कोलम्बियाबाट सहायता सामग्री लैजाने बताएपछि निर्देशनमा ट्रक तथा कन्टेनर तेर्साएर राजमार्ग अवरुद्ध पारिएको थियो ।
अमेरिकी सिनेटर मार्को रुबियो सहायता कार्यको प्रत्यक्ष अवलोकनका लागि कुकुटा पुगेका छन् । उनले कोलम्बिया र भेनेजुएला जोड्ने सिमोन बोलिभार अन्तर्राष्ट्रिय पुलको निरीक्षण गरेको जनाइएको छ । अमेरिकी सेनाका ३ वटा कार्गो विमानले दर्जनौं टन खाद्य सामग्री कुकुटा पुर्याएका हुन् ।
प्रकाशित : फाल्गुन ७, २०७५ ०८:४४