उत्तर कोरियामा संसदीय चुनाव
सोल — उत्तर कोरियामा आइतबार भएको संसदीय चुनावमा उल्लेख्य मतदान भएको जनाइएको छ । कोरियाली सर्वोच्च नेता किम जोङ–उनले सत्ता सम्हालेपछिको यो दोस्रो चुनाव हो । चुनावी परिणामका लागि केही दिन लाग्ने जनाइएको छ ।
सुप्रिम पिपुल्स एसेम्ब्ली (एसपीए) भनिने सर्वोच्च जनसभाका लागि योग्य मतदाताहरूले अनिवार्य रूपमा मतदान गर्नुपर्ने नियम छ । कुनै प्रकारको विरोध गर्न नपाइने निर्वाचनमा मतदातालाई उम्मेदवार छान्ने व्यवस्था भने हुँदैन । उत्तर कोरियामा चुनावको दिन कोही बिरामी हुँदैन र कसैको मृत्यु पनि हुँदैन भन्ने गरिन्छ ।
चुनावमा सहभागी हुने लगभग शत प्रतिशत मतदाताले सत्तारूढ गठबन्धनलाई सर्वसम्मत समर्थन गर्छन् । किम परिवारको वंशाणुगत शासन व्यवस्था रहेको उत्तर कोरियामा नागरिकलाई वर्तमान नेता तथा शासकपरिवारप्रति सम्मान तथा भक्तिभावका लागि बाध्य पार्ने गरिन्छ ।
आइतबारको चुनावका लागि १७ वर्षदेखि माथिको उमेरका सबै नागरिकलाई योग्य मानिएको थियो । ‘सत्ता र सरकारप्रतिको बफादारीका लागि मतदाता बिहान सबेरैदेखि मतकेन्द्रमा पुग्छन्,’ सोलस्थित उत्तर कोरिया विश्लेषक फ्योडोर टेर्टिस्की भन्छन् ।
लामबद्ध मतदातालाई पालैपालो एउटा मात्र नाम हुने मतपत्र दिइन्छ ।
तर मतपत्रमा मत चिह्न लगाउने वा टिक लगाउने स्थान भने हुँदैन । मतदाताले आफूले पाएको मतपत्र सबैले देख्ने स्थानमा राखिएको मतपत्रमा खसाल्न लगाइन्छ ।