अष्ट्रेलियामा धर्मगुरुलाई ६ वर्ष जेल

कान्तिपुर संवाददाता

अष्ट्रेलिया — क्याथोलिक चर्चको सबैभन्दा ठुलो पदमा पुगेका अष्ट्रेलियाका धर्मगुरु कार्डिनल जर्ज पेललाई दुई बालकमाथि यौन शोषण गरेको आरोपमा ६ बर्षको जेल सजाय सुनाइएको छ । करिब ५ साताको लामो सुनवाईपछि उनलाई बुधबार जेल सजाय सुनाइएको हो ।

फोटोः एबिसी


सन १९९६ मा मेलबर्नको चर्चमा १३ वर्षका दुई बालकलाई यौन शोषण गरेको ठहर गर्दै बुधबार मेलबर्नको भिक्टोरियन कन्ट्री अदालतले उनलाई ६ वर्षको जेल सजाय सुनाएको हो। उनले अनिवार्य रुपमा ३ बर्ष ८ महिना जेल बस्नु पर्नेछ। त्यसपछि मात्र उनी पेरोलका लागि योग्य हुनेछन्। स्थानीय सञ्चारमाध्यहरुका अनुसार काडिनल पेलले सन १९९६ मा मेलबर्नको सेन्ट प्याट्रिक चर्चमा आर्चबिसप रहेको समयमा केथेड्रलमा गाना गाउने दुई बालकमाथि यौन शोषण गरेको आरोप लागेको थियो। अष्ट्रेलियाबाट क्याथोलिक चर्चमा सबैभन्दा उच्च स्थानमा पुगेका उनी आरोप लागेपछि केही महिनाअघि उक्त आरोप बिरुद्ध लड्न रोमबाट मेलबर्न आएका थिए।

Citizen


उनले शुरुदेखि नै आफुबिरुद्ध लागेको आरोपको कडा रुपमा खण्डन गर्दै आएका छन्। उनले आफु निर्दोष रहेको भन्दै अदालतको निर्णय बिरुद्ध माथिल्लो वकिलहरुले अदालतमा अपिल समेत गरेको बताइएको छ। उनका बिरुद्धमा परेको मुद्दा सुन्न सयौंको संख्यामा सर्वसाधारणहरु अदालतअघि भेला भएका थिए। उनको मुद्दामा निर्णय गर्दै मुख्य न्यायाधीश जज पिटर किडले उनले गरेको कार्यले पीडितहरुले गरेको विश्वासमाथि अन्याय भएको बताएका थिए। भ्याटिकनका ट्रेजररसमेत रहिसकेका उनलाई भ्याटिकनले ‘सेक्रेटरियट अफ द इकोनोमी’ बाट पदमुक्त गरिसकेको सञ्चारमाध्यमहरुले जनाएका छन् भने उनीमाथि लागेको आरोपको छानविन गर्न भ्याटिकनले छानविन समिति समेत बनाएको उल्लेख गरिएको छ।

सन १९६६ देखि पादरीका रुपमा काम गर्न शुरु गरेका उनले युनिभर्सिटी अफ अक्सफोर्डबाट चर्चको इतिहास बिषयमा बिद्याबारिधी गरेका छन्। क्याथोलिक गुरुहरुमध्ये अत्यन्तै सम्मानित र उच्चमध्येको पद मानिने कार्डिनल पदमा रहिसकेका उनको जेल सजायका बारेमा केही समयपहिले अदालतले कुनैपनि सञ्चार माध्यमहरुलाई उनी सम्बन्धि खबर सार्वजनिक गर्न ‘सम्प्रेसन अर्डर’ जारी गरेको थियो। तर केही साताअघि उक्त आदेशलाई हटाएको थियो।

अष्ट्रेलियामा पछिल्लो समयमा क्याथोलिक चर्चहरुमा बालकहरुमाथि भएको शारीरिक शोषणका बारेमा हजारौं उजुरी परिसकेको सञ्चारमाध्यमहरुले जनाएका छन्। सरकारले पीडितहरुको उजुरीपछि यससम्बन्धि छानविन गर्नका लागि रोयल कमिसनको स्थापना गरेको थियो। अष्ट्रेलियाको केन्द्रीय सरकारले पीडितहरुलाई न्याय दिने उद्देश्यले नेशनल रिड्रेस स्किम नै केही महिनाअघि सार्वजनिक गरेको छ।

प्रकाशित : फाल्गुन २९, २०७५ १८:४४
प्रतिक्रिया
पठाउनुहोस्

सामूहिक आत्महत्या प्रयास

एकको मृत्यु, दुई घाइते
भूषण यादव

वीरगन्ज — घरबाट भागेका तीन किशोर किशोरीले सामूहिक विष सेवन गरेर आत्महत्या प्रयास गरेका छन् । घटनामा एक किशोरीको मृत्यु भएको छ । अर्का एक किशोर र किशोरीको उपचारपछि अवस्था सामान्य भएको छ । पर्साको जिराभवानी गाउँपालिका ४ सढी टोलकी १८ वर्षीया संगीता कुमारीको उपचार क्रममा सोमबार बिहान भारतको इनर्वास्थित अस्पतालमा मृत्यु भएको हो ।

सोही टोलकी मन्जिता कुमारी र जिराभवानी २ सेढवाका सन्जय दास थारु इनर्वामा उपचार गराएर फर्केका छन् । थप अनुसन्धानका लागि प्रहरीले दुवैलाई जिल्ला प्रहरीमा झिकाएको छ ।

पर्सा प्रहरी प्रवक्ता अनन्तराम शर्माले भारतबाट उपचार गरी फर्केका सन्जय र मन्जितालाई अनुसन्धानका लागि कार्यालय बोलाएको जनाए । 'यहाँ आएका छन्, तर, कुरा गर्न पाएको छैन,' कान्तिपुरसँग उनले फोनमा भने, 'विष सेवनको कारण तत्काल भनिहाल्ने अवस्था छैन, दुबैसँग कुरा गरेपछि कारण खुल्छ ।'

मन्जिता र संगीतालाई घरबाट भगाउन सन्जय र राज चौधरी अन्य ५/६ जना साथीहरुलाई लिएर सढी गाउँमा आइतबार साँझ गएका थिए । स्थानीयका अनुसार मन्जिताको राजसँग र सन्जयको संगीतासँग प्रेम सम्बन्ध थियो । दुवै किशोरीलाई सन्जयले आफ्नो मोटरसाइकलमा बसाएर भाग्न सफल भए । तर, राजलगायत चारजना सढी गाउँवासीको कब्जामा परे । गाउँबाहिर राखेको मोटरसाइकल लिन जाने क्रममा राज र उनका साथीहरुलाई गाउँलेले नियन्त्रणमा लिएका हुन् । त्यहीबेला जिराभवानी मेलाबाट फर्किरहेको इलाका प्रहरी कार्यालय पटेर्वासुगौलीको टोलीलाई स्थानीयले चारजनालाई जिम्मा लगाए ।
यता सन्जयले दुवै किशोरीलाई लिएर राति करिब १२ बजेतिर सेढवास्थित आफ्नो घर पुगेका थिए । सन्जयका बुवा गाडी चालक भएकाले अधिकांश समय घर बाहिरै हुन्छन् । आइतबार राति घरमा उनको आमामात्र थिइन् । अरुको केटी यति राति किन घर ल्याएको भनी आमाले गाली पनि गरिन् । तीन जना सन्जयको कोठामा बसे । बिहानसम्म गाउँमा होहल्ला भइसकेको थियो ।

सेढवाका शिक्षक ओमप्रकाश चौधरीका अनुसार भद्रभलादमीले केटी भगाएर ल्याइसकेपछि विवाह गर्नुपर्छ भनी केटी पक्षसँग कुरा गर्न तयारी गरिरहेका थिए । 'त्यही बेला तीनैजनाले उल्टी गरेको सूचना आयो,' उनले भने, 'कोठामा पुग्दा स्थिति नाजुक भइसकेको थियो, टाउको झुलिरहेको थियो ।'

गाउँका एम्बुलेन्स सहर गइसकेकाले मोटरसाइकलमा राखेर सीमापारि इनर्वास्थित एक निजी क्लिनिकमा लगियो । इलाका प्रहरी कार्यालय पटेर्वासुगौलीका निरीक्षक आशिष अधिकारीले उपचार क्रममा संगीताको भारतमै मृत्यु भएको बताए । इप्रका इन्जार्च प्रनि अधिकारीका अनुसार विष सेवन गरेको सुनिए पनि प्रमाण फेला परेको छैन ।

प्रकाशित : फाल्गुन २९, २०७५ १८:२६
पूरा पढ्नुहोस्
प्रतिक्रिया
पठाउनुहोस्