न्युजिल्याण्डका दुई मस्जिदमा बन्दुकधारीद्वारा आक्रमण, ४९ जनाको हत्या

नारायण खड्का

अष्ट्रेलिया — न्युजिल्याण्डको क्राईस्टचर्चको दुई मस्जिदमा बन्दुकधारीहरुले अन्धाधुन्ध गोली हानी ४९ जनाको हत्या गरेका छन् । घटनामा घाइते भएका ४८ जनाको क्राइष्टचर्च अस्पतालमा उपचार भइरहेको र २० जनाको अवस्था गम्भिर रहेको प्रहरीले जनाएको छ ।

Citizen

घटनामा संलग्न एक अष्ट्रेलियाली नागरिकसहित तीन पुरुष र एक महिलालाई पक्राउ गरिएको न्युजिल्याड प्रहरीले जनाएको छ ।

न्युजिल्याण्डको पर्यटकीय शहर मानिने क्राईस्टचर्चमा रहेको दुई छुट्टछुट्टै मस्दिजमा शुक्रबारको नमाज पढिरहेका सयौं मुस्लिम धर्मावलम्बीहरुमाथि जथाभावी गोली प्रहार गरिएको थियो । न्युजिल्याण्डको स्थानीय समय अनुसार १ बजेर ४५ मिनेटमा क्राइष्टचर्चको सिटी सेन्टरमा रहेको अल नुर मस्जिदमा अत्याधुनिक हतियारधारी आक्रमणकारीले जथाभावी गोली प्रहार गरेका थिए ।

उक्त गोली प्रहारमा ४१ जनाले ज्यान गुमाएका थिए । त्यसैगरि नजिकै रहेको लिनउडमा रहेको अर्काे मस्जिदमा करिब १० मिनेटपछि गोली प्रहार गरि ७ जनाको हत्या गरिएको थियो । एक ब्यक्तिको अस्पतालमा उपचारको क्रममा मृत्यु भएको हो ।

घटनामा संलग्न एक महिलासहित चारजनालाई न्युजिल्याण्ड प्रहरीले पक्राउ गरेको छ । प्रहरीद्वारा पक्राउ परेका एक अष्ट्रेलियाका नागरिक समेत रहेको प्रहरीले बताएको छ । आक्रमणकारीले आक्रमणको सामाजिक सञ्जालमा प्रत्यक्ष प्रसारण गरेका थिए । बन्दुकधारी सेनाले लगाउने जस्तो पोशाक लगाएर मस्जिदमा छिरेको र जथाभावी गोली चलाएको प्रत्यक्षदर्शीहरुले बताएका छन् । बन्दुकधारीले अत्याधुनिक तथा अटोमेटिक हतियार प्रयोग गरेको प्रत्यक्षदर्शीहरुलाई उद्धृत गर्दै सञ्चारमाध्यमहरुले जनाएका छन् ।
आक्रमणको जानकारी पाएपछि प्रहरीले आसपासका विद्यालय, पसल तथा स्थानीय क्षेत्रलाई निषेधित क्षेत्र घोषणा गरेको थियो । यसैगरि विष्फोटक पदार्थ राखिएका कारहरुलाई प्रहरीको विशेष टोलीले निष्त्रिmय पारेको थियो । न्युजिल्याण्डको एक टेलिभिजनलाई घटनाका प्रत्यक्षदर्शीहरुले ६ मिनेटभन्दा लामो समयसम्म बन्दुकधारीले अत्याधुनिक हतियारद्वारा जथाभावी गोली चलाएको बताए ।

उनले मस्जिदमा सबै प्रार्थना गरिरहेको शून्य समयमा बन्दुकधारी पसेर अन्धाधुन्ध गोली प्रहार गरेको सुनाए । घटनामा परेका सर्वसाधारणहरुले बन्दुकधारीबाट ज्यान बचाउन मस्जिदको पछिल्लो ढोका तथा झ्याल फुटाएर भागेका थिए भने कोही शौचालमा लुकेको सञ्चारमाध्यमहरुलाई बताएका छन् ।

उक्त मस्जिदमा न्युजिल्याण्डसँग टेस्ट खेल खेल्न आएका बंगलादेशका राष्ट्रिय टोलीका सदस्यहरु समेत नमाज पढ्न आएका थिए तर उनीहरु सबै सुरक्षित रहेको सञ्चारमाध्यमहरुले जनाएका छन् । घटनापछि न्युजिल्याण्ड र बंगलादेशबीच शनिबार हुने भनिएको टेस्ट क्रिकेट समेत स्थगित गरिएको छ । घटनापछि न्युजिल्याण्डले आतंकवादी सुरक्षाको प्रक्रियालाई न्यूनबाट उच्च सर्तकतामा बृद्धि गरेको छ । यसैगरी क्राईष्टचर्चको एयरपोर्टमा समेत सुरक्षा सर्तकता बढाएको छ ।

न्युजिल्याण्डका प्रधानमन्त्री जसिन्था आर्डेनले घटनालाई आतंककारी आक्रमणको संज्ञा दिदै यो दिन न्युजिल्याण्डको लागि कालो दिन भएको प्रतिक्रिया दिएकी छिन् । उनले यस्तो कायर आक्रमणले न्युजिल्याण्डबासीलाई हतोत्साही गर्न नसक्ने बताएकी छिन् । घटनाको बारेमा सञ्चारमाध्यमहरुलाई जानकारी दिदैं घटनाबाट भावुक बनेकी प्रधानमन्त्री आर्डेनले न्युजिल्याण्ड सबैको घर भएको बताउँदै यस्ता सोच तथा घटनालाई सम्पुर्ण न्युजिल्याण्डवासीहरुले अस्वीकार गर्ने बताएकी छन् । अष्ट्रेलियाका प्रधानमन्त्री स्कट मरिसनले आक्रमणकारी अतिवादी आतंककारी भएको बताउँदै यो समयमा सम्पूर्ण अष्ट्रेयिाली न्युजिल्याण्डको साथमा रहेको बताएका छन् ।

घटनास्थलमा रहेका नेपालीहरुले समेत घटना अत्यासलाग्दो भएको बताए । क्राइष्टचर्चमै रहेको युनिभर्सिटी अफ ओट्टागोमा रिसर्च गर्ने भुवनेश्वर ढकालले आफू ५ मिनेटको दूरीमा रहेको र घटना अकल्पनीय भएको बताए । सुरक्षाकर्मीहरुले जारी गरेको निषेधित क्षेत्रमा घरभित्रै रहेका एनआरएन न्युजिल्याण्डका कार्यवाहक अध्यक्ष घनश्याम सापकोटाले घटना भएको क्षेत्र आसपासमा करिब दुई दर्जन नेपाली परिवार बस्दै आएको जानकारी दिदैं कुनै पनि नेपाली घटनाबाट प्रभावित नभएको बताए ।

उनले घटना अत्यन्तै निन्दनीय भएको बताउँदै पीडितहरुलाई सहयोग पुरयाउन आफूहरुले पहल गरिसकेको समेत बताए । न्युजिल्याण्ड समेत हेर्ने अष्ट्रेलियास्थित नेपाली दूतावासकी कार्यवाहक राजदूत दु्रपदा सापकोटाले घटनामा नेपाली हताहत नभएको जानकारी दिईन् ।

प्रकाशित : चैत्र १, २०७५ १०:३५
ADVERTISEMENT
प्रतिक्रिया
पठाउनुहोस्

चन्दलाई प्रतिबन्ध घोषणासँगै सुरक्षा सतर्कता बढाइयो

जनकराज सापकोटा

काठमाडौँ — सरकारले प्रतिबन्ध लगाएको विरोधमा नेक्रवित्रम चन्द नेतृत्वको नेकपाले गरेको देशव्यापी बन्दको बढी प्रभाव शैक्षिक क्षेत्रमा परेको छ । प्रहरी प्रधान कार्यालयले सातै प्रदेशबाट संकलन गरेको रिपोर्टले शैक्षिक संस्थान सबैभन्दा धेरै प्रभावित बनेको देखाएको छ । स्कर्टिङ र राजमार्ग सुरक्षा गस्ती बढाइए पनि लामो दूरीका सवारीसाधन प्रभावित बनेको प्रहरीले जनाएको छ । 





बन्दका कारण प्रदेश १ का ६० प्रतिशत शैक्षिक संस्था मात्रै सञ्चालनमा आएका थिए भने प्रदेश २ मा ७५ प्रतिशत शैक्षिक संस्था चले । प्रदेश ३, ५, ६ र कर्णाली प्रदेशका शैक्षिक संस्था फाटफुट मात्रै चलेको र गण्डकी प्रदेशका शैक्षिक संस्था ५० प्रतिशत मात्रै सञ्चालनमा आएको प्रहरी रिपोर्ट छ ।

महानगरीय प्रहरी कार्यालयका अनुसार काठमाडौं उपत्यकाका तीनै जिल्लाको अवस्था सामान्य रहेपनि पठनपाठन भने पूर्ण रूपमा प्रभावित भयो । सबैजसो प्रदेशका छोटो दूरीका सवारीसाधन सञ्चालनमा आए पनि लामो दूरीका सवारी सञ्चालन नभएको प्रहरीले जनाएको छ ।

प्रदेश प्रहरी कार्यालयबाट प्रहरी प्रधान कार्यालयमा आएको रिपोर्टअनुसार प्रदेश १ को इलामबाट मात्रै लामो दूरीका सवारीसाधन चलेका थिए । प्रदेश २ बाट लामो दूरीका सवारीसाधन थोरै चले भने गण्डकी प्रदेशको कास्कीबाट काठमाडौंका लागि सवारी छुटे पनि अन्य जिल्लाबाट चलेनन् । प्रदेश ५, ६ र कर्णाली प्रदेशबाट पनि लामो दूरीका सवारीसाधन चलेनन् । बन्दको सबैभन्दा धेरै प्रभाव प्रदेश ५ र सुदूरपश्चिम प्रदेशको कञ्चनपुरमा पर्‍यो । त्यहाँ लामो र छोटो दूरीका दुवै सवारीसाधन ठप्प रहे । देशैभरि बजार र कलकारखाना खुला रहेको र सार्वजनिक गतिविधि सामान्य प्रभावित बनेको प्रहरीले जनाएको छ ।

नेकपाले बन्द सफल पार्न देशैभरि विस्फोट र आगजनी प्रयास गरेको प्रहरीको रिपोर्ट छ । प्रहरी प्रधान कार्यालयका अनुसार बिहीबार साँझसम्म कैलाली, कास्की, सिन्धुपाल्चोक, रौतहट, जुम्ला, स्याङजा, मकवानपुर, रुकुम पूर्व, बाग्लुङ, बाजुरा र गोर्खामा विस्फोटक पदार्थ भेटिएको थियो । कैयौं ठाउँमा नक्कली बम राखेर आतंक सिर्जना गरेको पाइएको छ ।

नेकपाका कार्यकर्ताले कैलालीमा बसमाथि आगजनी गरेको तथा कपिलवस्तु, नवलपरासी र मकवानपुरमा ट्रकमा क्षति पुर्‍याएका छन् । प्रहरीले बन्द गराउने काममा संग्लन रहेको भन्दै ४ जनालाई पक्राउ गरेको छ ।

सुरक्षा सतर्कता बढाइयो
सरकारले चन्द नेतृत्वको नेकपाका गतिविधि प्रतिबन्धित घोषणा गरेसँगै प्रहरीले देशव्यापी सुरक्षा सतर्कता बढाएको छ । प्रहरी स्रोतका अनुसार दुर्गम भेगका प्रहरीचौकीमा आक्रमण हुन सक्ने भन्दै प्रहरीले सतर्क रहन निर्देशन दिएको छ । त्यस्तै, राजधानी र देशका सबैजसो मुख्य सहरमा गस्ती, चेकजाँच र प्रहरी परिचालन बढाइएको छ ।

प्रहरी प्रवक्ता उत्तमराज सुवेदीका अनुसार सादा पोसाकका प्रहरीको परिचालन बढाइएको छ भने सूचना संकलनलाई तीव्रता दिइएको छ । प्रहरीले चन्द समूह सम्बद्धहरूको सूची तयार पार्ने, प्रत्यक्ष संग्लनलाई पक्राउ गर्ने र सदाशय राख्नेमाथि निगरानी गर्ने नीति लिएको छ ।

राजधानी कम प्रभावित
महानगरीय प्रहरी कार्यालयले उपत्यकाको सुरक्षा अवस्था सामान्य रहेको र बन्दले प्रभावित नभएको जनाएको छ । कार्यालयका प्रवक्ता एसएसपी श्याम ज्ञवालीका अनुसार संवेदनशील स्थानमा निगरानी, नियमित जाँच र सरप्राइज जाँच सुरु गरिएको र गस्ती बढाइएको बताए । उनले भने, ‘काठमाडौं छिर्ने र बाहिरिने नाकामा जाँच र सादा पोसाकका प्रहरी परिचालन बढाइएको छ ।’

प्रकाशित : चैत्र १, २०७५ १०:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT