अष्ट्रेलियामा एक महिनापछि आम निर्वाचन घोषणा

नारायण खड्का

अष्ट्रेलिया — अष्ट्रेलियाका प्रधानमन्त्री स्कट मरिसनले करिब एक महिनापछि मे १८ मा आमनिर्वाचन गर्ने घोषणा गरेका छन् । उनको आग्रहमा गर्भनर जनरल पिटर कसग्रोभले बिहीबार बिहानैदेखि लागू हुने गरि संसद भंग गरेका छन् ।

तस्बिर साैजन्य : एसबीएस

बिहीबार बिहान राजधानी क्यानेराको संसद् भवनमा उनले केन्द्रीय निर्वाचनको मिति घोषणा गरेका हुन् । उनी बिहीबार बिहानै गर्भनर जनरल कसग्रोभलाई भेटन उनको कार्यालयमा गएर निर्वाचन मितिका बारेमा जानकारी गराउनुका साथै निर्वाचनका लागि आग्रह गरेका थिए ।

सामान्यतयाः आइतबार घोषणा गर्ने गरिएको निर्वाचन यसपटक प्रधानमन्त्री मरिसनले त्यो परिपाटीलाई परिवर्तन गर्दै बिहीबार घोषणा गरेका हुन् । विगत केही दिनदेखि नै विपक्षी दल लेबरले आफू निर्वाचन मिति घोषणा गरिए जुनसुकै समयमा निर्वाचनमा जान तयार रहेको बताइरहेको थियो ।

मे १८ मा हुने निर्वाचनले ४६औं संसदका लागि सरकार र संासदहरुको छनौट गर्नेछ । संघीय राज्य संरचना प्रणाली अन्तरगत चल्दै आएको अष्ट्रेलियाको केन्द्रीय तल्लो सदनमा १ सय ५० सिटका लागि मतदान हुनेछ भने माथिल्लो सदन सिनेटका लागि ७६ जना चयन हुनेछन् ।

बहुमतको सरकार निर्माणका लागि प्रत्यक्षतर्फको मतदानमा ७६ सिटको आवश्यकता पर्नेछ । पछिल्लो समयमा यहाँ गरिएका सर्वेक्षणहरुले विपक्षी दल लेबरले सरकार बनाउनसक्ने सम्भावना देखाइरहे पनि सत्तारुढ दलका नेता तथा प्रधानमन्त्री मरिसनले जनतालाई सक्षम आर्थिक विकास दिने सरकार वा देशको आर्थिक अवस्थालाई कमजोर पार्ने सरकारमध्ये एकको छनौट गर्ने अवसर आएको बताएका छन् ।

हरेक ३ वर्षको कार्यकालका लागि हुने निर्वाचनमा यसवर्ष पनि सँधैको जस्तै मुख्य दुई दल सत्तारुढ लिबरल कोअलिसन र विपक्षी दल लेबर सरकार निर्माणको लागि प्रतिष्पर्धामा रहने सञ्चारमाध्यमहरुले विश्लेषण गरेका छन् ।

त्यसबाहेक अन्य साना दलहरु गि्रन, वान नेसन लगायत पनि चुनावी प्रतिष्पर्धामा हुनेछन् । यसअघिको निर्वाचनबाट निर्वाचित केही सांसदहरु दोहोरो नागरिकता प्रकरणका कारण अदालतबाट अयोग्य सावित भएका थिए भने केही सांसदहरुले राजनीतिबाटै सन्यास लिएका कारण यसवर्षको निर्वाचन रोचक बन्ने देखिएको छ ।

अष्ट्रेलियाको निर्वाचनमा विदेशमा रहेका आफ्ना नागरिकहरुलाई उक्त देशमा रहेको आफ्नो दूतावास, वाणिज्य दूतावासहरुसमेत मतदानमा सहभागी हुने अधिकार दिने गरिएको छ ।

यसैगरी मतदानस्थलमा जान नसक्ने मतदाताहरुलाई हुलाकमार्फत समेत मतदानमा सहभागी गराइने गरिन्छ । मतदानमा सहभागी नहुने नागरिकहरुले जरिवाना तिर्नुपर्ने कानुनी ब्यवस्था छ ।

प्रकाशित : चैत्र २८, २०७५ १०:३२
प्रतिक्रिया
पठाउनुहोस्
ADVERTISEMENT
ADVERTISEMENT

गुगलको ड्रोन सेवा

नारायण खड्का

अस्ट्रेलिया — गुगलले अस्ट्रेलियाको राजधानी क्यानबेराबाट व्यावसायिक ड्रोन डेलिभरी सेवा सुरु गर्ने भएको छ । अस्ट्रेलियाको हवाई सुरक्षासम्बन्धी नियमन निकाय सिभिल एभिएसन सेफ्टी अथोरिटी (कासा) ले उडानका लागि अनुमति दिएपछि औपचारिक रूपमा केही महिनाभित्रै कम्पनीले सेवा सुरु गर्ने भएको हो ।

‘विङ’ नाम दिइएको यो व्यवसाय गुगलको अभिभावक कम्पनी ‘अल्फाबेट’ ले सञ्चालन गर्ने जनाएको छ । अल्फाबेटको पहिलो सार्वजनिक ड्रोन डेलिभरी कम्पनी हो । सञ्चारमाध्यमहरूका अनुसार गुगलले पुर्‍याउने यो व्यावसायिक डेलिभरी सेवा क्यानबेराको स्थानीय सहरहरू क्रेस, पालमरस्टन र फ्यांकलिनमा उपलब्ध हुनेछन् ।

यसैगरी कम्पनीले आफ्नो सेवा क्यानबेराकै अन्य क्षेत्रहरू ह्यारिसन र गुंगालिनमा समेत विस्तार गर्ने जनाएको छ । गुगलले सुरु गरेको यो व्यवसायले वार्षिक ३० देखि ४० मिलियन अस्ट्रेलियन डलरको व्यापार हुने विश्वास गरिएको छ । सुरुमा यो सेवाबाट सय बढी घरपरिवार लाभान्वित हुने जनाइएको छ ।

गुगलले पुर्‍याउने सेवामा औषधि, कफी, खाना, चकलेट, पाउरोटीलगायत पदार्थ रहने छन् । स्थानीय उत्पादनकर्ताहरूको सहकार्यमा उत्पादित सामग्रीहरू वितरण गरिनेसमेत बताइएको छ । ‘कासा’ का प्रवक्ता पिटर गिब्सनले अनुमति दिने क्रममा ड्रोनको सुरक्षा, ट्राफिक व्यवस्थापन, पाइलट तालिम, सञ्चालन विधिलगायत सबै फ्रक्रियाको छानबिन गरेर मात्र अनुमति दिइएको बताए ।

‘अनुमति दिने त्रममा हामीले सबै सुरक्षा प्रक्रियाको अध्ययन गर्नुका साथै यस सेवाले हवाई क्षेत्र र स्थानीय जनतालाई कुनै हानि नहुने पाएका छौं,’ उनले स्थानीय सञ्चारकर्मीलाई भने । उनका अनुसार तत्कालका लागि गुगलको उक्त ड्रोनले दिउँसो मात्र वितरण सेवा दिन सक्नेछ भने मुख्य सडकहरूको माथि ड्रोन उडाउन पाउने छैन ।

गुगलले ड्रोनमार्फत व्यावसायिक वितरणको औपचारिक अनुमति प्राप्त गर्नुअघि करिब १ वर्षसम्म यससम्बन्धी परीक्षण गरेको थियो । गुगलले अनुमति पाए पनि सर्वसाधारणहरूको नजिकबाट ड्रोन उडाउन पाउने छैन भने यसका ग्राहकहरूलाई ड्रोनबाट अपनाउनुपर्ने सतर्कतासम्बन्धी सूचनासमेत दिनुपर्नेछ ।

प्रकाशित : चैत्र २८, २०७५ ०८:३९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT