सबैभन्दा ठूलो विमानले भर्यो उडान

एजेन्सी

क्यालिफोर्निया — स्ट्रेटोलन्च कम्पनीले बनाएको विश्वकै सबैभन्दा ठूलो विमानले पहिलो उडान भरेको छ । स्याटेलाइट लन्च प्याडका लागि यो विमान निर्माण गरिएको हो । अन्तरिक्षमा उपग्रह छाड्नुअघि १० किलोमिटरसम्म यो विमानले उडान भर्न सक्छ । 


यो विमानको प्वाख ३ सय ८५ फुट लामो छ। बीबीसीका अनुसार विमानको प्याख कुनै पनि अमेरिकी फुटबल मैदान जत्रै छ। यो विमान प्रयोगमा आए अन्तरिक्षमा कुनै वस्तु जमिनबाट पठाउनुभन्दा यो अलिक सस्तो हुने प्राविधिकहरूले बताउँछन्।

यो विमानमा दुई एयरक्राप्ट बडीलाई एकआपसमा जोडिएको छ। आधा दर्जन यन्त्रजडित यो विमानले पहिलो पटक उडान भर्दा १५ हजार फिट माथिसम्म पुगको थियो। कम्पनीका अनुसार यसको अधिकतम गति सीमा १७० माइल प्रतिघन्टा रहेको छ।

यो विमान उडाउने पाइलट इभन थोमसले भने, 'अद्भुत थियो, हामीले अपेक्षा गरेअनुसारकै विमान बन्यो, गजबले आकाशमा चक्कर लगायो।' स्ट्रेटोलन्चले यो विमानलाई संसारकै सबैभन्दा ठूलो भनेर दाबी गरेको छ।

बेलायती अर्बपति रिचर्ड ब्रेंसनको कम्पनी भर्जिन गेलेक्टिकले पनि अन्तरिक्षको कक्षमा रकेट पठाउनका लागि यस्तै खालको विमान बनाएको थियो। यसबाटै अन्तरिक्ष कक्षमा रकेट पठाइरहेको छ। माइक्रोसफ्टका सह-संस्थापक पोल एलनले पहिलो पटक सन् २०११ मा यो विमानको प्रदर्शन गरेका हुन्।

प्रकाशित : वैशाख १, २०७६ २०:३३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

गोर्खा पार्कमा भीसी विजेता

प्रदीप मेन्याङ्बो

सुनसरी — प्रख्यात युद्धपदक भिक्टोरिया क्रस विजेता ८४ वर्षीय रामबहादुर बेघा लिम्बू दोस्रोपटक धरानको बि्रटिस गोर्खा स्मृति पार्कमा आउँदा उबेलाको जोस सम्झेर हौसिए । 'अवकाश पाएर नेपाल आएपछि मैले पनि यस्तै पार्कको कल्पना गरेको थिएँ,' दुई वर्षअघि आफैंले शिलान्यास गरेको गोर्खा स्तम्भ नियाल्दै उनले भने, 'यसले गोर्खाको इतिहास र पहिचान जीवित राख्छ, नयाँ पुस्ताले पुर्खाका बारेमा थाहा पाउनेछन् ।' 

बेघा यसपटक पार्कमा करिब ७५ लाख रुपैयाँ लागतमा तयार गोर्खा चमेना गृह उद्घाटन गर्न आएका थिए । पहिलो र दोस्रो विश्वयुद्धपछि पनि धेरै युद्ध लडेका वीर गोर्खाहरूको अलग इतिहास र पहिचान छ । तिनको सम्मान गर्दै इतिहास अभिलेखीकरण र नयाँ पुस्तालाई अध्ययन-अनुसन्धानमा सघाउन गोर्खा लाहुरेहरूले गोजीबाट पैसा हालेर धरान-२० विष्णुपादुकास्थित माछामारा डाँडामा स्मृति पार्क बनाएका हुन् । सिपाहीदेखि विभिन्न पदबाट अवकाश पाएका लाहुरेहरूले डाँडापाखालाई गोर्खाको इतिहास सम्झाउने संग्रहालयका रूपमा विकास गर्न खोजेकामा बेघाले प्रशंसा गरे ।

'यो पार्क पूर्ण रूपमा बने धरान मात्र नभएर प्रदेश १ कै सार्वजनिक सम्पत्ति बन्नेछ,' उनले भने, 'पूर्वको पर्यटकीय केन्द्र बन्नेछ ।' बेलायती महारानीले समेत सलाम गर्ने बेघा एक मात्र जीवित भीसी विजेता हुन् ।

सन् १९६५ नोभेम्बर २१ मा लान्सकप्रोल पदमा रहेका उनले बोर्नियोको सारवाक युद्धमा देखाएको वीरताको कदरस्वरूप बेलायती महारानीबाट भिक्टोरिया क्रस र अरू उच्च सम्मान पाएका थिए । त्यति बेला उनी २६ वर्षका थिए ।

फेरि बेलायत गए त्यहाँको रक्षा मन्त्रालय (एमओडी) लाई पार्कका लागि आर्थिक, भौतिक सहयोगको अनुरोध गर्ने उनले बताए । बेघा अहिले झापाको दमकमा बस्छन् । लाहुरेहरू सामाजिक काम र विकास निर्माणमा जहाँ पनि सक्रिय रहेको र भरसक पारदर्शिता खोज्ने भए पनि प्रशासनिक प्रक्रियामा झन्झट बेहोर्नुपरेको उनको भनाइ छ ।
१२ बिघामा फैलिएको पार्कमा हालसम्म ३ करोड ५ लाख रुपैयाँ खर्च भइसकेको छ । दुइटा आकर्षक प्रवेशद्वार, गोर्खा स्तम्भ, दुई होमस्टे, चारतले चमेना गृह, हेलिप्याड, शौचालय, पानीका धारा र ट्यांकी, सवारी पार्किङस्थलजस्ता संरचना बनाइएको पार्क सञ्चालक समिति अध्यक्ष क्याप्टेन हरिबहादुर लिम्बूले बताए ।

'गुरुयोजनाअनुसार काम गर्न अझै धेरै छ । स्मारक बने पनि त्यसमा सबै रेजिमेन्ट, कम्पनी र प्लाटुनका इतिहास भर्न बाँकी छ । वनभोज स्थल, संग्रहालय, जुम्ल्याहा कटेज, खुलामञ्च, बोटानिकाल गार्डेन, फुटपाथ, चिल्ड्रेन पार्क, सूचना डेस्क, धरान भ्युटावर, प्याराग्लाइडिङ स्थल र फेन्सिङ गर्न बाँकी छ,' उनले भने ।

पार्क निर्माणमा नेपाल, बेलायत र हङकङ बस्दै आएका १ हजार २ सय ७० जना बि्रटिस गोर्खा र तिनका सन्तान आजीवन सदस्य भएर सघाइरहेका छन् । पार्कका परिकल्पनाकार धरानका पूर्वगोर्खा रमेशकाजी राई हुन् । त्यसलाई साकार पार्न निर्माण समिति संयोजक पूर्वगोर्खा गजेन्द्र इस्बो, दानबहादुर राई, नरबहादुर थापा, चन्द्रमाया लिम्बू, सुवित्रा राईलगायतले कार्यान्वयन गर्न आर्थिक संकलन अभियान चलाएका थिए । 'हामीले गोजीको पैसाबाट १२ बिघा जग्गा किनेर गोर्खा इतिहास कायम राख्न नेपाल सरकारका लागि सार्वजनिक सम्पत्ति बनाइदिएका छौं । अहिले यसको मूल्यांकन गर्ने हो भने अर्ब रुपैयाँ पुग्छ । यसमा लागेको हाम्रो सम्पत्ति, श्रम, सीप र समयको कदर गर्दै सरकारले बाँकी काम गर्नुपर्छ,' संयोजक इस्बोले भने ।

प्रकाशित : वैशाख १, २०७६ २०:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT