ट्रम्पलाई वेल्डले चुनौती दिने

एएफपी

वासिङ्टन — सन् २०२० को अमेरिकी राष्ट्रपति निर्वाचनका लागि रिपब्लिकन पार्टीका तर्फबाट बिल वेल्डले उम्मेदवारी घोषणा गरेका छन् । राष्ट्रपति डोनाल्ड ट्रम्प नै रिपब्लिकन पार्टीका तर्फबाट उम्मेदवार हुने तयारी भइरहेका बेला वेल्डले उम्मेदवारी घोषणा गरेका हुन् । 

विपक्षी डेमोक्रेटिक पार्टीका तर्फबाट १८ जनाले उम्मेदवारी घोषणा गरिसकेका छन् ।

Citizen

अमेरिकी म्यासाचुसेट्स राज्यका ७३ वर्षीय पूर्वगभर्नर बिल वेल्डले ट्वीट गर्दै आफूले उम्मेदवारी दिने बताएका हुन् ।

राष्ट्रपति ट्रम्प पार्टीभित्र निकै लोकप्रिय भएकाले बिल वेल्डले पार्टीका तर्फबाट उम्मेदवारी पाउने सम्भावना कम छ । तर यस उम्मेदवारीले पार्टीभित्र निराशा रहेको प्रस्टै देखिएको छ । रिपब्लिकन पार्टीभित्र ट्रम्पले विपक्षीमाथि जथाभावी आलोचना गर्ने गरेको, रूसी राष्ट्रपतिसँग साँठगाँठ गरेको तथा भर्जिनियामा गोरा राष्ट्रवादीले गरेको आक्रमणप्रति नरम व्यवहार गरेको आरोप लगाइने गरेको छ ।

प्रकाशित : वैशाख ४, २०७६ ०९:२५
ADVERTISEMENT
प्रतिक्रिया
पठाउनुहोस्

२०० वर्ष लगाएर बनेको गिर्जाघर

कान्तिपुर संवाददाता

काठमाडौँ — यो गिर्जाघर पेरिसको लगभग मध्यभागमा अवस्थित छ र करिब २०० वर्ष लगाएर यसको मुख्य संरचना बनाइएको थियो । राजा लुई सातौंको पालामा सन् ११६३ मा यसको निर्माण सुरु गरिएको थियो । शिलान्यास पोप अलेक्जान्डर तृतीयको उपस्थितिमा गरिएको थियो । तर १३४५ अघि निर्माण सम्पन्न हुन सकेन । त्यसयता यो गिर्जाघर थुप्रै ऐतिहासिक घटना क्रमको साक्षी भएको छ ।

नोट्र–डाम गिर्जाघर आगलागी हुनुअघि (बायाँ) र पछि । तस्बिर : रोयटर्स

सन् १४३१ मा बेलायतका राजा हेनरी छैटौंले यहीभित्र श्रीपेच पहिरेका थिए भने यो गिर्जाघर १८०४ मा नेपोलियन बोनापार्टको राज्यभिषेकको पनि साक्षी रह्यो ।

नोट्र–डाम सन् १७९० को फ्रान्सेली क्रान्तिका बेला नराम्ररी क्षतिग्रस्त भएको थियो । धर्मविरोधी हिंसात्मक भीडले गिर्जाघरको शिखर तोडफोड गरेको थियो । यहाँका बहुमूल्य वस्तु लुटिएका थिए भने बाहिर ढोकामा रहेका भव्य प्रतिमा तोडफोड गरिएका थिए ।

सन् १९४४ अगस्ट २४ मा जर्मनी कब्जाबाट पेरिस मुक्त हुँदा यही गिर्जाघरको घण्टा बजाइएका थिए । यसैमा आधारित भएर प्रख्यात लेखक भिक्टर ह्युगोले उपन्यास ‘द हन्चब्याक अफ नोट्र–डाम’ लेखेका थिए । पछि यही पुस्तकका आधारमा फिल्म बनाइयो । जसमा गिर्जाघरको नराम्रो अवस्था देखाइएको छ । यही कारण १९ औं शताब्दीको मध्यतिर गिर्जाघर पुनर्निर्माण भएको थियो ।
यसको भ्रमण गर्न पनि बर्सेनि लाखौं पर्यटक फ्रान्स आउने गर्थे ।

यहाँ यशु क्रिस्टको पालादेखिका वस्तुहरू संग्रहित रहेको बताइन्छ । यहाँ प्यासन अफ क्रिस्ट भनिने यशुलाई झुन्ड्याइएको क्रस, उनको शरीरमा ठोकिएका किलाहरू र अन्तिम अवस्थामा येशुले लगाएको मुकुट राखिएको विश्वास गरिन्छ ।

प्रकाशित : वैशाख ४, २०७६ ०९:२३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT