अफगानिस्तानमा पत्रकारको हत्या
काबुल — अफगानिस्तानका महिला पत्रकारको हत्या भएको छ । टेलिभिजनमा कार्यरत रहिसकेकी पत्रकार मीना मङ्गलाई राजधानी काबुलमा शनिबार गोली हानि हत्या गरिएको हो । उनी राजनीतिमा समेत सहभागी थिइन् ।
अफगानिस्तानका राजनीतिज्ञ तथा महिला अधिकारवादीले हत्याको कडा शब्दमा भर्त्सना गरेका छन् । हत्यामा संलग्न भएकालाई तत्कालै कारबाही गर्न उनीहरूले माग गरेका छन् ।
अफगानिस्तानका प्रमुख कार्यकारी अब्दुल्लाह अब्दुल्लाहले मीनाको हत्यामा संलग्न भएकालाई पक्राउ गरी कानुनी कारबाही गरिने प्रतिबद्धता व्यक्त गरे । अफगान प्रहरीले अनुसन्धान थालेको बताएको छ ।
अफगानिस्तानमा महिला अधिकारका क्षेत्रमा कार्यरत संघसंस्था, सर्वोच्च अदालत, महिलाविरुद्धका हिंसासम्बन्धी आयोग र नागरिक समाजका प्रतिनिधिले हत्याबारे गम्भीर अनुसन्धान गर्न माग गरेका छन् ।
प्रकाशित : वैशाख ३१, २०७६ ०८:३०