फ्लुका कारण यसवर्ष अष्ट्रेलियामा ४२ जनाको मृत्यु

क्विन्सल्याण्ड र दक्षिण अष्ट्रेलियामा महामारी कै रुपमा समस्या
नारायण खड्का

अष्ट्रेलिया — फ्लुका कारण यसवर्ष अष्ट्रेलियामा ४२ जनाले ज्यान गुमाएका छन् । ज्यान गुमाउनेमा अधिकांश वृद्धवृद्धा रहेको तथ्यांक सार्वजनिक गरिएको छ । अष्ट्रेलियाको क्विन्सल्याण्ड र दक्षिण अष्ट्रेलियामा मात्र यसवर्ष ज्यान गुमाउनेहरुको संख्या अत्याधिक रहेको छ ।


हालै सार्वजनिक गरिएको तथ्यांक अनुसार क्विन्सल्याण्डमा २५ जनाले अहिलेसम्म ज्यान गुमाइसकेका छन भने दक्षिण अष्ट्रेलियामा फ्लुकै कारण १७ जनाको मृत्यु भएको छ। ६ वटा राज्य र दुई टेरिटोरी रहेको अष्ट्रेलियाको अन्य राज्य तथा टेरिटोरीको तथ्यांक सार्वजनिक नभइसकेकाले यो संख्या अझ बढ्नसक्ने अनुमान गरिएको छ।

दक्षिण अष्ट्रेलियामा मात्र यसबाट मृत्यु हुनेहरुमा वृद्धवृद्धा रहेको समाचारमाध्यमहरुले जनाएका छन्। जसका कारण केही वृद्धवृद्धाहरुले जीवन बिताउने ओल्ड एज होमहरु अस्थायी रुपमा बन्द समेत गरिएको छ। प्रमुख स्वास्थ्य अधिकृत प्रोफेसर प्याडी फिलिप्सले वर्षको शुरुवातदेखि अहिलेसम्म विभिन्न ५३ नर्सिङ्गहोमहरु यो रोग देखिइसकेको र १८ वटालाई अस्थायी रुपमा बन्द गरिएको बताएका छन्।

यसैगरी क्विन्सल्याण्ड हेल्थले सार्वजनिक गरेको तथ्यांक अनुसार फ्लुकै कारण अहिलेसम्म ८ सय बढी बिरामीहरु अस्पतालमा भर्ना भइसकेका छन् भने करिब १० हजारजना यस रोगका कारण बिरामी परेका थिए। अष्ट्रेलियामा यसवर्षको सुरुवातदेखि अहिलेसम्म करिब ४० हजार बिरामीहरु पाइएको समेत जनाइएको छ।

क्विन्सल्याण्डका प्रमुख स्वास्थ्य अधिकृत डा. जेनेट योङ्गले सबै नागरिकहरुलाई यथासक्य चाँडो फ्लुको भ्याक्सिन लगाउनका लागि आग्रह गरेकी छिन्। उनले फ्लु सामान्य रुघाखोकी जस्तो नभई गम्भिर किसिमको भाइरल रोग भएको बताउँदै भ्याक्सिन नै यो रोगबाट बचाउने सर्वोत्तम उपाय भएको बताइन्।

अष्ट्रेलियाको अन्य राज्यहरु न्यु साउथ वेल्स, पश्चिम अष्ट्रेलिया लगायतका राज्यहरुमा समेत फ्लुका कारण दर्जनौ बिरामी परेको सञ्चारमाध्यमहरुले जनाएका छन्। हरेक वर्ष मौसमी फ्लुका कारण अष्ट्रेलियामा दर्जनौं नागरिकहरुले ज्यान गुमाउने गरेका छन्। फ्लुबाट बच्नका लागि अष्ट्रेलिया सरकारले नागरिकहरुलाई सहुलियतमा फ्लुको भ्याक्सिन लगाउन पाउने सुविधा समेत दिने गरेको छ भने अधिकांश रोजगारदाताहरुले समेत आफ्ना कर्मचारीहरुलाई निशुल्क भ्याक्सिन दिलाउने गरेका छन्।

प्रकाशित : जेष्ठ १, २०७६ ११:०६
प्रतिक्रिया
पठाउनुहोस्

कालीगण्डकी करिडोरमा कलोपत्रे

माधव अर्याल

रामपुर, पाल्पा — कालीगण्डकी करिडोर अन्तर्गत पीपलडाँडा–गैडाकोट १ सय ३० किलोमिटर खण्डमा धमाधम कालोपत्रे भइरहेको छ  । अहिले बेस तयार हुँदैछ  ।

नाली निर्माण, सडक चौडा, रिटेनिङ वाललगायतका काम भइरहेका छन् । यस खण्डको ठेकेदार भारतको ईकेके इन्फ्रास्टक्चर लिमिटेडले कामलाई तीव्रता दिएको जनाएको छ ।


उक्त कम्पनीले साढे चार अर्ब रुपैयाँमा पीपलडाँडादेखि गैडाकोटसम्म कालोपत्रेको ठेक्का लिएको हो । कम्पनीका आयोजना व्यवस्थापक धर्मध्वज कुँवरले पीपलडाँडा–रामपुर, रामपुर–डेढगाउँ, डेढगाउँ–बुलिङटार र बुलिङटार–गैडाकोट गरी चार भागमा काम भइरहेको बताए ।

उनका अनुसार ३ नोभेम्बर २०१८ मा काम गर्ने सम्झौता भएको थियो । सम्झौता अनुसार २०२१ डिसेम्बरसम्म काम सक्नुपर्छ । कम्पनीमार्फतका विभिन्न पेटी ठेकेदारले बीचबीचमा नाली निर्माण, रिटेनिङ वाल लगाउने काम लिएका छन् । ‘नाली निर्माण, रिटेनिङ वाल, सडक चौडा गर्ने काम भइरहेको छ,’ उनले भने, ‘रामपुर, भलायटार, बुलिङटार र गैडाकोटमा साइट अफिस राखेर हेरचाह भइरहेको छ ।’


चौडा गर्ने क्रममा घर, विद्युत् पोल र रुखका समस्या बढी छन् । कालीगण्डकी करिडोर (गैडाकोट राम्दी मालढुंगा सडक योजना) योजना कार्यालय बर्तुङमार्फत यसको अनुगमन भइरहेको छ । कालीगण्डकी करिडोरका योजना प्रमुख नरेन्द्र सुवेदीले कामले तीव्रता पाएको जनाए ।

‘सानातिना समस्याबाहेक अवरोध छैन,’ उनले भने, ‘धमाधम काम भइरहेको छ ।’ यसको १५ जना प्राविधिकले रेखदेख गरिरहेका छन् । अहिलेसम्म चार प्रतिशत काम भएको छ । पीपलडाँडादेखि गैडाकोटसम्म कालीगण्डकी करिडोर अन्तर्गत २२ वटा पुल निर्माण भइरहेका छन् ।

‘३ दशमलव ५ प्रतिशत काम गर्नुपर्ने उल्लेख भए पनि उसले चार प्रतिशत काम सकेको छ,’ योजना प्रमुख सुवेदीले भने, ‘सन्तोषजनक काम भइरहेको छ । अहिलेसम्म निर्माण व्यवसायीलाई दोष लगाउने ठाउँ देखिएको छैन ।’ उनले तोकिएको प्रतिशतभन्दा केही बढी नै काम गरेको बताए । यस क्षेत्रमा निर्माण भएका पुल समयमा नसकिएको स्थानीयले गुनासो गरेका छन् ।


राम्दी–रिडी ट्र्याक खुलेन
कालीगण्डकी करिडोर अन्तर्गतको राम्दी–रिडी सडक खण्डमा भने अझै ट्र्याक खुलेको छैन । सात वर्षअघि नै बहुवर्षीय योजना अनुसार ट्र्याक खोल्न रकम विनियोजन भएकाले तीन वर्षभित्र सबै काम पूरा हुनुपर्नेमा सात वर्षसम्म काम सकिएको छैन । राम्दीदेखि अर्गलीसम्म ट्र्याक खुलेको क्षेत्रमा समेत सवारी साधन चल्न मुस्किल हुने अवस्थामा सडक पुगेको छ । सडक निर्माणको काममा भएको ढिलाइले पहिला खनेका सडकसमेत अहिले पुनः खन्नुपर्ने अवस्थामा पुगेका छन् ।


सुरुमा ट्र्याक खोल्दा जनसहभागितामा आधारित सडक निर्माण कार्यक्रममा उत्साही भएर श्रमदानमा स्थानीय सहभागी भएकाले छिटो निर्माण भएको थियो । तीन/चार वर्षसम्म बजेट विनियोजन नहुँदा स्थानीय बासिन्दा निरास भएका थिए । उत्तर–दक्षिण लोकमार्ग (कालीगण्डकी करिडोर) अन्तर्गत अर्गली–रामपुर–गैडाकोट १ सय ३२, रिडी–गुल्मी–बाग्लुङ ८८ किलोमिटर, बाग्लुङ–बेनी–जोमसोम ८७, जोमसोम–कोरला १ सय ५ किलोमिटर पर्छ ।

प्रकाशित : जेष्ठ १, २०७६ ११:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT