बहिर्गमन पथमा बेलायती प्रधानमन्त्री 

नवीन पोखरेल

लन्डन — युरोपेली संघबाट बेलायतको बहिगर्मन (ब्रेक्जिट) बारे जटिलता बढ्दै गएपछि प्रधानमन्त्री टेरेजा मेको बहिगर्मन सम्भावना बढेको छ । सत्तारुढ कन्जरभेटिभ दलका केही वरिष्ठ नेता पार्टी नेतृत्वका लागि मैदानमा उत्रने भएपछि प्रधानमन्त्री मेको बहिगर्मन चर्चा भएको हो । 

ब्रेक्जिट सम्झौता पारित गराउन असफलता र केही साताअघि सम्पन्न स्थानीय निर्वाचनमा आफ्नो पार्टीका १३ सय भन्दा बढी काउन्सिलरले पराजय भोगेपछि मेलाई पद छाड्न दबाब बढिरहेको छ ।

पूर्व विदेशमन्त्री बोरिस जोन्सनले कन्जरभेटिभ पार्टी नेतृत्वका लागि आफू लड्ने घोषणा गरेका छन् । म्यानचेस्टरमा आयोजित व्यापारसम्बन्धी एक कार्यक्रममा जोन्सनले भने, 'म अवश्य अगाडि बढ्नेछु । मलाई लाग्दैन कि यो विषय कसैसँग गोप्य राख्नुपर्छ ।'

सन् २०१६ को जनमत संग्रहमा जोन्सन 'बेलायत ईयूबाट बाहिरिनुपर्छ' भन्ने अभियानको नेतृत्वकर्ता थिए । उनले प्रधानमन्त्री मेको ब्रेक्जिट डिलमा असहमति जनाउंँदै गत वर्ष क्याबिनेट नै छाडेका थिए ।

कन्जरभेटिभ पार्टीका सदस्यहरूबीच गरिएको एउटा सर्वेक्षणमा जोन्सन बढी लोकपि्रय देखिएका छन् । दि टाइम्सका लागि युगोभ पोलले मे १० देखि १६ सम्म गरेको सर्वेक्षणमा ८५८ कन्जरभेटिभ सदस्यहरूलाई प्रश्न सोधिएको थियो । जोन्सनले ३९ प्रतिशत, डोमिनिक राबले १३ प्रतिशत, माइकल गोभले ९ प्रतिशत र म्याट हयानकले एक प्रतिशत मात्र सदस्यहरूको समर्थन पाएका थिए ।

१९२२ कमिटी अध्यक्ष सर ग्राहाम ब्राडीले केही साताभित्र प्रधानमन्त्री मेले अफिस छाड्नेमा कुनै शंका नभएको बताएका छन् । ब्राडीले प्रधानमन्त्री मेसँग जुन पहिलो साता भेटेर उनको उत्तराधिकारीको निर्वाचन मितिबारे सहमति गर्ने बताए ।
प्रधानमन्त्री मेले यसअघिब्रेक्जिट सम्झौता संसद्बाट पारित भए राजीनामा दिने बताएकी थिइन् । तर, मेले संसद्मा प्रस्तुत गरेको सम्झौता तीन पटक अस्वीकृत भएपछि ३१ अक्टोबरभित्र ईयू छाड्ने गरी समयावधि बढाइएको छ ।

मेले विपक्षीलाई आफ्ना मतभिन्नताहरू पन्छाउंँदै बेलायत युरोपेली संघबाट बाहिरिने सम्झौतामा सघाउन अपिल गर्दै आएकी छन् । प्रधानमन्त्री र विपक्षी दलका नेता जेरेमी कोर्बिनबीच ब्रेक्जिट अन्योल अन्त्य गर्न गत मंगलबार भएको वार्ता बिनासहमति टुंगिएको थियो ।

प्रधानमन्त्री मेको ब्रेक्जिट सम्झौता विधेयक हाउस अफ कमन्समा जुन ३ मा फेरि प्रस्तुत हुँदै छ । लेबर स्रोतले सर्वदलीय समझदारीबिना उक्त विधेयकमा समर्थन नगर्ने जनाएको बीबीसीले उल्लेख गरेको छ ।

यदि यसपटक पनि विधेयक पारित नभए बेलायत ईयूबाट बिनासम्झौता बाहिरिने वा धारा ५० खारेज गर्ने योजनामा सरकार रहेको प्रधानमन्त्री कार्यालय नम्बर १० लाई उद्धृत गर्दै बेलायती अखबारहरूले जनाएका छन् । ईयूले ३१ अक्टोबरको समयसीमा पुनः नबढाउने भएकाले पनि बेलायतसँग अब पर्याप्त विकल्प छैनन् ।

प्रकाशित : जेष्ठ ५, २०७६ ०९:०४
ADVERTISEMENT
प्रतिक्रिया
पठाउनुहोस्
ADVERTISEMENT

अस्ट्रेलियामा फ्लुको महामारी

कान्तिपुर संवाददाता

अस्ट्रेलिया — अस्ट्रेलियामा फ्लुका कारण यस वर्ष मात्रै ४२ जनाले ज्यान गुमाएका छन् । ज्यान गुमाउनेमा अधिकांश वृद्धवृद्धा छन् । 

ज्यान गुमाउनेमध्ये अधिकांश क्विन्सल्यान्ड र दक्षिणी अस्ट्रेलियाका छन् । हालै सार्वजनिक तथ्यांकअनुसार क्विन्सल्यान्डमा २५ जनाले ज्यान गुमाइसकेका छन् भने दक्षिण अस्ट्रेलियामा १७ को मृत्यु भएको हो । ती मध्ये १३ वृद्धवृद्धा छन् । अस्टे्रलियमा ६ राज्य र दुई टेरिटोरी छन् । अन्य स्थानको तथ्यांक सार्वजनिक नभइसकेकाले मृतकहरूको संख्या अझ बढ्न सक्ने जनाइएको छ ।

दक्षिण अस्ट्रेलियामा फ्लुले मृत्यु हुने वृद्धवृद्धाको संख्या बढेपछि उनीहरू बस्ने नर्सिङ होम अस्थायी रूपमा बन्द गरिएको छ । प्रमुख स्वास्थ्य अधिकृत प्रोफेसर प्याडी फिलिप्सले वर्षको सुरुवातदेखि हालसम्म५३ नर्सिङ होममा रोग पहिचान भएको जनाए । उनका अनुसार १८ नर्सिङ होम अस्थायी रूपमा बन्द गरिएको छ ।

अस्ट्रेलियामा फ्लुका कारण करिब ४० हजार बिरामी भएका जनाइएको छ । क्विन्सल्यान्ड हेल्थद्वारा सार्वजनिक तथ्यांकअनुसार फ्लुकै कारण हालसम्म १० हजार बिरामीमध्ये ८ सयभन्दा बढी अस्पतालमा भर्ना भइसकेका छन् । तीमध्ये दर्जनौं बालबालिका छन् ।

क्विन्सल्यान्डका प्रमुख स्वास्थ्य अधिकृत डा. जेनेट योङले सबै नागरिकलाई यथाशक्य फ्लुको खोप लगाउन आग्रह गरेकी छन् । उनले फ्लु सामान्य रुघाखोकी नभईगम्भीर प्रकारको भएकाले यसबाट बच्न खोप लगाउनु अत्यावश्यक भएको बताइन् ।

न्यु साउथवेल्स, पश्चिम अस्ट्रेलियालगायतका राज्यमा समेत फ्लुका कारण दर्जनौं बिरामी परेका स्थानीय सञ्चारमाध्यमले जनाएका छन् । हरेक वर्ष मौसमी फ्लुका कारण अस्ट्रेलियामा दर्जनौं नागरिकले ज्यान गुमाउने गरेका छन् ।

अस्ट्रेलिया सरकारले फ्लुबाट बच्ने खोपमा समेत नागरिकलाई सहुलियत दिने गरेको छ । कतिपय रोजगारदाताले समेत आफ्ना कर्मचारीलाई निःशुल्क खोप दिलाउने गरेका छन् ।

प्रकाशित : जेष्ठ ५, २०७६ ०९:०२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT