विरोधमा प्रदर्शन, ६ जनाको मृत्यु

चुनाव परिणामपछि प्रदर्शनमा उत्रेका प्रदर्शनकारी र सुरक्षाकर्मीबीच झडपमा ६ जनाको मृत्यु भएको हो । दुई सयभन्दा बढी घाइते भएका छन् । मंगलबार रातिबाट सुरु झडप पाँच घण्टासम्म जारी रहेको थियो ।

इन्डोनेसियामा जोको विडोडो पुनः राष्ट्रपति पदमा निर्वाचित भएका छन् । जाकार्ता सहरमा कडा सुरक्षाबीच अप्रत्याशित रूपमा निर्वाचन परिणाम घोषणा भएपछि राष्ट्रपति विडोडोको निकटतम प्रतिद्वन्द्वी पूर्वसैनिक जनरल प्रबोवो सुविआन्तोका समर्थकले निर्वाचनमा धाँधली भएको दाबी गर्दै प्रदर्शन थालेका हुन् ।

सत्तासीन राष्ट्रपति विडोडोले ५५.५ प्रतिशत मत प्राप्त गरेको निर्वाचन आयोगले जनाएपछि विरोधमा प्रदर्शन भएको हो । उनका निकटतम प्रतिद्वन्द्वी पूर्वसैनिक जनरल प्रबोवो सुविआन्तोले ४४.५ प्रतिशत मत प्राप्त गरेका छन् ।

इन्डोनेसियाका ३४ वटा प्रान्तका १ सय ३० सहरमा मतगणना गरिएको आयोगले जनाएको छ । सन् २०१४ मा पनि विडोडोले ५३.१५ प्रतिशत मत प्राप्त गरेका थिए । उनको निकटतम प्रतिद्वन्द्वी प्रबिवो सुबिआन्तोले ४६.८६ प्रतिशत मत पाएका थिए ।

निर्वाचनको परिणाम बाहिरिएपछि प्रबोवोले निर्वाचन आयोगको औपचारिक कागजातमा हस्ताक्षर गर्न मानेनन् । उनले पाँच प्रान्तमा फेरि निर्वाचन गराउनुपर्ने बताएका छन् । उनले भने, ‘यी प्रान्तहरूमा धाँधली भएका छन् ।’