दस नेता प्रतिस्पर्धामा

बेलायती प्रधानमन्त्री चयन प्रक्रिया
एजेन्सी

लन्डन — बेलायती प्रधानमन्त्री टेरेजा मेले गतसाता राजीनामा दिएसँगै सुरु सत्तारूढ दलको नेतृत्वका लागि १० नेता प्रतिस्पर्धामा उत्रिएका छन्  । प्रतिस्पर्धाको अन्तिम सूचीमा रहेकामा जेरेमी हन्ट, डोमिनिक राब, म्याट हानकक र माइकल गोभ छन्  ।

अन्य प्रतिस्पर्धीमा मार्क हार्पर, साजिद जाभिद, बोरिस जोन्सन, एन्ड्रिया लिडसम, इस्थर म्याकभी, रोरी स्टेवार्ट छन् । प्रतिस्पर्धीमध्ये अगाडी देखिएका जोन्सनले आगामी अक्टोबर ३१ भित्र बेलायतलाई युरोपेली संघबाट कुनैपनि हालतमा अलग गर्ने प्रतिवद्धता व्यक्र गरेका छन् ।

हालैको बेलायत भ्रमणका क्रममा अमेरिकी राष्ट्रपति डोनाल्ड ट्रम्पले पनि उनी टोरी नेताका लागि उत्तम विकल्प भएको भन्दै प्रशंसा गरेका थिए । जोन्सन बेलायती पूर्व विदेशमन्त्री हुन् । त्यसैगरी आप्रवसी तथा अन्तर्राष्ट्रिय विद्यार्थीको पक्षमा केही लचिलो देखिएका गृहमन्त्री जाभिद पनि बलियो उम्मेदवार ठानिएका छन् ।

प्रधानमन्त्री टेरेजा मेले जुन ७ मा राजीनामा दिएपछि कन्जरभेटिभ दल (टोरी) नेताका लागि दौड सुरु भएको हो । संसद्मा बहुमत भएकाले उक्त दलको नेता नै आगमी प्रधानमन्त्री हुने निश्चित छ । कन्जरभेटिभ दलले जुलाई महिनाको अन्त्यसम्म दलको नेता चयन भइसक्ने जनाइसकेको छ । पार्टीको १९२२ कमिटीले दलको नेतृत्वका लागि इच्छुक नेताले मंगलबारसम्म नाम दर्ताका लागि समय दिएको थियो ।

प्रतिस्पर्धामा रहेका नेतामध्ये पार्टीका ३ सय १३ मध्ये बहुमत सांसदको समर्थन जुटाउने नेता अन्तिम प्रतिस्पर्धामा चुनिन्छन् । तीमध्ये एकलाई कन्जरभेटिभका सदस्यले मतदानमार्फत दलको नेता चयन गर्ने प्रावधान छ । कन्जरभेटिभ दलका देशभर १ लाख २४ हजार सदस्य छन् ।

दलद्वारा सार्वजनिक कार्यक्रमअनुसार जुन १३ गते प्रथम चरणको मतदान हुने छ । त्यसैगरी, १८ देखि २० जुनभित्र अन्तिम दुई प्रतिस्पर्धीको नाम सार्वजनिक गरिने छ । त्यसैगरी जुन २२ देखि पार्टीमा मतदान सुरु हुने र जुलाई २२ मा टोरी नेताको घोषणा गरिने जनाइएको छ ।

प्रधानमन्त्री मेले आफ्नै मन्त्रिपरिषदका सदस्य तथा दलका सांसदको विरोधपछि जुन ७ मा राजीनामा दिएकी हुन् । त्यसयता उनी बेलायतको कामचलाउन प्रधानमन्त्री छन् । युरोपेली संघबाट बेलायतको बहिर्गमन (ब्रेक्जिट) बारे मेले गतवर्ष पेस गरेको सम्झौता बेलायती संसदले ३ पटक अस्वीकार गरेपछि उनी पद छाड्न बाध्य भएकी हुन् । बेलायतमा सन् २०१६ मा भएको जनमतसंग्रहमा ब्रेक्जिटको पक्षमा बहुमत आएको थियो ।

प्रकाशित : जेष्ठ २९, २०७६ १०:२२
ADVERTISEMENT
ADVERTISEMENT
प्रतिक्रिया
पठाउनुहोस्

हङकङमा सुपुर्दगी विधेयकको विरोध –'विदेशी शक्तिको हात’

एजेन्सी

हङकङ — चीनले हङकङमा प्रस्तावित सुपुर्दगीसम्बन्धी कानुनको विरोधमा आइतबार गरिएको प्रदर्शनमा विदेशी शक्तिको हात रहेको दाबी गरेको छ । चिनियाँ सरकारी सञ्चारमाध्यमले विदेशी शक्तिले चीनमाथि प्रहार गर्न हङकङमा विध्वंश निम्त्याउने प्रयास गरेको दाबी गरेको छ । 

सुपुर्दगी विधेयकको विरोधमा सोमबार बिहान हङकङमा गरिएको प्रदर्शनमाथि हस्तक्षेप गर्दै प्रहरी । तस्बिर : एपी

चिनियाँ भाषाको सरकारी अखबार ‘ग्लोबल टाइम्स’ ले लेखेको छ, ‘यो निश्चित छ कि केही अन्तर्राष्ट्रिय शक्तिले पछिल्ला महिनामा हङकङसँगको अन्तरक्रिया बढाउँदै लगेका छन् ।’ अखबारको सम्पादकीयमा हङकङका विपक्षी नेता र अमेरिकी विदेशमन्त्री माइक पोम्पियो तथा सभामुख नान्सी पेलोसीबीचको भेटवार्तालाई समेत उल्लेख गरिएको छ । त्यसैगरी अंग्रेजी भाषाको अखबार ‘चाइना डेली’ ले पनि कानुनको समर्थन गरेको छ ।

प्रस्तावित कानुनअनुसार चीनले हङकङस्थित राजनीतिक विपक्षीलाई निसाना बनाउने भन्दै सर्वसाधारणहरू विरोधमा उत्रेका हुन् । प्रदर्शनमा व्यवसायी, कानुनका विद्यार्थी, धार्मिक समूह र प्रजातन्त्र पक्षधरहरूको सहभागिता थियो । सहरका कतिपय स्थानमा सोमबार बिहानैदेखि नै विरोध प्रदर्शन जारी छ । प्रदर्शनकारीलाई भगाउन प्रहरीले पानीको फोहोरा प्रयोग गरेको समाचार संस्था एएफपीले जनाएको छ । कतिपय प्रदर्शनकारीलाई प्रहरीले लछारपछार पारेको सामाजिक सञ्जालमा सार्वजनिक तस्बिर तथा दृश्यहरूमा देखिएको छ ।

हङकङकी प्रमुख कार्यकारी क्यारी लामले विरोधका बाबजुद सुपुर्दगी विधेयक फिर्ता नहुने बताएकी छन् । संवाददाताहरूसँग सोमबार कुराकानी गर्दै लामले ‘देशको आवश्यकताअनुसार नै कानुन ल्याइएको’ दाबी गरिन् । उनले हङकङमा मानवाधिकार रक्षा हुनेमा कसैले शंका गर्नु नपर्ने बताइन् ।

आइतबार सेतो पोसाकमा सडकमा उत्रेका लाखौं मानिस घण्टौं लामो प्रदर्शनमा उत्रेका थिए । विरोधका क्रममा प्रहरी र प्रदशर्नकारीबीच हिंसात्मक झडप हुँदा दर्जनौं घाइते भए ।

मुकुन्डो लगाएका कतिपय प्रदर्शनकारी प्रहरीले खडा गरेको अवरोध पन्छाएर विधान परिषदको भवनमा प्रवेश गर्न खोजेपछि झडप भएको हो । बीबीसीका अनुसार झडपका क्रममा एक पत्रकारसहित ३ अधिकारी घाइते छन् । हङकङका प्रहरी प्रमुखले ‘शान्तिपूर्ण प्रदर्शन हुने देशको परम्परा तोडिएको’ दाबी गरे ।

हङकङको स्वतन्त्रतापछिकै ठूलो मानिएको प्रदर्शनमा १० लाख सहभागी भएको आयोजकको दाबी छ । तर प्रहरीले २ लाख ४० हजार सहभागी भएको दाबी गरेका छ । आयोजकहरूले बुधबार फेरि अर्को विरोध प्रदर्शन गरिने जनाएका छन् । सुपुर्दगीसम्बन्धी प्रस्तावित कानुनको प्रावधानअनुसार हङकङमा अपराध तथा बलात्कारमा आरोपीलाई चीन, ताइवान र मकाउका अधिकारीले सुपुर्दगीका लागि आग्रह गर्न सक्छन् । तर सुपुर्दगी गर्ने/नगर्ने घटनाको प्रकृतिका आधारमा निर्णय लिइने जनाइएको छ ।

हङकङका १९ वर्षीय युवाले गर्भवती प्रेमिकाको ताइवानमा हत्या गरी देश फर्केपछि सुपुर्दगी कानुनबारे बहस सुरु भएको हो । ताइवानी अधिकारीले ती युवकलाई सुम्पन हङकङसँग आग्रह गरे पनि कानुनी जटिलता देखिएको थियो । सन् १९९७ मा बेलायतबाट स्वतन्त्र भएयाता हङकङ ‘एक देश दुई व्यवस्था’ अन्तर्गत अर्ध–शासित छ ।

प्रकाशित : जेष्ठ २८, २०७६ ०९:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT