मलेसियामा गैरकानुनी आप्रवासीविरुद्ध कडा नीति 

देशव्यापी धरपकड गर्नेदेखि व्यवस्थापनसम्मका योजना
कान्तिपुर संवाददाता

(क्वालालम्पुर) — मलेसियाले गैरकानुनी अवस्थामा रहेका आप्रवासी हटाउन पञ्चवर्षीय योजनासहितको विस्तृत कार्यक्रम ल्याउने भएको छ । गैरकानुनी आप्रवासीविरुद्ध यसअघिका सरकारी कार्यप्रणालीमा सुधार गर्दै विभिन्न योजनासहितका कार्यक्रम ल्याउने लागेको गृहमन्त्री मुहिद्दिन यासिनले एक वक्तव्यमा उल्लेख गरेका छन् ।

उनका अनुसार सम्बन्धित विभिन्न मन्त्रालय र निकायसँगको रणनीतिक सहकार्यमा देशको गैरकानुनी आप्रवासी समस्या हल गर्न उक्त योजना ल्याउन लागिएको हो । यसमा प्रदेश सरकारको भूमिका, स्थानीय प्रशासन, ंस्थानीय सामुदाय एवं सुरक्षा समितिलगायतसँग सहकार्य गरिने जनाइएको छ ।

‘स्थानीय समुदाय एवं निकायहरुसँगको सहकार्यका माध्यमबाट सम्बद्ध निकाय र प्रशासनलाई थप जिम्मेवार एवं प्रभावकारी बनाई गैरकानुनी आप्रवासीहरु बसिरहने अवस्था हुन नदिनु यसको उद्देश्य हो,’ उनले आइतबार जारी एक प्रेस वक्तव्यमा भनेका छन् ।

कार्ययोजना ५ वर्षसम्म चरणबद्ध रूपमा लागू गरिने यासिनले जनाए । उनका अुनसार ‘गैरकानुनी आप्रवासीविरुद्ध देशव्यापी धरपकड, कारबाही कार्यान्वयन, नीतिगत एवं कानुनी सुधार, सीमा सुरक्षा, विदेशीको व्यवस्थापन र प्रचारप्रसार एवं जनचेतनामूलक कार्ययोजना’ ल्याउन लागिएको हो ।

मलेसियाले यसअघि गैरकानुनी आप्रवासी कामदारका लागि आममाफी, स्वेच्छिक घरफिर्ती, पुनः रोजगारी अर्थात् ‘रिहाइरिङ’ लगायत आधा दर्जनभन्दा बढी लाभदायक कार्यक्रम सञ्चालन गरिसकेको छ । ती कार्यक्रमको सदुपयोग गर्दै लाखौं आप्रवासी कामदार स्वदेश फर्के पनि अझै कैयौं गैरकानुनी आप्रवासी रहेका अनुमान छ ।

मलेसियामा गैरकानुनी आप्रवासी देशको प्रमुख समस्यामध्येको एक हो । पछिल्ला वर्ष गैरकानुनी आप्रवासीप्रति कठोर बन्दै आएको मलेसिया सरकारले आप्रवासीका लागि अझै कडाइ गर्ने देखिन्छ । उसले त्यस्ता अवस्थामा रहेका आप्रवासीविरुद्ध मुलुकभर धरपकड अभियान सञ्चालन गर्दै आएको छ ।

सरकारी तथ्यांकअनुसार यस वर्षको जनवरीयता गैरकानुनी आप्रवासीविरुद्ध ७ हजार ९ सय ४० धरपकड अभियान सञ्चालन गरिसकिएको छ भने २३ हजार २ सय ९५ पक्राउ परिसकेका छन् । साथै २६ हजार १ सय १६ लाई उनीहरुकै देश फिर्ता पठाइएको जनाइएको छ । तीमध्ये हजारौं नेपाली छन् । अधिकारीहरुले दोषी आप्रवासी कामदार र उनीहरुलाई रोजगारी दिने रोजगारदाता दुवैलाई कडा कारबाही हुने चेतावनी दिँदै धरपकड अभियान निरन्तर सञ्चालन गर्दै आएका छन् ।

प्रकाशित : जेष्ठ ३२, २०७६ १९:१७
प्रतिक्रिया
पठाउनुहोस्

बेलायतको वित्तीय अवस्था पुस्तकमा 

कान्तिपुर संवाददाता

काठमाडौँ — विश्व अर्थतन्त्रको शक्तिशाली केन्द्र बेलायत खासगरी विभिन्न समयमा ठूल्ठूला उतारचढाबको साक्षी बनेको छ । सन् २००८ को विश्वव्यापी आर्थिक मन्दी होस् वा पछिल्लो समयको ब्रेक्जिट गतिरोध नै किन नहोस् बेलायती अर्थतन्त्रले विभिन्न चुनौतीको सामना गर्दै आइरहेको छ ।

१९ औं शताब्दीको औद्योगिक क्रान्तियता निरन्तर विकासको गति समातेको अर्थतन्त्र दोस्रो विश्वयुद्धका कारण केही शिथिल भयो । तर सन् १९७० को दशकमा प्रधानमन्त्री मार्गरेट थ्याचरको निजीकरण नीतिसँगै पुन: जुर्मुराएको बेलायत त्यसयता विभिन्न सामग्री उत्पादन, कृषि, प्राकृतिक स्रोत, वित्त व्यवस्थापन लगायत विषयमा केन्द्रित छ ।

बेलायतले कसरी आफ्नो अर्थतन्त्रलाई स्थिर राख्न सफल रह्यो भन्ने कुरा पक्कै पनि नेपालले पनि सिक्न सक्छ । यही सेरोफेरोमा बेलायतमा लामो समयदेखि बसोबासरत अर्थ व्यवस्थापनका जानकार विकलचन्द्र आचार्यको पुस्तक ‘बेलायतको वित्तीय अवलोकन’ शुक्रबार सार्वजनिक गरिएको छ । पुस्तकमा बेलायतको वित्तीय सामर्थ, बैंकिङ इतिहास, बैंकको संरचना तथा कार्यविधि, पाउन्ड स्टर्लिङको अवस्था, सम्पत्ति शुद्धिकरण, बिमा, ब्रेक्जिट, औद्योगिक क्रान्तिको शिक्षा, लन्डन स्टक मार्केट लगायत वित्तीय क्षेत्रका विविध विषय समाबेश छन् ।
राजधानीमा आयोजित एक कार्यक्रममा राष्ट्रिय योजना आयोगका पूर्वअध्यक्ष एवं पूर्वगभर्नर दीपेन्द्रबहादुर क्षेत्रीले पुस्तकको बिमोचन गरे । बेलायतको वित्तीय अवधारणा समेटेर लेखिए पनि नेपाली सन्दर्भ जोडिएकाले पुस्तक निकै उपयोगी रहेको क्षेत्रीले बताए । ‘पुस्तक धेरै नै उपयोगी र सूचनामूलक छ,’ उनले भने, ‘देश बाहिर बसेर पनि मातृभूमिलाई यत्तिको योगदान दिन सक्नु ठूलो कुरा हो ।’

राष्ट्र बैंकका पूर्वकार्यकारी निर्देशक नरबहादुर थापा र सानिमा बैंकका प्रमुख कार्यकारी अधिकृत भुवन दाहालले पुस्तकमाथि टिप्पणी गरेका थिए । बेलायतको वित्तीय परिवेशबाट नेपालले नीतिगत रुपमा धैरै कुरा सिक्न सक्ने देखिन्छ । विश्वको एक शक्तिशाली वित्तीय केन्द्र बारेको वास्तविक परिवेश बुझ्न पुस्तकले सहयोग पुर्‍याउँछ । बेलायतको वित्तीय क्षेत्रले संसारभरि प्रभाव पार्ने गरेकोले राजधानी लन्डन आर्थिक केन्द्र रहिआएको छ । बेलायतमा मात्रै दिनमा औसत करिब २ दशमलब ७३ ट्रिलियन (२०७३ अर्ब) डलर बराबरको विदेशी विनिमयको कारोबार हुने गर्छ, जुन कुल विश्व कारोबारको ४० दशमलब ९ प्रतिशत हो । अमेरिकाको डाओ जोन्स र नस्डाक पछि लन्डन स्टक मार्केट आउँछ ।
बेलायतको प्रतिष्ठित प्राइभेट स्कुल आर्डिङलाए कलेजमा छात्र वृत्ति पाएर वि.सं. २०५० मा बेलायत पुगेका लेखक शिक्षा, साहित्य तथा स्वास्थ्य क्षेत्रमा कलम चलाउँदै आएका छन् । यसअघि आचार्यका लन्डनमा मुटु दुख्दा, कोरोनरी मुटुरोग, बेलायती आँगनमा गोर्खाली सुवास र मोह गरी चार कृति प्रकाशित भइसकेका छन् । व्यवस्थापन विषयबारे लामो अनुभव संगालेका लेखक ब्रिटिस मेडिकल जर्नालिष्ट एशोसिएसनका सदस्यसमेत हुन् ।

प्रकाशित : जेष्ठ ३२, २०७६ १९:०२
पूरा पढ्नुहोस्
प्रतिक्रिया
पठाउनुहोस्