अमेरिकाका लागि बेलायती राजदूत भन्छन् - ट्रम्प प्रशासन अक्षम र असुरक्षित

एजेन्सी

वासिङटन — अमेरिकाका लागि बेलायती राजदूतले अमेरिकी राष्ट्रपति डोनाल्ड ट्रम्प प्रशासन ‘अक्षम, असुरक्षित र अयोग्य’ भएको बताएका इमेलहरू सार्वजनिक भएका छन् । सर किम डारोकले विदेश मन्त्रालयलाई लेखेका इमेलमा ट्रम्प नेतृत्वको ह्वाइटहाउस ‘अद्वितीय रूपमा बेकामे र विभाजित’ भएको दाबी गरेका छन् तर उनले अमेरिकी राष्ट्रपतिलाई बेवास्ता गर्न नहुने पनि चेतावनी दिएका छन् ।

राजदूत डारोकले लेखेका इमेलहरू बेलायती अखबार मेलले सार्वजनिक गरेको हो। बेलायती विदेश मन्त्रालयले आइतबार ‘त्यसरी इमेल चुहाएर अखबारले बदमासीपूर्ण कार्य गरेको’ जनाएको छ। यद्यपि विदेश मन्त्रालयले राजदूतको भनाइ असत्य रहको दाबी गरेको छैन।

अमेरिकी राष्ट्रपति कार्यालय तथा विदेश मन्त्रालयले भने हालसम्म बेलायती राजदूतका इमेलबारे केही प्रतिक्रिया जनाइसकेको छैन तर पछिल्लो घटनाले दुई देशबीचको विशेष सम्बन्धमा केही कटुता पैदा गर्न सक्ने ठानिएको छ।

मेल अखबारले सार्वजनिक गरेका इमेलमा डारोकले ट्रम्प प्रशासन सक्षम हुने सम्भावनामा शंका व्यक्त गरेका छन्। डारोकले इमेलमा लेखेका छन्, ‘ट्रम्प प्रशासन बिस्तारै सामान्य, कम बेकामे, कम अप्रत्याशित, कम विभाजित र कम
अक्षम हुने हामीलाई कुनै विश्वास छैन।’

डारोकले ‘गत जुनमा बेलायतको राजकीय भ्रमण गरेपछि ट्रम्प निकै खुसी भए पनि उनी अझै अमेरिका फस्ट नीतिको स्वार्थपूर्तिमा रहेको’ दाबी गरे। मेल अखबारद्वारा सार्वजनिक इमेलहरूमा अमेरिका र बेलायतबीच जलवायु परिवर्तन, प्रेस स्वतन्त्रता र मृत्युदण्डका विषयमा विवाद उत्पन्न हुन सक्ने उल्लेख गरिएको छ।

डारोकले अमेरिकी राष्ट्रपति ट्रम्पलाई कुनै पनि विषयबारे प्रस्ट कुरा बुझाउन आफ्ना कुरा साधारण र सिधा तरिकाले राख्नुपर्ने सुझावसमेत दिएका छन्। डारोकले गत महिना लेखेको एक इमेलमा अमेरिकाको इरान नीति ‘अराजक’ भएको दाबीसमेत गरेका छन्। ‘१ सय ५० जनाको ज्यान जाने भएकाले १० मिनेटअगाडि इरानमाथि आक्रमण रोकेको’ ट्रम्पको भनाइ हावादारी भएको डारोकको भनाइ छ।

बेलायतस्थित ब्रेक्जिट पार्टी प्रमुख निगेल फराजले ‘राजदूत डारोक पदका लागि पूर्ण रूपमा अयोग्य भएको’ भन्दै आलोचना गरेका छन्। न्यायमन्त्री डेभिड गुआकले ‘देशलाई इमानदार र पारदर्शी सल्लाह दिनु राजदूतका लागि निकै महत्त्वपूर्ण’ भएको बताएका छन्।

डारोकले ह्वाइटहाउसमा विद्यमान विभाजन बारेका समाचारलाई स्पष्ट रूपमा सम्प्रेषण गरेको देखिन्छ। विदेश मन्त्रालयका एक प्रवक्ताले ‘कूटनीतिज्ञलाई आफूले हेरेको देशको राजनीतिबारे स्पष्ट र इमानदार विचार मन्त्रीलाई दिन प्रोत्साहन गरिने’ भन्दै डारोकको बचाउ गरेका छन्। उनले भनेका छन्,‘राजदूतहरूको विचार मन्त्री वा सरकारको विचार होइन। हामी उनीहरूलाई स्पष्ट सूचना दिन तलब दिन्छौं।’

प्रकाशित : असार २२, २०७६ २०:१८
प्रतिक्रिया
पठाउनुहोस्

क्यालिफोर्नियामा २० वर्षयताकै शक्तिशाली भूकम्प

एजेन्सी

क्यालिफोर्निया — अमेरिकाको क्यालिफोर्निया राज्यमा दुई दशकयताकै शक्तिशाली भूकम्प गएको छ । अधिकारीहरुले क्यालिफोर्नियाको रिजक्रेस्ट केन्द्रबिन्दु रहेको ६.४ म्याग्निच्यूडको भूकम्प गएको बताएका छन् । रिजक्रेस्ट लस एन्जलसबाट २ सय ४० किलोमिटर उत्तरपूर्वमा पर्छ । अमेरिकी भौगर्भिक संस्था (युएसजिएस) का अनुसार करिब भूकम्पको केन्द्रबिन्दु जमिनबाट ६.६८ किलोमिटर तर रहेको जनाएको छ । 

भूकम्पबाट क्यालिफोर्नियाका विभिन्न स्थानमा भौतिक क्षति पुगेको जनाइएको छ। अधिकारीहरूले भूकम्पबाट भएको क्षतिको पुर्णविवरण संकलन भइनसकेको जनाएका छन्। यद्यपि, मानवीय क्षतिबारे केही जानकारी प्राप्त नभएको प्रहरीको भनाइ छ।

अमेरिकी सञ्चारमाध्यमहरुले नै भौतिक या मानवीय क्षतिको बारेमा कुनै जानकारी प्राप्त नभएको जनाएका छन्। भूकम्प सन् १९९९ पछि क्यालिफोर्नियामा गएको सबैभन्दा शक्तिशाली भएको बताइएको छ।

भूकम्पले क्यालिफोर्नियाको दक्षिणी भेगमा बढी क्षति भएको जनाइएको छ। क्यालिफोर्नियाको छिमेकी राज्य नेभादाको लस भेगासमा पनि भूकम्पको धक्का महसुश गरिएको बताइएको छ। भूकम्पपछि केही स्थानमा आगलागी भएको अधिकारीहरुले जनाएका छन्। तर ठूलो संख्याका उद्वारकर्मीहरु परिचानल गरिएको अधिकारीहरुले जनाएका छन्।

प्रारम्भिक सूचनामा केही नागरिक घाइते भएका र उनीहरुलाई उद्धार गरेर अस्पतालसम्म पुर्‍याइएको जनाइएको छ। भूकम्पको केन्द्रविन्दु रहेको रिजक्रेस्ट बाक्लो बस्ती रहेको क्षेत्रबाट टाढा रहेकाले कम क्षति भएको अधिकारीको भनाई छ। क्यालिफोर्नियाको आपतकालीन कार्यालयले भूकम्प र आगलागीपछि खोज तथा उद्धारको कार्य जारी रहेको बताएको छ।

अमेरिकी राष्ट्रपति डोनाल्ड ट्रम्पले भूकम्पलगत्तै ट्वीट गर्दै राहत तथा उद्धार कार्य जारी रहेको जनाएका छन्। भौगर्भिक अधिकारीका अनुसार भूकम्पपछि निरन्तर रूपमा पराकम्प गइरहेका छन्।

प्रकाशित : असार २०, २०७६ २०:१०
पूरा पढ्नुहोस्
प्रतिक्रिया
पठाउनुहोस्