ह्वाइटहाउसमा बाढी !

कान्तिपुर संवाददाता

(न्युयोर्क) — लगातार दुई घण्टाको मुसलधारे वर्षापछि वासिङटन डिसी क्षेत्र बाढीको चपेटामा परेको छ । सोमबार बिहानको वर्षा र हावाहुरीले धेरै भूभाग प्रभावित भएका छन् । वासिङटन डिसीस्थित हृवाइटहाउसमा समेत बाढी पसेको छ ।

अधिकारीहरुका अनुसार वासिङटन डिसी क्षेत्रमा ३.४४ इन्च वर्षाको पानी जमेको छ । सन् १९५८ पछिको यो बढी हो । उक्त वर्ष वासिङटन डिसी क्षेत्रमा २.१६ इन्च पानी जमेको थियो ।

सोमबारको वर्षा र हावाहुरीबारे मौसम विभागले समेत भविष्यवाणी गर्न सकेनन् । मौसम विभागले यो अवस्था आउन सक्ने सम्भावना १ प्रतिशत मात्रै रहेको जनाएको थियो । अविरल वर्षापछिको बाढीले वासिङटन डिसी क्षेत्रका सडकहरु जलमग्न भएका छन् । सहरका मेट्रो ट्रेन स्टेसनमा समेत पानी पसेको छ । दुईवटा अन्डर ग्राउन्ड ट्रेन स्टेसनमा पानीको भेल पसेको थियो ।

विशेष त मोन्टेगोमेरी काउन्टी, नर्दन फेयरफक्स काउन्टी र आर्लिङटन काउन्टी वर्षा र हुरीले अत्यधिक प्रभावित भएका छन् । एनबीसी समाचारका अनुसार अमेरिकी राष्ट्रपति कार्यालय र निवास हृवाइटहाउसको बेसमेन्टमा समेत पानी पसेको छ । जसकारण कर्मचारीहरुले पानीमा तैरिने भेस्ट लगाएर काम गरेका थिए । आर्लिङटनस्थित एक मलको पार्किग लटमा पानी पसेर बिजोग भएको समाचारमा उल्लेख छ । बाढी र हावाहुरीले डिसीका केही क्षेत्रमा विद्युत् आपूर्तिसमेत अवरुद्ध भएको छ ।

रोनाल्ड रेगन नेसनल एयरपोर्टमा ३.४४ इन्चसम्म वर्षाको पानी जमेको मापन गरिएको छ । डिसी एरियामा वर्षाले सडक जलमग्न भएपछि सवारीसधानहरु घण्टौं जाम परे । सर्वसाधारणको भागभागको स्थिति थियो । धेरैलाई पानी जमेको स्थानबाट गाडीबाट उद्धार गरिएको थियो । आधा घण्टामै सडकमा १० इन्चसम्मको पानी जम्मा भएपछि सडकमा पानीले सानोतिनो नदीकै रूप लिएको थियो । डिसी मेट्रो क्षेत्रको भर्जिनिया, मेरिल्यान्डमा समेत वर्षाले आएको बाढीबाट नराम्ररी प्रभावित भएका छन् ।

यसैबीच, अमेरिकी अधिकारीहरुले हृवाइटहाउसमा रहेका ऐतिहासिक अभिलेख, दस्तावेज, घोषणापत्र, संविधानलगायतका दस्तावेजहरू सुरक्षित रहेको जनाएका छन् ।



प्रकाशित : असार २४, २०७६ २१:२०
प्रतिक्रिया
पठाउनुहोस्

विषादी परीक्षण अनिवार्य गर : चिकित्सक

विषादीका कारण बाँझोपना, स्मरणशक्तिमा ह्रास, क्यान्सरलगायत स्वास्थ्य समस्या बढेको चिकित्सकको भनाइ 
अतुल मिश्र

काठमाडौँ — चिकित्सक संघ र नेपाल भेटनरी एसोसिएसनले भन्सार नाकामा क्वारेन्टाइन र जीवनाशक विषादी परीक्षण गरेर मात्र तरकारी र फलफूल भित्र्याउन माग गरेका छन् । दुई संस्थाले मंगलबार विज्ञप्ति जारी गर्दै विषादीको अत्यधिक उपभोगले मुलुकमा बाँझोपना, स्मरणशक्तिमा ह्रासलगायत विभिन्न स्वास्थ्य समस्या बढदै गएको औंल्याएका छन् । 

कालीमाटी तरकारी बजार ।

भेटनरी एसोसिएसनका अध्यक्ष एवं ‘भेटनरी टक्सिकोलजी’ विज्ञ डा. शीतलकाजी श्रेष्ठले तरकारी र फलफूल विषादीरहित पुष्टि नभएसम्म मुलुकमा भित्रिन दिन नहुनेमा जोड दिए । ‘तरकारी आउने मुलुकको सरकारले जारी गरेको ‘फाइटो स्यानेटरी सर्टिफिकेट’ नेपालले खोजेको ढाँचामा हुनुपर्छ,’ उनले भने, ‘शंका लागे मुलुकभित्रसमेत जाँच्नुपर्छ ।’ श्रेष्ठले नेपालले क्वारेन्टाइन मापदण्ड पूरा गर्न पाउने बताए ।

एसोसिएसनका अनुसार विषादी परीक्षणले स्वदेशी कृषकलाई समेत कृषि उत्पादन अभिवृद्धि गर्न र प्रतिस्पर्धी बनाउन सहयोग पुग्नेछ । सीमा क्षेत्रका क्वारेन्टाइन कार्यालय तथा चेकपोस्टको संस्थागत क्षमता अभिवृद्धि गरी कडाइसाथ नियमन गर्न पनि एसोसिएसनले जोड दिएको छ ।

स्वदेशी कृषक, विषादी प्रयोगकर्तालाई समेत कुन बालीमा कहिले, कति पटक, कुन मात्रामा प्रयोग गर्नेबारे आधारभूत ज्ञान हुनुपर्ने एसोसिएसनले जनाएको छ । ‘हाम्रा किसानले सहजै विषादी पाउने परिपाटीसमेत अन्त्य हुनुपर्छ,’ डा. श्रेष्ठले भने, ‘सम्बन्धित विज्ञ, प्राविधिक वा जिल्लास्थित सरकारी निकायका अधिकृतले सिफारिस गरेका आधारमा मात्र विषादी उपलब्ध गराउनुपर्छ ।’

विज्ञका अनुसार हालसम्म मुलुकमा विषादी नष्ट गर्ने प्रविधि छैन । म्याद नाघेका विषादी पुनः उत्पादक मुलुकमै फर्काउनुपर्ने कानुनी व्यवस्था गर्नुपर्ने श्रेष्ठले बताए । मुलुकमा कति विषादी छ भन्ने यकिन तथ्यांक पनि सरकारसँग छैन । ‘जनस्वास्थ्य संरक्षण, स्वच्छ व्यापार र स्थानीय कृषि उपजको प्रवर्द्धनमा सहयोग पुग्ने महत्त्वपूर्ण निर्णयबाट सरकार पछि हट्नु आपत्तिजनक छ,’ श्रेष्ठले भने, ‘जतिसक्दो चाँडो आवश्यक तयारी पूरा गरी पूर्वनिर्णय कार्यान्वयन गर्नुपर्छ ।’

चिकित्सक संघले तरकारी र फलफूलमा विषादी परीक्षण प्रभावकारी रूपमा गर्नुपर्नेमा जोड दिएको छ । जनस्वास्थ्य सेवा ऐन २०७५ को दफा ३९ मा उपभोग्य वस्तुको उत्पादन, भण्डारण तथा बिक्रीवितरणलाई गुणस्तरीय र स्वस्थ बनाइने उल्लेख छ ।

चिकित्सकका अनुसार विषादीयुक्त फलफूल, तरकारी सेवनले मानव शरीरमा अल्पकालीन र दीर्घकालीन समस्या देखा पर्न सक्छन् । मानसिक असन्तुलन, श्वासप्रश्वासमा समस्या, झाडापखाला, पिसाबमा समस्या, छालामा संक्रमण तत्काल देखा पर्न सक्छन् ।

दीर्घकालीन रूपमा मुटु, कलेजो, मृगौलामा गम्भीर असर पार्नुका साथै क्यान्सरजस्ता प्राणघातक रोग निम्त्याउन सक्छ । बाँझोपनलगायत प्रजनन स्वास्थ्यसम्बन्धी समस्या पनि विषादीले निम्त्याउन सक्ने चिकित्सक बताउँछन् ।

प्रकाशित : असार २४, २०७६ २१:०६
पूरा पढ्नुहोस्
प्रतिक्रिया
पठाउनुहोस्