फेसबुकलाई ५ अर्ब डलर जरिवाना 

तथ्यांक दुरूपयोग मुद्दा
एजेन्सी

वासिङटन — प्रयोगकर्ताका तथ्यांकको गोपनीयता कायम राख्न नसकेको मुद्दामा फेसबुकलाई ५ अर्ब अमेरिकी डलर (साढे ५ खर्ब नेपाली रुपैयाँ) जरिवाना हुने भएको छ । अमेरिकी अखबारहरूका अनुसार फेसबुकलाई जरिवाना स्वरूप उक्त रकम तिराउन अमेरिकी नियामक निकायले अनुमति दिएको छ । 

फेसबुक प्रयोगकर्ताको तथ्यांकमाथि अनधिकृत पहुँच पुर्‍याएको मुद्दामा फेडरल ट्रेड कमिसन (एफटीसी) ले अनुसन्धान गरिरहेको छ । बेलायतस्थित राजनीतिक परामर्शदाता कम्पनी क्याम्ब्रिज एनालिटिकाले फेसबुकका ८ करोड ७० लाख प्रयोगकर्ताका तथ्यांकको दुरूपयोग गरेको जनाइएको छ ।

उक्त मुद्दाबारे एफटीसीमा भएको मतदानमा ३ मत फेसबुकलाई जरिवाना गर्ने पक्षमा परेको हो । २ मत विपक्षमा परेको अमेरिकी सञ्चारमाध्यमले जनाएका छन् । बीबीसीका अनुसार फेसबुक र एफटीसी दुवैले समाचारबारे टिप्पणी गर्न अस्वीकार गरेका छन् ।

क्याम्ब्रिज एनाललिटिका मुद्दाबारे एफटीसीले सन् २०१८ को मार्चमा अनुसन्धान सुरु गरेको थियो । अधिकारीका अनुसार अनुसन्धान फेसबुकले सन् २०११ को सहमति भंग गरे/नगरेकोमा केन्द्रित थियो । उक्त सहमतिअनुसार फेसबुकले अरूलाई तथ्यांक दिँदा प्रयोगकर्ताको सहमति लिनुपर्ने छ ।

एफटीसीका सत्तारूढ रिपब्लिकन समर्थकहरू फेसबुकलाई ५ अर्ब डलर जरिवाना लगाउनुपर्ने पक्षमा उत्रेका हुन् । डेमोक्र्याटहरू पक्षधर भने जरिवानाको विपक्षमा उभिएका ‘द वाल स्ट्रिट जर्नल’ ले उल्लेख गरेको छ ।

फेसबुकलाई जरिवाना रकम तिराउनुअघि न्याय मन्त्रालयको स्वीकृत आवश्यक पर्ने छ । त्यसका लागि लाग्ने कति समय लाग्छ भन्नेबारे केही उल्लेख गरिएको छैन् । स्वीकृत भएको खण्डमा कुनै प्रविधि कम्पनीमाथि एफटीसीले लगाएको यो सबैभन्दा ठूलो जरिवाना हुने छ । तर केही डेमोक्र्याट सांसदहरूले फेसबुकमाथिको जरिवाना रकम निकै थोरै भएको भन्दै आलोचना गरेका छन् ।

लगानीकर्ताहरूले फेसबुकमाथि हुन लागोको जरिवानालाई सकारात्मक रूपमा लिएका समाचार संस्था रोयटर्सले जनाएको छ । समाचार सार्वजनिक भएसँगै फेसबुकको सेयर १.८ प्रतिशतले बढेको छ । जरिवाना रकम फेसबुकले अनुमान गरे बराबरकै भएको जनाइएको छ । फेसबुकले उक्त मुद्दामा ठूलो जरिवाना हुन सक्ने भन्दै गत अप्रिलमा आफ्ना सेयरधनीसँग रकम छुट्टाएर राखेको थियो । उक्त रकम फेसबुकको वार्षिक नाफाको एक चौथाइभन्दा कम हो ।

परामर्शदाता कम्पनीले राजनीतिक स्वार्थपूर्ति गर्न गलत तरिकाले फेसबुक प्रयोगकर्ताको सूचना लिएको आरोप लगाइएको छ । क्याम्ब्रिज एनालिटिकाले फेसबुक प्रयोगकर्ताका ती तथ्यांक अमेरिकी राष्ट्रपतीय चुनावको नतिजा डोनाल्ड ट्रम्पको पक्षमा पार्न प्रयोग गरेको जनाइएको छ ।

कम्पनीले फेसबुक प्रयोगकर्ता र उनीहरूका साथीहरूबाट एक प्रश्नोत्तर एपका माध्यमबाट तथ्यांक संकलन गरेको थियो । उक्त मुद्दामा बेलायतको नियामक निकायले पनि फेसबुकमाथि ५ लाख पाउन्ड जरिवाना गरिसकेको छ ।

प्रकाशित : असार २८, २०७६ २१:२३
ADVERTISEMENT
प्रतिक्रिया
पठाउनुहोस्
ADVERTISEMENT

डोल्पामा बाढीले १ को मृत्यु, ९ बेपत्ता

कलेन्द्र सेजुवाल

सुर्खेत — डोल्पाको मुड्केच्युला गाउँपालिकाको काशिलखोलामा आएको बाढीले बगाएर एकको मृत्यु भएको छ । कम्तीमा ९ जना बेपत्ता भएको प्रहरीले जनाएको छ ।

कर्णाली प्रदेश प्रहरी कार्यालयका अनुसार दिउँसो करिब १ः३० बजेतिर आएको बाढीले खोला नजिकका तीनवटा घर, केही घट्टसहित व्यक्ति बगाएको हो ।

डीआईजी पूर्णचन्द्र जोशीले स्थानीय धर्मराज बोहोराको मृत्यु भएको र कम्तीमा ९ जना बेपत्ता भएका बताए ।‘घटनास्थलमा टेलिफोन सम्पर्क हुँदैन, के कति क्षति भएको छ पूर्ण विवरण आएको छैन,’ उनले भने, ‘प्रहरी, सशस्त्र प्रहरी घटनास्थलतिर गएर उद्धारको काम थालिसकेको छ ।’

प्रकाशित : असार २८, २०७६ २१:२०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT