मलेसियाका गैरकानुनी आप्रवासी कामदारलाई आममाफी 

कान्तिपुर संवाददाता

(मलेसिया) — मलेसियाले गैरकानुनी आप्रवासी कामदारलाई आममाफी दिई स्वदेश फर्कन दिने घोषणा गरेको छ । 

गृहमन्त्री मुहिद्दिन यासिनले बिहीबार पुत्राजयास्थित अध्यागमन विभागमा पत्रकार सम्मेलन गर्दै आगामी अगस्ट १ देखि डिसेम्बर अन्त्यसम्मको ५ महिने आममाफी कार्यक्रम घोषाणा गरे ।

यासिनले ‘प्रोग्राम ब्याक फर गुड’ नाम दिइएको आममाफीको उपयोग गर्दै गैरकानुनी आप्रवासी कामदार स्वदेश फर्कन पाउने बताए । त्यसका लागि उनीहरूले अध्यागमन विभागका कार्यालयमा ७ सय रिंगिट शुल्क तिर्नुपर्ने छ ।

घर फर्कन चाहने गैरकानुनी कामदार सम्बन्धित देशका दूतावासबाट यात्रा अनुमतिपत्र लिएर अध्यागमन विभाग कार्यालयमा उपस्थित हुनुपर्ने छ । त्यसरी विभाग पुग्ने कामदारलाई अध्यागमन अधिकारीले बायोमेट्रिकलगायत विवरण संकलन गरी अध्यागमन सिस्टममा सूचीकृत गरी मलेसियाबाट बाहिरिने पास पाउने छन् । पास पाउने कामदारले एक साताभित्र हवाई टिकटको व्यवस्था मिलाई स्वदेश फर्कनुपर्ने यासिनले बताए ।

कार्यक्रमलाई प्रभावकारी बनाउन पश्चिमी मलेसियाका ८० अध्यागमन काउन्टर र २ सय कर्मचारी खटाइएको स्थानीय सञ्चारमाध्यमले जनाएका छन् । कार्यक्रममार्फत स्वदेश फर्कने कामदारलाई अध्यागमन विभागले कालोसूचीमा राख्ने कारण उनीहरू पुनः मलेसिया प्रवेश गर्न पाउने छैनन् ।

तत्कालका लागि यो कार्यक्रम पश्चिमी मलेसियामा कार्यान्वयनमा ल्याइएको हो । मलेसियामा रहेका करिब ४ लाख नेपालीमध्ये हजारौं गैरकानुनी अवस्थामा बसिरहेका अनुमान छ । त्यस्ता नेपाली यस्ता कार्यक्रमबाट देश फर्केको खण्डमा सजायबाट जोगिने छन् । करिब २० लाख विदेशी कामदार रहेको मलेसियामा ठूलो संख्यामा गैरकानुनी छन् । गृहमन्त्री यासिनले प्रोग्राम ब्याक फर गुड कार्यक्रमको म्याद सकिएपछि गैरकानुनी कामदारविरुद्ध देशव्यापी कारबाही अभियान सञ्चालन गरिने जनाए ।

यसअघि सरकारले सञ्चालन गरेको (थ्री प्लस वान भोलुन्टर्ली प्रोग्राम) नामक आममाफी कार्यक्रममा भने न्यूनतम ४ सय रिंगिट जरिवाना तोकिएको थियो । तर गैरकानुनी रूपमा मलेसियामा रहेको अवधिका आधारमा जरिवाना रकम तोकिएका कारण कतिपयले ३ हजार १ सय रिंगिटसम्म तिरेका थिए । उक्त कार्यक्रमको फाइदा उठाउँदै धेरै नेपाली स्वदेश फर्किसकेका छन् ।

मलेसियाको सरकारी तथ्यांकअनुसार सन् २०१४ देखि गतवर्षको अगस्टसम्म सञ्चालन गरिएको उक्त आममाफी कार्यक्रममार्फत ८ लाख ४० हजार गैरकानुनी आप्रवासी कामदार स्वदेश फर्केका थिए । त्यसरी स्वेदश फर्कने कामदारबाट मलेसियाले जरिवाना स्वरूप ४ सय मिलियन रिंगिट संकलन गरेको जनाइएको छ ।




प्रकाशित : श्रावण २, २०७६ २१:१४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

धनगढीको एक होटलमा विस्फोट, ५ जना घाइते

अर्जुन शाह

धनगढी — धनगढीको सहिद गेटनजिक रहेको निलम होटलमा बिहीबार साँझ विस्फोटन भएको छ । विस्फोटमा ५ जना घाइते भएका छन् । 

जिल्ला प्रहरी कार्यालयका डिएसपी दक्षकुमार बस्नेतकाअनुसार घाइते हुनेमा होटल सञ्चालक केशवराज पाण्डे, बझाङ घर भएका रामबहादुर सिंह जितेन्द्र यादव, मोविन खान र लक्ष्मण सेरेला रहेका छन् । यादव, खान र सेरेलाको ठेगाना खुलेको छैन ।

घाइतेहरुको मायामेट्रो अस्पतालमा उपचार भइरहेको छ । प्रहरीकाअनुसार उनीहरु सख्त घाइते छन् । विस्फोटन भएको वस्तुबारे एकिन भइसकेको छैन ।
घटनास्थलमा एउटा ९ एमएमको चाइनिज पेस्तोल फेला परेको प्रहरी उपरीक्षक सुदीप गिरीले बताए । ‘विस्फोटन गराइएको वस्तु स्टीलको टिफिन कन्टेनर हो’, उनले भने, ‘जुन धेरै घातक हुन्छ ।’उनले घटनाको थप अनुसन्धान भइरहेको बताए ।

प्रकाशित : श्रावण २, २०७६ २०:५८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT