रुस–युक्रेन युद्धमा फसेका नेपाली

रुसी सेनामा भर्ती भएका नेपालीको तथ्यांक प्रकाशन गर्नुपर्ने माग पनि उनीहरूले राखेका छन् । आफन्तलाई रुसी सेनामा पठाउने बिचौलियाको पहिचान गरी तत्काल कारबाही गर्नुपर्ने, रुसबाट फर्केर आएकालाई पुनःस्थापना जस्ता विषय पनि उनीहरूले अघि सारेका छन् ।

रुसी सेनामा भर्ती हुन गएका नेपालीका विषयका सरकार गम्भीर नभएकाले अनशन बस्नुपरेको अनशनकारीको तर्क छ । रुसी सेनामा भर्ती हुन गएका नेपालीमध्ये कम्तीमा सय जना परिवारको सम्पर्कमा नभएकामा तथा रुस–युक्रेन युद्धमा ३६ जनाको मृत्यु भइसकेको भए पनि शवसमेत नेपाल ल्याउन नसकिएकामा उनीहरू आक्रोशित छन् । तर यो विषय नेपाल सरकारमा मात्र निर्भर देखिँदैन ।

रुसी सेनामा नेपाली युवा भर्ती भएको जानकारी पाउनासाथ सरकारले कूटनीतिक पहल गरेको समाचार आएको पनि थियो । ती युवा नेपाल सरकारले पठाएर वा सरकारलाई जानकारी दिएर गएका होइनन् ।

बिचौलियाको प्रभावमा परेर बढी कमाउने प्रलोभनका कारण रुसी सेनामा भर्ती भएका हुन् तर सरकारले यसो भन्दैमा समस्यामा परेका आफ्ना नागरिकका विषयमा पन्छन मिल्दैन, उद्धारका लागि थप प्रभावकारी कूटनीतिक कदम चाल्नुपर्छ ।
– गंगाराज अर्याल, पाणिनि–८, अर्घाखाँची