मौद्रिक नीतिले नेप्से बढायो

यो वृद्धिसहित नेप्से १ हजार १ सय २४.९६ विन्दुमा उक्लेको छ । सोमबार नेप्से परिसूचक करिब तीन वर्षयताकै न्यून विन्दुमा ओर्लेको थियो ।

राष्ट्र बैंकले मौद्रिक नीतिमार्फत ब्याजदर घट्ने खालको नीति ल्याएसँगै सेयर बजारमा सकारात्मक प्रभाव देखिएको छ । राष्ट्र बैंकले सोमबार जारी गरेको चालु आर्थिक वर्षको मौद्रिक नीतिको अर्धवार्षिक समीक्षामार्फत ब्याजदर कम गर्न विभिन्न कदम चालेको छ ।

नयाँ व्यवस्थापछि बैंक तथा वित्तीय संस्थाले ब्याजदर घटाउने सम्भावना बलियो बन्दै गएको छ । ब्याजदर सस्तिने र सस्तो ब्याजदरमा ऋण पाइने अनुमानका आधारमा लगानीकर्ताको आत्मविश्वास बढेकाले बजारमा सकारात्मक प्रभाव परेको ब्रोकरहरूले जनाएका छन् ।

मंगलबार कारोबारमा आएकामध्ये सबै कम्पनीको परिसूचक बढेपछि समग्र नेप्से दोहोरो अंकले उकालो लागेको हो । करिब चार सातापछि मंगलबार नेप्से दोहोरो अंकले बढेको हो । यसअघि माघ १ गते नेप्से साढे १७ अंकले बढेको थियो ।

परिसूचक बढे पनि कारोबार रकममा कमी आएको छ । करिब साढे ५ हजार कारोबारबाट १ सय ६७ कम्पनीका २१ करोड ४५ लाख रुपैयाँ बराबरको सेयर किनबेच भयो । सोमबार २३ करोड ४५ लाख रुपैयाँ बराबरको सेयर कारोबार भएको थियो । उक्त दिन कारोबारका रहेकामध्ये १ सय २९ कम्पनीको सेयर मूल्य बढयो, २१ कम्पनीको सेयर मूल्य घटयो र बाँकी १७ कम्पनीको सेयर मूल्य स्थिर छ ।

दिनभरको कारोबारमा जीवन बिमा समूहको परिसूचक सबैभन्दा बढी ४.५७ प्रतिशतले बढयो । यस्तै लघुवित्त, अन्य, जलविद्युत् र जीवन बिमा समूहको परिसूचक २ प्रतिशतभन्दा बढीले उकालो लागे । बाँकी समूहमध्ये उत्पादन तथा प्रशोधनबाहेक सबै समूहको परिसूचक १ प्रतिशतभन्दा बढीले बढेको नेप्सेले जनाएको छ । उक्त दिन वित्त कम्पनीको परिसूचक स्थिर रहयो ।