गुजरातमा लगानी सम्मेलनको प्रचार

कान्तिपुर संवाददाता

नयाँदिल्ली — नेपाली उच्च अधिकारीहरूले भारतीय प्रधानमन्त्री नरेन्द्र मोदीको गृह राज्य गुजरातका उद्यमी तथा व्यवसायीलाई नेपालमा लगानी गर्न आग्रह गरेका छन् । बिहीबार गुजरातको अहमदाबादमा आयोजित ‘नेपालमा व्यापार, पर्यटन तथा लगानीका सम्भावना’ विषयक गोष्ठीमा आग्रह गरिएको हो ।

बिहीबार गुजरातको अहमदाबादमा आयोजित ॅनेपालमा व्यापार, पर्यटन तथा लगानीका सम्भावना’ विषयक गोष्ठीमा नेपाल र भारतका सहभागीहरू ।

भारतको राजधानी नयाँदिल्लीस्थित नेपाली दूतावास र गुजरात चेम्बर अफ कमर्स एन्ड इन्डस्ट्रिज (जीसीसीआई) को साझेदारीमा भएको गोष्ठीमा नेपाली उच्च अधिकारीहरूले भारतीय व्यवसायी तथा लगानीकर्तालाई लगानीका लागि आग्रह गरेका हुन् । गुजरातका सम्भावित लगानीकर्तालाई नेपालको लगानीमैत्री वातावरण, लगानीकर्ताका लागि एकद्वार प्रणाली र वैदेशिक लगानीका सम्बन्धमा पछिल्लो समय गरिएका कानुनी तथा प्रशासनिक सुधार तथा संशोधनबारे जानकारी गराइएको दूतावासका इकोनोमिक मिनिस्टर कृष्णहरि पुष्करले जानकारी गराए ।

Citizen


कार्यक्रमको सुरुमा आसन्न लगानी सम्मेलन र नेपाल भ्रमण वर्ष २०२० सँग सम्बन्धित प्रस्तुति गरिएको थियो । दूतावासका इकोनोमिक मिनिस्टर कृष्णहरि पुष्करले लगानी सम्मेलनबारे विस्तृत जानकारी गराउँदै नेपालमा लगानी, व्यापार र पर्यटनका सम्भावनाहरूबारे चर्चा गरे । उनले भारतीय लगानीकर्तालाई नेपाली उत्पादन तथा वस्तुहरूले क्षेत्रीय तथा अन्तर्राष्ट्रिय बजारमा पाइरहेको सुविधाहरूबारे पनि जानकारी गराएको दूतावासले जनाएको छ । उनले रामायण सर्किट, बुद्ध सर्किट र हिन्दु सर्किटबारे जानकारी दिँदै भारतीय पर्यटकहरूलाई आफ्नो छिमेकी नेपालको भ्रमणबिना विश्वको चिन्न नसकिने जिकिरसमेत गरेका थिए ।

कार्यक्रलाई सम्बोधन गर्दै जीसीसीआईका पर्यटन समितिका सभापति प्रकाश शाहले पर्यटन क्षेत्रको प्रवर्द्धनका लागि नेपाल र गुजरातबीच साझेदारीको आवश्यकता औंल्याए । सीजीसीआईकै वैदेशिक व्यापार समितिका सभापति पदमन बुचले द्विपक्षीय व्यापार प्रवर्द्धनका लागि आपसी सहकार्यमा जोड दिएका थिए । उनले भारतीय लगानीकतालाई नेपालका पूर्वाधार, जलविद्युत्, पर्यटन र कृषिजस्ता क्षेत्रमा लगानीका लागि आग्रह गरे । साथै नेपाललाई अन्तर्राष्ट्रिय व्यापार प्रवर्द्धन र विविधीकरणका लागि गुजरातकै मुन्द्रा बन्दरगाह अनुकूल हुन सक्ने विश्वास पनि ऊनले व्यक्त गरे । कार्यत्रमका केही सहभागीहरूले तत्काल नेपाल र गुजरातबीच सिधा हवाई सम्पर्कको आश्वयकता औंल्याउँदै यसले पर्यटन मात्र नभएर व्यापार तथा लगानी प्रवर्द्धनमा सघाउन योगदान गर्ने बताए । नेपालमा लामो समयदेखि व्यापार व्यवसायमा संलग्न रहँदै आएका बुमाको फेब्रिकक्स प्रालिका प्रबन्ध निर्देशकले भरत छाजरले नेपालको सुरक्षा व्यवस्थाको प्रशंसा गर्दै नेपाल विश्वकै एक लगानीमैत्री मुलुक भएको समेत बताए । कार्यक्रममा गुजरातका प्रतिष्ठित व्यापारी तथा उद्योगीहरूका सँगै गुजरातमा व्यापार तथा व्यवसाय गर्दै आएका नेपाली व्यवसायीहरूको समेत उपस्थिति रहेको दिल्लीस्थित दूतावासले जनाएको छ ।

प्रकाशित : चैत्र १, २०७५ १०:०२
प्रतिक्रिया
पठाउनुहोस्

ओयो १५ सहरमा आउँदै

सजना बराल

(नयाँदिल्ली) — होटल सञ्जाल ‘ओयो रुम्स’ ले नेपालका १५ सहरमा विस्तार गर्ने भएको छ । काठमाडौं र पोखरामा सीमित ओयो होटल अबको दस महिनाभित्र अरू १५ सहरमा पुग्ने यसका संस्थापक रीतेश अग्रवालले बताए । हाल नेपालका पाँच सय वटा होटल आबद्ध रहेकामा अब एक हजार पुर्‍याउने लक्ष्य लिएको लोधी रोडस्थित इन्डिया हाबिटाट सेन्टरमा आयोजित कार्यक्रममा उनले बताए ।

नेपालका होटल उद्यमीहरू आकर्षक परियोजनासाथ आइरहेको उनले सुनाए । इन्टरनेट प्रयोगकर्ताको संख्या बढदो र ओयो एपमार्फत बुकिङ गर्नेहरू धेरै भएकाले अन्य सहरका होटलसँग सहकार्य गर्न चाहेको उनको भनाइ थियो । ‘ओयो होटल रोज्ने स्थानीय धेरै छन्,’ उनले भने, ‘हामी भारत र चीनमा पनि उपलब्ध भएकाले त्यहाँका मान्छे नेपाल जाँदा ओयोमै बस्ने सम्भावना पनि धेरै छ ।’ ओयो होटलका कोठाको मूल्य ९ सय ९९ रुपैयाँदेखि २ हजार रुपैयाँसम्म छ । हाल ४५ कर्मचारी नेपालमा छन् ।

भारत तथा दक्षिण एसियाका लागि ओयोका प्रमुख कार्यकारी अधिकृत आदित्य घोषले पनि नेपालको पर्यटन वृद्धि र उद्यमशीलता विकासमा आफूहरूले सघाउन चाहेको उल्लेख गरे । ‘नेपालका होटल सञ्चालकसँग अद्भुत आइडिया छ,’ उनले भने, ‘तिनलाई आफूकहाँ कसरी ग्राहक भित्र्याउने र रिझाउने भन्नेबारे राम्रो ज्ञान छ । हामीले त्यहाँको प्राविधिक दक्षता बढाउन, तालिम दिन र सञ्जाल बढाउनमा मात्रै जोड दिए पुग्छ ।’

नेपालमा सन् २०१७ बाट सञ्चालन सुरु गरेको ओयोले काठमाडौं र पोखराका एक सयभन्दा बढी होटलका १ हजार ८ सय कोठामा सेवा दिइरहेको छ । ‘नेपाल हाम्रा लागि उपयुक्त बजार हो,’ घोषले भने, ‘आउँदो गर्मी महिनाभर १० हजार कोठा संख्या पुर्‍याउनेछौं ।’ उनले कुन कुन सहर भने टुंगो लागिनसकेको बताए । पहिलो पटक काठमाडौं जाँदा थुप्रै होटल खाली देखेको रीतेश सम्झन्छन् । सुन्दर स्थान भएर पनि राम्रो मर्मत (सम्भार नहुँदा ती छायाँमा परेको उनले ठाने । ओयोले यस्तै मध्यस्तरका होटलको पुनर्निर्माण, मर्मत अन्य सुधार गरेर आफ्नो मापदण्डमा ल्याउँछ । यसका प्रमुख विशेषतमा टीभी, सफा तन्ना, नि:शुल्क ब्रेकफास्ट, नि:शुल्क वाइफाई, टाइलेट्री किट आदि पर्छन् । ओयो एपमार्फत कोठा बुकिङ गर्न सकिन्छ ।

भारतमा १ हजार ४ सय करोड लगानी
ओयोले तीन सय दिनभित्र भारत र दक्षिण एसियामा १४ करोड भारु लगानी गर्ने घोषणा गरेको छ । ‘यो वर्षभित्र भारतका ६ सय ५० होटलका २० हजारभन्दा बढी कोठामा पुग्न चाहिरहेका छौं,’ ‘कलेक्सन ओ’ ब्रान्ड पनि सुरु गरेको पत्रकार सम्मेलनमा उनले भने, ‘भारतको ग्लोबल ब्रान्डका रूपमा विश्वका कुनाकुनामा देखिने अवसर छ हामीसँग छ ।’ भारतमा एक लाख रोजगारी सिर्जना गरेको रीतेशले बताए । सन् २०१३ मा एउटा होटलबाट सुरु गरिएको ओयो सञ्जाल अहिले विश्वको सातौं ठूलो होटल सञ्चालक सञ्जाल बनेको २५ वर्षे रीतेशले दाबी गरे । आफूहरू भारतको पहिलो र चीनमा चौथो ठूलो होटल ब्रान्ड रहेको उनको भनाइ थियो । यसको सञ्जाल जापान, इन्डोनेसिया, सिंगापुर, बेलायत, मलेसिया, फिलिपिन्स, श्रीलंकालगयात देशमा छ ।

प्रकाशित : चैत्र १, २०७५ १०:००
पूरा पढ्नुहोस्
प्रतिक्रिया
पठाउनुहोस्