भैरहवा सेजमा उत्पादन सुरु

कान्तिपुर संवाददाता

भैरहवा — भैरहवास्थित विशेष आर्थिक क्षेत्र (सेज)मा शक्ति मिनिरल्स प्रालिले व्यावसायिक उत्पादन थालेको छ । विदेश निर्यात उद्देश्यसहित सेजमा उत्पादन थाल्ने यो पहिलो उद्योग बनेको छ । 

उद्योग वाणिज्य तथा आपूर्तिमन्त्री मातृकाप्रसाद यादवले मंगलबार यसको उद्घाटन गरेका हुन् । उद्योगमा ४० करोड रुपैयाँ लगानी छ । दैनिक उत्पादन क्षमता १ हजार ५ सय टन रहेको छ । उद्योगले निर्यातका लागि विशेष आर्थिक क्षेत्र प्राधिकरणबाट सोमबार अनुमति पाएको थियो । उद्योगले स्वदेशी चुनढुंगा प्रशोधन गरेर लाइभ स्टोनको धूलो (फ्लाक्स) र डोलोमाइट उत्पादन गर्छ । डोलोमाइट र फ्लाक्सको प्रयोग ठूला स्टिल (फलामे छड) र फलाम उद्योगमा शुद्धीकरणमा प्रयोग हुन्छ । साथै रंग बनाउन प्रयोग गरिन्छ ।

‘अनुमति पाएपछि अब भारत निर्यात गर्ने प्रक्रियामा छौं,’ शक्ति मिनिरल्स प्रालिका अध्यक्ष विनोदकुमार श्रेष्ठले भने, ‘केही महिनाअघि परीक्षण उत्पादन गरेका थियौं । अब निर्यातका लागि उत्पादन थालेका छौं ।’ सिद्धार्थ उद्योग वाणिज्य संघबाट उत्पत्तिको प्रमाणपत्र जारी हुनासाथ निर्यात गरिने उनले बताए । पाल्पाको खानीबाट उद्योगमा कच्चा पदार्थ ल्याएर प्रशोधन गरिन्छ । वार्षिक एक अर्ब रुपैयाँ बराबर उत्पादन निर्यात गरिने उद्योगले जनायो ।

लाइभस्टोन र डोलामाइटको धूलो नेपालमा कुखुराका चल्लाको दाना, प्लास्टिकका बोरा उत्पादन, रंग, कंक्रिट ब्लकलगायतका उत्पादनमा आयात हुने गरेको श्रेष्ठले बताए । यसको कच्चा पदार्थको प्रतिटन तीन सय रुपैयाँ मूल्य पर्छ । प्रशोधन गरेपछि १ हजार ८ सयदेखि २ हजार ५ सय रुपैयाँ प्रतिटन मूल्य पर्ने उनले बताए ।

‘उद्योग वातावरण र जनतामैत्री हुनुपर्छ,’ मन्त्री यादवले भने, ‘निर्यातमुखी उद्योगलाई प्राथमिकता दिइनेछ ।’ ११ महिनाअघि स्थापना भएको उद्योगले संचालनको क्रममा सेज ऐन र आर्थिक ऐनबीच मेल नखाँदा समस्या झेल्नु परेको थियो । यहाँ स्थापना हुने उद्योगलाई विदेशबाट मेसिन तथा उपकरण ल्याउँदा पूर्ण भन्सार छुट दिने सेजको विनियमावलीमा उल्लेख व्यवस्था चालु आवको आर्थिक ऐनमा समावेश नहुँदा उद्योगले समस्या खेप्नु पर्‍यो । उद्योगले आयात गरेका १७ ट्रक औद्योगिक उपकरण धेरै दिन भैरहवा भन्सारमा थन्किएका थिए ।

विशेष आर्थिक क्षेत्र प्राधिकरणका कार्यकारी निर्देशक चण्डीकाप्रसाद भट्टले सरकारी निकायबीचको समन्वयमा कमी हँुदा सेज संचालनमा ढिलाइ भएको बताए । अर्थ र उद्योग मन्त्रालयबीच केही विषयमा एकरूपता नहुँदा लगानीकर्ताले समस्या भोग्नु परेको उनले बताए ।

प्रकाशित : जेष्ठ १, २०७६ ०७:५६
प्रतिक्रिया
पठाउनुहोस्

एएफसी कप : ‘मनाङ मर्स्याङ्दीलाई जित निर्विकल्प’

कान्तिपुर संवाददाता

काठमाडौँ — लिग च्याम्पियन मनाङ मर्स्याङ्दी क्लबका प्रशिक्षक छिरिङ लोप्साङले आफ्नो टोलीले एएफसी कप समूह चरण पार गर्न बाँकी तीनै खेलमा सुखद नतिजाका लागि प्रयास गर्ने बताएका छन् । 

त्यसका लागि मनाङलाई बुधबार घरेलु मैदानमा भारतीय टोली मिनर्वा पन्जाबविरुद्ध हुने खेल महत्त्वपूर्ण छ । एएफसी कपको दक्षिण एसियाली समूहमा रहेको मनाङले यसअघि ३ खेलबाट १ अंक बटुलेको छ । समूह विजेताले मात्र अर्को चरणमा स्थान बनाउने नियमअनुसार मनाङलाई बाँकी ३ खेल गर या मरको अवस्थामा छ ।

‘सुरुआती ३ खेलमा हामीले अपेक्षाअनुसार नतिजा ल्याउन सकेनौं, बाँकी तीन खेल शतप्रतिशत जितका लागि खेल्नेछौं, अर्को चरणमा जाने हो भने हामीले सबै खेल जित्नुपर्छ । मिनर्वाविरुद्धको खेल जित्न सके त्यसपछि दुई खेलमा राम्रो गर्ने प्रेरणा मिल्नेछ,’ प्रशिक्षक लोप्साङले मंगलबार पत्रकार सम्मेलनमा भने । मनाङले मिनर्वाविरुद्ध उसैको मैदान भुवनेश्वरस्थित कालिंगा रंगशालामा २-२ गोलको बराबरी खेलेको थियो । त्यसअघिका दुई खेलमा मनाङ पराजित भएको हो । घरेलु मैदानमा बंगलादेशको ढाका अवहानी लिमिटेडसँग १-० ले हारेको मनाङले चेन्नईयन एफसीसँग २-० को हार बेहोरेको थियो ।

‘मिनर्वाविरुद्ध राम्रो प्रदर्शन गरे पनि अवसर सदुपयोग गर्न नसक्दा हामीले अंक बाँडेका थियौं,’ प्रशिक्षक लोप्साङले भने, ‘यस खेलमा हामीले अघिल्ला खेलका कमजोरी सुधार गर्ने लक्ष्य लिएका छौं । त्यहीअनुसार रणनीति परिवर्तन गरी आक्रामक फर्मेसन तयार गरेका छौं, हामीलाई घरेलु दर्शकको पनि साथ रहनेछ ।’

कप्तान विराज महर्जनले ‘ए’ डिभिजन च्याम्पियनको शैली मनाङले एएफसी कपमा देखाउन नसकेको स्विकारे । ‘यसअघिका तीनै खेलमा हामी हाम्रै कमजोरीले पराजित हुनुपरेको सत्य हो । लामो समयदेखि एउटै सेट भए पनि इन्ज्युरीका कारण खेलाडी परिवर्तन गर्नुपर्‍यो । टिममै तालमेल नमिलेजस्तो देखियो,’ राष्ट्रिय टोलीका समेत कप्तान विराजले भने । उनले मिनर्वाविरुद्धको खेल जसरी पनि जित्नैपर्ने भएकाले टिमका खेलाडीबाट शतप्रतिशत योगदान हुने अपेक्षा गरे ।

मनाङको जस्तै योजना मिनर्वा पन्जाबको पनि छ । लिगमा तीन चरणका खेल सकिँदासम्म समूह विजेताका लागि सबैको ढोका खुला रहेकाले मनाङविरुद्ध ३ अंकका लागि खेल्ने पन्जाबका प्रशिक्षक सचिन बडाढेले बताए । उनले नेपाली लिग च्याम्पियनविरुद्धको खेल प्रतिस्पर्धात्मक र रोमाञ्चक हुने अपेक्षा गरे । ‘मनाङविरुद्ध उसकै मैदानमा हुन लागेको खेलप्रति हामी सकारात्मक छौं,’ उनले भने ।

पन्जाबका कप्तान ओमालाजा नुरेक करिमले पनि मनाङसँगको खेल जित्नुको विकल्प नरहेको बताए । ‘मनाङ नेपाली लिग च्याम्पियन हो, हामी भारतको । नतिजा जस्तो पनि आउन सक्छ । तर, हामी शतप्रतिशत जितका लागि खेल्नेछौं ।’

यस समूहमा पन्जाबले यसअघिका तीनै खेल बराबरी खेलेको थियो । समूहमा उसको ३ अंक छ । एएफसी कपको समूह ‘ई’ मा मनाङसँगै दक्षिण एसियाली टोली बंगलादेशको अवहानी, भारतका मिनर्वा र चेन्नईयन छन् । सबैले होम एन्ड अवेका आधारमा ६-६ खेल खेल्नेछन् । समूह विजेता टोली इन्टर जोन प्लेअफको सेमिफाइनलमा पुग्नेछ ।

प्रकाशित : जेष्ठ १, २०७६ ०७:५१
पूरा पढ्नुहोस्
प्रतिक्रिया
पठाउनुहोस्