सकिबको उत्कृष्ट इनिङ्स

एएफपी

टाउन्टन — बंगलादेशका अलराउन्डर सकिब अल हसनले वेस्ट इन्डिजविरुद्ध अविजित १ सय २४ रनको विजयी इनिङ्सलाई आफ्नो करिअरकै उत्कृष्ट क्षणको रूपमा परिभाषित गरेका छन् । सकिबको जादुयी प्रदर्शनका कारण बंगलादेशले विश्वकप इतिहासमै दोस्रो ठूलो रन पछ्याएर जित हासिल गरेको थियो । 

सकिबले ९९ बलमा १ सय २४ रनको अविजित इनिङ्स खेल्ने क्रममा लिट्टोन दाससँग सानदार साझेदारी गरे । पहिलो विश्वकप खेलिरहेका दासले पनि ६९ बलमा ९४ रन प्रहार गरे । यी दुईले चौथो विकेटमा गरेको १ सय ८९ रनको नटआउट साझेदारी पनि विश्वकपमा दोस्रो ठूलो हो । सकिबका लागि यो अविस्मरणीय दिन थियो, किनभने उनको उत्कृष्ट प्रदर्शनकै कारण टिमले सानदार जित पाएको थियो ।

‘निश्चित रूपमा यो मेरो करिअरकै उत्कृष्ट प्रदर्शन हो, किनभने जुन तरिकाले हामीले जवाफी ब्याटिङ गरी जित हासिल गर्‍यौं । जसरी मैले इनिङ्स अघि बढाएँ, त्यहाँ हतार थिएन । राम्रो बलमा शट खेल्नुपर्ने आवश्यकता नै परेन,’ सकिबले भने, ‘मलाई धैर्य राख्नु थियो । आफ्ना लागि खराब बल छाड्न मलाई पर्याप्त समय थियो । मैले यस्ता धेरै उत्कृष्ट प्रदर्शन गरेको छु । तर ठूलो स्कोरको जवाफी ब्याटिङमा यो मेरो करिअरकै उत्कृष्ट इनिङ्स रह्यो ।’

सन् २०११ को विश्वकपमा आयरल्यान्डले इंग्ल्यान्डले दिएको ३ सय २९ रनको लक्ष्य पूरा गरेको थियो । विश्वकपमा त्यो नै सबैभन्दा ठूलो रन चेज हो । वेस्ट इन्डिजले खडा गरेको ३२१–८ को योगफल पछ्याउने क्रममा आफूले कुनै पनि समयमा दबाब महसुस नगरेको सकिबले बताएका छन् । अन्तिममा उनले दाससँग मिलेर ८.३ ओभरअगावै लक्ष्य पूरा गरे ।

‘पहिलो इनिङ्सको समाप्तिपछि ड्रेसिङ रूममा कसैले पनि सोचेनन्, यो लक्ष्य कठिन थियो । सबै सहज थिए र रमाइलो गरिरहेका थिए,’ सकिबले सुनाए, ‘ड्रेसिङ रूमबाटै हामीले पर्याप्त आत्मविश्वासलिएका थियौं कि लक्ष्य पूरा गर्न सक्छौं । हाम्रा ओपनरहरूले जसरी ब्याटिङ सुरु गरे ड्रेसिङ रूममा कुरिरहेका ब्याट्सम्यानहरूमा सहजता र उर्जा थपियो ।’

इंग्ल्यान्डविरुद्ध पनि १ सय २१ रन बनाएका सकिबले जारी विश्वकपमा दोस्रो शतक बनाएका हुन् । वेस्ट इन्डिजविरुद्ध खेलेपछि उनी एकदिवसीय क्रिकेटमा ६ हजारभन्दा धेरै रन बनाउने दोस्रो बंगलादेशी क्रिकेटर बनेका छन् । उनकै नायकी प्रदर्शनले बंगलादेश विश्वकपको सेमिफाइनल पुग्ने सम्भावना जीवितै बनेको छ । सकिबले पनि त्यो स्वर्णिम पलको आशा गरेका छन् ।

प्रकाशित : असार ४, २०७६ ०९:०९

प्रतिक्रिया
पठाउनुहोस्

कठिन मोडमा दक्षिण अफ्रिका

एजेन्सी

बर्मिङघम — दक्षिण अफ्रिकाले जारी एकदिवसीय विश्वकपको आफ्नो पाँचौं खेलमा पहिलो जित निकाल्ने क्रममा अफगानिस्तानलाई ९ विकेटले पराजित गरेको थियो । बुधबार एजबास्टोन रंगशालामा दक्षिण अफ्रिकाका लागि न्युजिल्यान्ड निकै कठिन चुनौती हुन सक्नेछ ।

सन् २०१५ को विश्वकप सेमिफाइनलमा दक्षिण अफ्रिकामै जन्मिएका न्युजिल्यान्डका ग्रान्ड इलियटले अविश्वसनीय छक्का प्रहार गरी खेल जिताएपछि दक्षिण अफ्रिका घर फर्किएको थियो भने न्युजिल्यान्डले पहिलोपल्ट विश्वकप फाइनलमा स्थान बनाएको थियो । बुधबारको खेलमा न्युजिल्यान्ड तुलनात्मक रूपमा कम दबाबमा हुनेछ तर दक्षिण अफ्रिकाका लागि भने सेमिफाइनल प्रवेशको अभियानमा यो नतिजा निर्णायक बन्नेछ ।

ट्रेन्ट ब्रिजमा भारतविरुद्धको खेल वर्षाले रद्द हुनुअघि न्युजिल्यान्डले विश्वकपका सुरुआती तीनै खेल जितेको थियो । न्युजिल्यान्डका बलरहरूको प्रदर्शन अहिलेसम्म उत्कृष्ट देखिएको छ । जसले हरेक विपक्षीलाई कमसे कम स्कोरमा सीमित गरिदिएका छन् । फलस्वरुप ब्याट्सम्यानले खुलेर खेल्न पाएका छन् ।

मिचेल सान्टनरले निर्णायक इनिङ्स खेल्नुअघि बंगलादेशविरुद्ध न्युजिल्यान्डको मध्यक्रम असफल देखिएको थियो । सम्भवतः उनीहरूले दक्षिण अफ्रिकाको बलिङ आक्रमणविरुद्ध कठिन परीक्षा दिनुपर्नेछ ।

लगातार तीन हारपछि दक्षिण अफ्रिका अस्तव्यस्त देखिएको थियो । तर पछिल्लो खेलमा अफगानिस्तानलाई ९ विकेटले पराजित गर्दा उनीहरूले एउटा पूर्ण प्रदर्शन गरे । इमरान ताहिरले ४ विकेट लिएर खेल जिताउने प्रदर्शन गरे । ओपनिङ जोडीले गरेको शतकीय साझेदारी दक्षिण अफ्रिकाका लागि सबैभन्दा सकारात्मक पक्ष हो ।

उच्च लयमा देखिएका न्युजिल्यान्डका बलरहरूको सामना गर्नका लागि दक्षिण अफ्रिकाका शीर्ष ब्याट्सम्यानहरूले पुनः एकपल्ट निर्णायक प्रदर्शन गर्नुपर्ने आवश्यकता छ । ह्यामस्ट्रिङको चोटका कारण पछिल्लो ३ खेल गुमाएका लुंगी एनगिडी स्वस्थ्य भएका छन् । उनले सुरुआती ११ मा बेउरान हेन्डरिक्सलाई प्रतिस्थापन गर्ने सम्भावना छ ।

बुधबार एजबिस्टोनमा दिनको सुरुआतमा सामान्य वर्षा हुने र दिउँसो घाम लाग्ने पूर्वानुमान छ । यस मैदानमा यसअघिका चार खेल पहिले ब्याटिङ गर्ने टिमले जितेको छ ।

प्रकाशित : असार ४, २०७६ ०९:०८
पूरा पढ्नुहोस्
प्रतिक्रिया
पठाउनुहोस्