पाकिस्तानलाई जितको स्वाद

एएफपी

लन्डन — पाकिस्तानले आइतबार लर्डसमा ४९ रनको विजय हात पारेपछि दक्षिण अफ्रिका विश्वकप क्रिकेटको समूह चरणबाटै बाहिरिएको छ । पाकिस्तानको पनि नकआउट चरणमा पुग्ने झिनो आशा मात्र छ । 

३ सय ९ रनको लक्ष्य लिएर आएको दक्षिण अफ्रिकाले ९ विकेट गुमाई २ सय ५९ रन मात्र बनाउन सक्यो । सद्धाब खान र वाहव रियाजले ३–३ विकेट लिएपछि दक्षिण अफ्रिकी ब्याट्सम्यानले कुनै चुनौती तेर्स्याउन सकेनन् ।

दक्षिण अफ्रिकाको खेलमा गति देखिएको थिएन र टोलीले पहिलो १० ओभरमा केवल ३८ रनमात्र जोड्न सकेको थियो । २० ओभरमा टोली ९१–२को स्थितिमा पुगे पनि आवश्यक रन रेट उकालि लािगसकेको थियो ।
कप्तान फाफ डु प्लेसिसले ७९ बल खेली ५ चौकासहित ६३ रन बनाए । यस हारले डु प्लेसिस र प्रशिक्षक ओटिस गिब्सनको भविष्यलाई लिएर पनि प्रश्न उठेको छ ।

इंग्ल्यान्ड र वेल्समा जारी विश्वकपमा दक्षिण अफ्रिकाले ७ मध्येको ५ खेल हारिसकेको छ र राउन्ड रोबिनमा श्रीलंका तथा अस्ट्रेलियासँगको खेल खेल्नु अगाडि नै टोलीको घर फर्कने तय भएको छ । अफगानिस्तानसँगको विजय दक्षिण अफ्रिकालाई सान्त्वना मात्र भएको छ । दक्षिण अफ्रिका नकआउट चरण नपुगेको यो दोस्रो अवसर हो । पछिल्लो पटक २००३ मा आफैले विश्वकप आयोजना गर्दा पनि दक्षिण अफ्रिकाले यही हविगत बेहोर्नुपरेको थियो ।

पहिलो खेलमा इंग्ल्यान्डसँग पराजित दक्षिण अफ्रिकालाई त्यसपछि ३ सय २२ रन बनाए पनि बंगलादेशले स्तब्ध पारेको थियो । प्रमुख तीब्र बलर डेल स्टेयनले चोटका कारण प्रतियोगिता सुरु भए लगत्तै घर फर्किदा दक्षिण अफ्रिकालाई अर्को धक्का बेहार्नु परेको थियो । अझ प्रतियोगिताका दौरान पूर्व कप्तान एवंम ब्याट्सम्यान एबी डी भिलियर्सले संन्यास तोड्दै आफु पनि विश्वकप छनोटका लागि उपलब्ध भएको बताएर दक्षिण अफ्रिकी विश्वकप यात्रामा हंगामा ल्याइदिएका थिए ।

चीर प्रतिद्वन्द्वी भारतसँग घुँडा टेकेको पाकिस्तान पनि थोरै आशामा अगाडि बढिरहेको छ । पाकिस्तानको यो केवल दोस्रो विजय हो र टोलीले ३ खेल खेल्न बाँकी छ । ह्यारिस सोहेलले ५९ बलमा ८९ रन बनाउँदै पाकिस्तानलाई प्रतियोगितामा जीवितै रहन बल प्रदान गरे । ५९ बलको इनिङ्समा उनले ९ चौका र ३ छक्का प्रहार गरे । पाकिस्तान पहिलो खेलमा वेस्ट इन्डिजसँग पराजित भएपछि ३० वर्षे सोहेललाई टोलीमा राखिएको थिएन् ।

त्यस्तै बाबर आजमले ८० बलमा ६९ रन बनाए । ओपनरद्वय इमाम उल हक र फाखर जमानले समान ४४ रन बनाउदैं पहिलो विकेटमा १५ ओभर भित्र ८१ रन जोडेर पाकिस्तानलाई उत्कृष्ट सुरुआत दिलाएका थिए । दुबैलाई भेट्रान स्पिनर इमरान ताहिरले आउट गरे । सोहेल इनिङ्सको दोस्रो अन्तिम बलमा आउट भए ।

स्कोर कार्ड
पाकिस्तान
४९ रनले विजयी

पाकिस्तान
५० ओभर ३०८/७
ह्यारिस सोहेल–८९
बाबर आजम–६९
फाखर जमान–४४

लुङ्गी एनगिदी ३/६४
इमरान ताहिर २/४४


दक्षिण अफ्रिका
५० ओभर २५९/९
फाफ डु प्लेसिस–६३
क्विन्टन डी कक–४७
एन्डील फेहुलक्वायो–४६

वाहव रियाज ३/४६
सद्धाब खान ३/५०

प्रकाशित : असार ९, २०७६ ०८:११

प्रतिक्रिया
पठाउनुहोस्

जितको खोजीमा अफगानिस्तान

एजेन्सी

साउथह्याम्पटन — शनिबारमात्र अफगानिस्तानले विश्वकपकै प्रमुख दावेदारमध्ये एक भारतविरुद्ध जितनजिक पुगेर पराजय बेहोर्नुपरेको थियो । बंगलादेशविरुद्ध सोमबार हुने खेलमा अफगानिस्तानले विश्वकपमा आफ्नो पहिलो जितको अपेक्षा गर्नेछ । 

बंगलादेशको ब्याटिङ लाइनमा बढुवा भएर ३ नम्बरमा पुगेका सकिव अल हसन केन्द्रमा छन् । जो लगातार खेलमा उत्कृष्ट प्रदर्शनसहित विश्वकपकै प्रमुख आकर्षण बनिरहेका छन् ।

वेस्ट इन्डिजले दिएको ३ सय २२ रनको लक्ष्य ४१.३ ओभरमै पूरा गरेर सनसनी मच्चाएको बंगलादेशले त्यसलगत्तैको खेलमा अस्ट्रेलियाबाट ३ सय ८२ रनको लक्ष्य पायो । जहाँ उनीहरूले ३३३–८ को सानदार प्रदर्शन गरेका थिए ।

ब्याटिङमा उल्लेख्य सुधार आए पनि बंगलादेशको बलिङ समस्या उस्तै छ । किनभने उसले पछिल्ला ३ खेलमा ३ सय २० भन्दा अधिक योगफलको सामना गर्नुपरेको छ । बलियो अफगानी बलरहरूसामु खुलेर खेल्ने वातावरण सिर्जना गर्न बंगलादेशका बलरहरूले पनि आफ्नोस्तरोन्नति गर्नुपर्ने देखिन्छ ।

शनिबार भारतसँग ११ रनको साँघुरो हारपछि अफगानिस्तान सोमबार बंगलादेशविरुद्ध मैदानमा उत्रँदा आत्मविश्वास र प्रेरणाले भरिएको हुनेछ । साउथह्याम्पटनको कन्डिसनसँग परिचित अफगानी कप्तान गुल्बादिन नैबले बंगलादेशविरुद्ध आफ्ना स्पिनरहरूबाट पुनः एकपल्ट जादुयी प्रदर्शनको अपेक्षा गर्नेछन् ।

तर उसका ब्याट्सम्यानहरूले लामो समय क्रिजमा रहने धैर्यता भने अवश्य देखाउनुपर्नेछ । साउथह्याम्पटनको मौसम सोमबार पनि सुक्खा र केही गर्मी हुने अनुमान गरिएको छ । यस्तोमा स्पिनर प्रभावशाली हुनेछन् जस्तो भारत र अफगानिस्तानबीचको खेलमा भएको थियो ।

प्लेयर्स टु वाच

मोहम्मद नाबी (अफगानिस्तान)
भारतसँग जितनजिक पुगेर पनि पराजित भएको अफगानिस्तानका लागि अनुभवी खेलाडी तथा पूर्वकप्तान मोहम्मद नाबीले अलराउन्ड प्रदर्शन गरेका थिए । अन्तिम ओभरमा उनी आउट भएपछि अफगानिस्तानको हार निश्चित बनेको थियो । स्पिन बलिङ र मध्यक्रमको ब्याटिङमा उच्च लयमा देखिएका नाबीकै निर्णायक प्रदर्शनबाट अफगानिस्तानले विश्वकपमा पहिलो जितको अपेक्षा गर्न सक्छ ।


मुसफिकर रहिम (बंगलादेश)
विकेटकिपर ब्याट्सम्यान रहिमले अस्ट्रेलियाविरुद्धको पछिल्लो खेलमा अविजित शतक प्रहार गरेका थिए । बंगलादेशी ब्याटिङक्रममा सकिव अल हसनलाई राम्रो सहयोग गरिरहेका रहिमले स्टम्प पछाडि रहेर पनि आफ्नो भूमिका निभाइरहेका छन् । मध्यक्रममा अफगानी स्पिनरसामु डटेर खेल्न सक्ने रहिमको प्रदर्शन पुनः एकपल्ट निर्णायक हुन सक्छ ।

प्रकाशित : असार ९, २०७६ ०८:१०
पूरा पढ्नुहोस्
प्रतिक्रिया
पठाउनुहोस्