सगरमाथा आरोहण गर्ने ओमनी युवतीलाई सम्मान

ओमानमा कार्यरत प्रत्येक नेपालीले कम्तिमा दुईदेखि तीनजना ओमानी नागरिकलाई नेपाल भ्रमणको लागि आव्हान गर्न सुझाव
कान्तिपुर संवाददाता

काठमाडौँ — ओमनस्थित नेपाली दूतावासले सगरमाथा आरोहण गर्ने पहिलो ओमनी महिला नादिरा अल हार्थीलाई कदरपत्र दिई सम्मान गरेको छ ।

नादिराको सगरमाथा आरोहणले ‘नेपाल भ्रमण वर्ष २०२०’ लाई सफल बनाउन सहयोग पुर्‍याउने भन्दै दूतावासमा आयोजित कार्यक्रममा सम्मान गरिएको हो ।

‘पर्यटन प्रवर्द्धधनमा खाडी मुलुकमा रहेका नेपाली समुदायको भूमिका’ विषयक कार्यक्रमलाई सम्बोधन गर्दे प्रमुख अतिथि नादिराले दुई वर्षको लगातार मिहिनेतपछि विश्वको सर्वोच्च शिखरमा पाईला टेक्न सफल भएको बताइन् । उनले ओमानका पर्वतारोही विद्यार्थीका लागि शेर्पाहरूलाई प्रशिक्षकको रूपमा ओमान ल्याउन सकेको खण्डमा ठूलो सहकार्य हुनसक्ने सुझाव दिइन् ।

ओमनका लागि नेपाली राजदूत ढकालले नेपालको पर्यटन प्रवर्द्धनमा नेपाली समुदायको महत्वपूर्ण भूमिका रहने बताइन् ।

कार्यक्रममा नेपाली समुदायका प्रतिनिधिहरुले ओमानको सडक छेउमा होर्डिङ बोर्ड राख्न, सार्वजनिक यातायातमा विज्ञापन राख्न, ओमानी र अङ्ग्रेजी भाषामा लेखिएका ब्रोसर र पर्चाहरू वितरण गर्न सुझाव दिएका थिए ।

उनीहरुले मस्कट महोत्सव र ओमानका अन्य पर्यटन प्रवर्द्धधनका कार्यक्रममा सहभागी हुन, नेपाली पर्यटन सम्बन्धी लेखहरूका लागि ओमानी पत्रकारलाई नेपाल भ्रमण गराउन, ओमानका ट्राभल एजेन्सीहरूसाग सहकार्य गरि नेपाल टुर प्याकेज बनाउन, ओमानमा कार्यरत प्रत्येक नेपालीले कम्तिमा दुईदेखि तीनजना ओमानी नागरिकलाई नेपाल भ्रमणको लागि आहृवान गर्ने लगायतका सुझाव दिए ।

प्रकाशित : असार २४, २०७६ १९:२३
प्रतिक्रिया
पठाउनुहोस्

विधेयक सच्याउने नेकपाको प्रतिवद्धतापछि महासंघको आन्दोलन स्थगित 

कान्तिपुर संवाददाता

काठमाडौँ — सत्तारुढ दल नेकपाले मिडिया काउन्सिल विधेयकलाई सच्याउने प्रतिवद्धता व्यक्त गरेपछि उक्त विधेयक विरुद्ध आन्दोलनरत नेपाल पत्रकार महासंघले आन्दोलनलाई स्थगन गरेको छ । 

सञ्चार तथा सूचना प्रविधि मन्त्रालयले बैशाख २७ मा मिडिया काउन्सिल विधेयक राष्ट्रियसभामा दर्ता गराएको थियो । उक्त विधेयकका प्रावधानहरुले काउन्सिलको स्वायत्तता समाप्त हुने र प्रेस स्वतन्त्रतानै कुण्ठित हुने भन्दै महासंघ आन्दोलनरत थियो । नेकपा संसदीय दलका उपनेता सुवास नेम्वाङको अगुवाईमा पार्टीका अन्य नेताहरुसहित महासंघका पदाधिकारीहरुसँग तीन चरणमा वार्ता भएको थियो ।

विधेयक राष्ट्रियसभामा रहेकाले राष्ट्रियसभामा नेकपाका सचेतक खिमलाल भट्टराईले काउन्सिलको गठन, स्वायत्तता र जरीवाना गर्ने लगायतका प्रावधानप्रति महासंघले उठाएको सरोकारलाई संसदीय प्रक्रियाबाट सम्बोधन गरिने लिखित प्रतिवद्धता जनाएका छन् । संघीय संसदमा प्रस्तुत अन्य सञ्चार सम्बन्धी विधेयकहरु हकमा पनि संविधान र राष्ट्रिय आम सञ्चार नीति २०७३ को आधारमा महासंघ सहित अन्य सरोकारवालासंगको छलफलपछि निष्कर्षमा पुगिने प्रतिवद्धता समेत व्यक्त गरिएको छ । महासंघले संसदमा रहेको सूचना प्रविधि सम्बन्धी विधेयकका कतिपय प्रवाधानप्रति आपत्ति जनाउँदै आएको छ ।

नेता नेम्वाङले महासंघले सरोकार राखेकै कारण दर्ता भएरपनि विधेयकलाई ‘होल्ड’ मा राखिएको बताए । ‘बैशाख २७ गते विधेयक दर्ता भएयता त्यसलाई प्रक्रियामा लगिएको छैन, एक इन्च पनि बढाइएन,’ उनले भने ‘महासंघको सरोकारलाई सम्बोधन गर्ने गरी विधेयकलाई अगाडि बढाइने छ ।’ उनले सत्तारुढ दलकै सांसदहरुबाट संशोधन हालेर महासंघले उठाएका सरोकार सम्बोधन गरिने बताए ।

महासंघ अध्यक्ष गोविन्द आचार्यले प्रेस स्वतन्त्रताको पक्षमा आफूहरु अनवरत लडिरहेको भन्दै काउन्सिल विधेयका प्रावधानले त्यसलाई संकुचन गर्ने अवस्था आएपछि बिरोध गरिएको बताए । कानुन निर्माणको थलो संसदका सत्तापक्षका सांसदहरुबाट आएको प्रतिवद्धताले आफूहरुले उठाएको सरोकार सम्बोधन हुनेमा आशावादी रहेको उनले उल्लेख गरे ।

उनले सत्तारुढ दलका नेताहरु तथा संसदीय दलका तर्फबाट आएको प्रतिवद्धताप्रति विश्वास जनाउँदै तत्काललाई आन्दोलन स्थगन गरिएको बताए । महासचिव रमेश विष्ट मार्फत जारी विज्ञप्तीमा संसदीय दलको तर्फबाट आएको प्रतिवद्धतालाई स्वागत गरिएको छ । ‘कानुन निर्माण गर्ने थलो जननिर्वाचित संसदले महासंघका सबै सरोकारहरुलाई सम्बोधन गर्ने विश्वास व्यक्त गर्दछ,’ विज्ञप्तीमा भनिएको छ–‘यस सन्दर्भमा तेस्रो चरणको सडक संघर्षका बाँकी कार्यक्रमहरु स्थगित गरी छलफल, सम्वादजस्ता गतिविधि मार्फत दवाब सिर्जना गरिनेछ ।’

महासंघका पदाधिकारीसँग नेम्वाङकै कार्यकक्षमा भएको वार्तामा राष्ट्रियसभामा नेकपा नेता दिनानाथ शर्मा, सचेतक खिमलाल भट्टराई, पार्टी स्थायी समिति सदस्य प्रतिनिधिसभा सांसद योगेश भट्टराई लगायतका नेताहरु सहभागी थिए । छलफलको अन्त्यतिर पार्टी महासचिव विष्णु पौडेल समेत उपस्थित भएका थिए ।


प्रकाशित : असार २४, २०७६ १९:२०
पूरा पढ्नुहोस्
प्रतिक्रिया
पठाउनुहोस्