मन्दिर निर्माणका लागि ५० लाख संकलन

नारायण खड्का

अस्ट्रेलिया — अस्ट्रेलियामा नेपालीहरुको आफ्नै मन्दिर निर्माण गर्ने उद्देश्यले गरिएको सप्ताह महायज्ञबाट ६० हजार डलर (करिब ५० लाख रुपैयाँ) संकलन भएको छ । नेपाली हिन्दु सोसाईटी अस्ट्रेलियाको आयोजनामा भएको महापुराणमा सहभागिता जनाउन नेपालका जगतगुरु डा. कृष्णदास जी महाराज समेत अस्ट्रेलिया आएका थिए ।

एक सातासम्म चलेको महायज्ञबाट करिब ५० लाख नेपाली रुपैयाँ संकलन भएको कोषाध्यक्ष प्रकाश ढोडारीले जानकारी दिए ।

१० हजार बढी हिन्दु धर्मावलम्बीहरुले सहभागिता जनाएको महापुराणबाट संकलित रकमले मन्दिर निर्माण अघि बढ्ने उनले विश्वास व्यक्त गरे । महापुराणमा नेपालबाट आएका कृष्णदास जी महाराजले योग साधना सिकाएका थिए भने कुबेर सुवेदीले पुराण वाचन गरेका थिए ।

अस्ट्रेलियाको हिन्दु सोसाईटीले सिड्नीस्थित रिचमण्डको केराजुङ्गमा दुई वर्षअघि पहिलेदेखि मन्दिर निर्माण पहल सुरु गरेको हो । दानमा प्राप्त ८ हजार वर्गमिटर जग्गामा मन्दिर निर्माण प्रक्रिया सुरु गरेको भए पनि आर्थिक अभावका कारण काम अघि बढ्न सकेको छैन । सोही प्रक्रियालाई अघि बढाउने प्रयासस्वरुप महापुराण आयोजना गरिएको थियो ।

नेपाल बाहिर दोस्रो पशुपतिनाथ निर्माण गर्ने उद्देश्यका साथ सुरु गरिएको मन्दिर पगोडा शैलीको हुने बताइएको छ । मन्दिरमा पशुपतिनाथ स्थापना गर्नुका साथै बौद्ध स्तुपासमेत बनाइने योजनाका साथ कार्य अघि बढाइएको छ । यसैगरी मन्दिरमा शिव पाञ्चायन मन्दिरसमेत अलग निर्माण हुने उनीहरुले बताएका छन् ।

‘यो हिन्दुहरुको मन्दिर मात्र नभएर सम्पूर्ण नेपालीहरुको परम्परा र संस्कृतिलाई अस्ट्रेलियामा स्थापित गर्ने उद्देश्यका साथ काम सुरु गरिएको हो’ सोसाईटीकी अध्यक्ष प्रञ्चना शर्माले कान्तिपुरसँग भनिन् ।

प्रकाशित : श्रावण २, २०७६ १८:०८
प्रतिक्रिया
पठाउनुहोस्
ADVERTISEMENT

चन्द समूहलाई मन्त्री बाँस्कोटाले भने, ‘छक्का पञ्जा गर्ने भए वार्ता हुँदैन’ 

विमल खतिवडा

काठमाडौँ — सञ्चार तथा सूचना प्रविधिमन्त्री गोकुल बाँस्कोटाले नेत्रविक्रम चन्द समूहले छक्का पञ्जा गर्ने भए वार्ता नहुने बताएका छन् । ‘हामी वार्ता गर्न तयार छौँ, यो कुरा सरकारले धेरै पटक भनिसक्यो,’ सरकारका प्रवक्तासमेत रहेका मन्त्री बाँस्कोटाले भने,‘शक्ति सञ्चयका लागि वार्ता हुँदैन, पक्राउ परेका कार्यकर्ता छाड्नु पर्ने, मुद्दा फिर्ता लिनुपर्ने त्यसपछि उनीहरु वार्तामा आएनन् भने के गर्ने ? ।’ उनले छक्का पञ्जा गर्ने हिसाबले वार्ता नहुने स्पष्ट पारे । 

‘फ्याट्टै उहाँहरु हिंसा छाडियो, संविधान मानियो, प्रतिस्पर्धामा आइयो भन्नुहुन्छ भने एकै मिनेटमा वार्ता हुन्छ, सबै समस्या समाप्त हुन्छ,’ बाँस्कोटाले भने,‘त्यसमा केही पनि वैरभाव छैन, पहिला केही बिगारेको भएपनि भइगयो भन्न्न सकिन्छ, अन्यथा कसैको पछि मात्र लागेर हुँदैन, वार्तामा आउने भए हमेशा स्वागत छ।’ उनले सरकारले पटक/पटक वार्ताका लागि आग्रह गर्दै आएको बताए।

‘वार्ताका लागि हामी ठाउँ दिन्छौँ, छलफल गर्न तयार छौँ तर वार्ता केका लागि गर्नुपर्ने? पक्राउ परेका मान्छे छाडेर फेरि बन्दुक भिर्न हो भने वार्ता गर्न सकिदैन,’ उनले भने,‘ शान्तिपूर्ण राजनीतिक प्रक्रियामा अवतरण हुने सुनिश्चितता हुँदा सधैँ स्वागत गर्न तयार छौँ, अनौपचारिक वार्ता त चलिरहन्छ।’ उनले वार्ताको नाममा चन्द समूहले प्रचारको लिने गरेको आरोप लगाए।

‘उहाँहरुलाई वार्ताको आवश्यकता छ की/छैन, के महसुस गर्नु भएको छ?,’ उनले भने,‘वार्ता गर्ने निष्कर्षमा नपुग्ने, यसबाट प्रचारको लाभ लिने, आफ्नो क्षयीकरण भएको शक्तिको पुनर्ताजगी गर्ने, दुनियाँलाई भुलभुलैयामा पार्ने, निष्कर्ष बिना वार्ता गर्ने भन्ने कुरा हिंसालाई वैधता प्रदान गर्ने जस्तो कुरा हुन जान्छ।’

कमजोर धरातलमा उभिएर वार्ता–वार्ता भनेर मात्रै नहुने मन्त्री बाँस्कोटाले स्पष्ट पारे। ‘उहाँहरुको अनुचित गैरजिम्मेवार, असम्भव मागहरुको सम्बोधन हुँदैन,’उनले भने,‘तर उहाँहरु नितान्त सिके राउतको झै हामी शान्तिपूर्ण राजनीतिमा पार्टी दर्ता गरेर प्रतिस्पर्धा गर्ने उद्देश्यका साथ आए राष्ट्रिय अखण्डता, लोकतन्त्रको हकमा त प्रश्न उठ्दैन होला? ’

प्रकाशित : श्रावण २, २०७६ १७:४९
पूरा पढ्नुहोस्
प्रतिक्रिया
पठाउनुहोस्
ADVERTISEMENT