जन्मथलोमा युगकविको सम्झना
ओखलढुंगा — ‘क्रान्तिबिना शान्ति हुँदैन’ भन्ने लेख लेखेकै कारण युगकवि सिद्धिचरण श्रेष्ठ विसं. १९९७ मा जेल गए । राणा शासनको विरोधमा क्रान्ति चेतसहितका अनगिन्ती साहित्य रचे । तर उनको ‘ओखलढुंगा’ कविता सबैको मनमा गुन्जिरह्यो । उनले ओखलढुंगा कविता आफूले जन्मेहुर्केको थलो भएकै कारण लेखेका थिए ।
उनी जन्मिएको १०७ वर्षपछि बिहीबार फेरि उनको सम्झना जन्मभूमिमा गरियो । सिद्धिचरण नगरपालिका १२ मा उनको पूर्णकदको सालिक राष्ट्रपति विद्यादेवी भण्डारीले अनावरण गरिन् ।
सिद्धिचरण नगरपालिका र सिद्धिचरण प्रतिष्ठानको आयोजनामा कार्यक्रम गरिएको हो । यसअघि अर्धकदको मात्र सालिक थियो । हाल ६ फिट अग्लो सालिक राखिएको हो । कार्यक्रममा प्रतिष्ठानले बर्सेनि प्रदान गर्ने विभिन्न विधामा स्रष्टाहरू पुरस्कृत गरिए । युगकवि सिद्धिचरण साहित्य पुरस्कार साहित्यकार ध्रुवचन्द्र गौतमलाई प्रदान गरियो । गौतमले नगद एक लाखसहित कदर प्रदान गरियो ।
सुवर्ण शाक्यलाई ५० हजार नगदको सिद्धिचरण शताब्दी सम्मान प्रदान गरियो । त्यसैगरी पाँच दशक पत्रकारिता गरेका होमनाथ दाहाललाई नगद ४० हजार रुपैयाँ सहित सिद्धिचरण पत्रकारिता पुरस्कार प्रदान गरियो ।
प्रकाशित : जेष्ठ १०, २०७६ ०८:१५
