किड भर्सनमा छाउँदै

कान्तिपुर संवाददाता

काठमाडौँ — आठ वर्षकै उमेरमा मेलिना राईको ‘तिमीले बाटो फेर्‍यौ अरे...’ गीतको किड भर्सन गाएर युट्युबमा हिट भएकी थिइन् जिग्मे छ्योकी घिसिङ । त्यसपछि उनले लगातार ‘ठूलालाई आदर...’, ‘यो नाता...’, ‘हाम्रो यी साना आँखामा...’ लगायतका गीत गाइन् ।

युट्युब सर्च गर्दा यी बालगायिकाले रसुवा–धादिङतिर प्रचलित लोकभाका ‘म्हेन्दोमाया...’ गाएको पनि भेटिन्छ । यति बेला भने १२ वर्षीया यिनले फेरि मेलिनाकै स्वर रहेको ‘तिमीले बाटो फेर्‍यौ अरे–२’ को किड भर्सन गाएकी छन् । केही दिनअघि मात्रै युट्युबमा अपलोड गरिएको भिडियोसहितको गीतले सवा तीन लाख बढी भ्युअर्स पाइसकेको छ । उनको पुरानो गीतको भ्युअर्सचाहिँ झन्डै ६७ लाख पुगेको छ ।

गीत मन परेर फेरि किड भर्सन गाएको जिग्मेले बताइन् । दर्पण राईको रचना र विक्रम राईको संगीत रहेको गीतको प्रेमका सन्दर्भ समेटिएको छ । हाल ६ कक्षा अध्ययनरत जिग्मेले केही फिल्मसमेत खेलेकी छन् । संगीतकार चण्डीप्रसाद काफ्लेसित संगीत शिक्षा लिइरहेकी जिग्मेको पछिल्लो गीतलाई तारिफ १५ हजार जनाले लाइक गरेका छन् भने १ हजार ९१ जनाले युट्युबमा प्रतिक्रिया दिएका छन् ।

प्रकाशित : असार १९, २०७६ ०८:२६
प्रतिक्रिया
पठाउनुहोस्

विभेदविरुद्ध ‘थारूगिरी’

ठाकुरसिंह थारू

(बर्दिया) — व्यावसायिक रूपमा बनाइएका थारू फिल्मले लगानी उठाउन नसकिरहेका बेला केही युवा भने नयाँ फिल्म ‘थारूगिरी’ निमार्णमा जुटेका छन् । थारू समुदायविरुद्ध भएको विभेदको वकालत गर्ने बताइएको फिल्मको हालै पोस्टर सार्वजनिक गरिएको छ ।


यस्तो प्रकृतिको फिल्म नयाँ भने हैन । निलम्वित सांसद रेशम चौधरीले साठीको सुरुवाती दशकमै थारू समुदायमाथि भएको विभेद उजागर गर्दै फिल्म ‘कमैया’ रिलिज गरेका थिए । स्वदेशमै लगानी नउठेपछि उक्त फिल्म अंग्रेजी भाषामा बनाई विदेशमा पनि च्यारिटी गरिएको थियो ।

‘थारूगिरी’ को कथा भने बाँके कोहलपुरकै गायक विश्वसागर परियारले लेखेका हुन् । गाउँमा बस्ने थारूमाथि कसरी विभेदपूर्ण व्यवहार गरिन्छ भन्ने फिल्ममा देखाइएको उनले बताए । अति विभेद भएपछि सहन नसकेर सर्वसाधारणको नेतृत्व गर्दै बडघर (गाउँको अगुवा) स्वयंले गरेको विद्रोहसमेत फिल्ममा रहेको उनले बताए । ‘यसमा उत्पीडन छ । पीडा छ अनि विद्रोह छ,’
उनले भने ।

‘थारुगिरी’ को मुख्य अभिनेता–अभिनेत्रीमा सन्दीप बीसी र सुनिता चौधरी छन् । प्रवीन बस्नेत र समीर राईको पनि अभिनय रहेको निर्देशक केशव चालिसेले बताए । विवश थारूको गीत रहेको फिल्म आउने दसैंमा रिलिज हुने उनले बताए । तीन दशकदेखि आदिवासी थारू भाषामा व्यावसायिक फिल्म निर्माण हुन थालेको हो । २०४६ मा पहिलो पटक रामलाल र पर्शुराम चौधरीले ‘करम’ (भाग्य) नामक फिल्म बनाएका थिए । यो वर्ष मात्रै ‘भुरभुरा रहर’ र ‘लवा जुनी’ प्रदर्शनमा आएका थिए ।

प्रकाशित : असार १९, २०७६ ०८:२४
पूरा पढ्नुहोस्
प्रतिक्रिया
पठाउनुहोस्