रेखाको फिल्ममा रेनशा

कान्तिपुर संवाददाता

काठमाडौँ — महिला सशक्तिकरणका विषयमा फिल्म निर्माण गर्दै आएकी अभिनेत्री रेखा थापाले पछिल्लो पटक ‘मालिका’ निर्माण, निर्देशनसँगै अभिनय पनि गरेकी थिइन् । फिल्मले भने आशातित सफलता पाउन सकेको थिएन ।

यति बेला भने अभिनेत्री थापाले निर्देशनको बागडोर रेनशा वान्तवा राईलाई सुम्पिएर नयाँ फिल्म निर्माणको घोषणा गरेकी छन् ।

हरिशयनी एकादशीको दिन पारेर रेखाले रेनेशालाई निर्देशकका रूपमा अनुबन्ध गरेकी हुन् । मल्टिस्टारर फिल्म हुने बताइएको उक्त फिल्मको पटकथा लेखन कार्य अन्तिम चरणमा रहेको बताइएको छ ।

फिल्मको नाम र कलाकार भने सार्वजनिक गरिएको छैन । रेखा फिल्मस्कै ब्यानरबाट यसअघि ‘लाल मस्तिष्क’ निर्माणको घोषणा गर्दै सम्झना उप्रेती रौनियारलाई अनुबन्ध गरिएपनि रौनियारले छायांकनमा जानु अगावै उक्त फिल्म छोडेकी थिइन् भने ‘हिम्मतवाली’ मा पनि निर्देशक श्याम भट्टराईले असन्तुष्ट हुँदै छायांकनको बीचमै फिल्म छोडेपछि रेखा आफैँले निर्देशन गरेकी थिइन् ।

कोरियोग्राफरमा राम्रो छवि बनाएकी रेनेशाले भने फिल्म ‘इन्टु मिन्टु लन्डनमा’ बाट गतवर्ष निर्देशनमा डेब्यू गरेकी थिइन् भने दोस्रो प्रोजेक्टका रूपमा ‘आई एम ट्वान्टी वान’ निर्देशनको घोषणा गरेकी थिइन् । अब सम्भवतः रेनेशाले रेखाको फिल्म अगाडी गर्नेछिन् । उक्त फिल्मको छायाङ्कन मंसिरदेखि सुरु हुने बताइएको छ । फिल्मको पटकथा अभिमन्यु निरबीले लेखिरहेका छन् ।

प्रकाशित : असार २७, २०७६ २०:५९
प्रतिक्रिया
पठाउनुहोस्

‘सानो मन’ लाई प्रिमियरमा प्रशंसा

कान्तिपुर संवाददाता

काठमाडौँ — सार्वजनिक प्रदर्शनको पूर्वसन्ध्या पारेर बिहीबार सााझ राजधानीको कुमारी हलमा आयोजित फिल्म ‘सानो मन’ को प्रिमियरमा उपस्थितबाट प्रशंसा पाएको छ । झन्डै पाँच सय जनाको उपस्थिती रहेको प्रिमियरमा नेपाली फिल्म, संगीत क्षेत्रका प्रतिष्ठित व्यक्तिहरुको उपस्थिती थियो ।

प्रिमियरपछि पाएको प्रतिक्रियाले उत्साहित भएको उक्त फिल्मका निर्देशक सुयोग गुरुङ्गले बताए । निर्देशक गुरुङ्गले भने,‘फिल्म हेरेपछि पाएको प्रतिक्रियाले मलाई ‘नर्भस’ बनाएको छ । मेहनतको कदर भएको ठानेको छु । मैले राम्रै काम गरेको रहेछु की भन्ने महशुस भयो ।’

गुरुङ्गको डेब्यू निर्देशन रहेको फिल्ममा आयुष्मान देशराज जोशी र शिल्पा मास्के मुख्य भुमिकामा रहेका छन् । यसअघि ‘द ब्रेकअप’ र ‘कागजपत्र’ गरिसकेकी नायिका मास्केले ‘सानो मन’ मा अनपेक्षित रुपमा निर्देशकले राम्रो काम गरेको प्रीमियरमा आफ्नै फिल्म हेरेपछि बताइन् । भनिन्, ‘सुयोगबाट मैले यति अपेक्षा नै गरेको थिइन तर म फिल्म हेरेपछि नर्भस छु । यो सफलताको प्रमुख श्रेय निर्देशकलाई नै जान्छ ।’ नायक जोशीले पनि निर्देशकको कन्फिडेन्स हेर्दै नयाा भन्ने नलाग्ने प्रतिक्रिया दिए ।

‘म्यूजिकल लभ स्टोरी’ मा आधारित उक्त फिल्मले खासगरी युवाहरुको मनोविज्ञानलाई यथार्थपरक शैलीमा प्रस्तुत गरिएको छ । फिल्ममा आयुष्मान र शिल्पासहित सक्षम सुवेदी, गौरी मल्ल, विशाल पहारी, शिशिर वाङदेल, रश्मी भट्ट, देवकुमार श्रेष्ठ लगायतका कलाकारहरुको अभिनय रहेको छ ।

आलोक शुक्लाको छायांकन रहेको फिल्मलाई सुयोग गुरुङ र मिलन श्रेष्ठले सम्पादन गरेका हुन् । समिर सुनुवार र निर्देशक गुरुङको संयुक्त लेखन रहेको छ । योगेश गुरुङ, राजीव श्रेष्ठ, रमेश के मित्तल र राजेन्द्र मानन्धरको संयुक्त लगानी रहेको फिल्ममा रित बोहरा मुख्य सहायक निर्देशकका रुपमा रहेका छन् ।

प्रकाशित : असार २७, २०७६ २०:५०
पूरा पढ्नुहोस्
प्रतिक्रिया
पठाउनुहोस्