‘अठोट’ ले दिएको उत्प्रेरणा

कान्तिपुर संवाददाता

काठमाडौँ — बिदाको समय पढेर सदुपयोग गर्न सुझाउँदै योगेन यादवलाई शिक्षकले ‘अठोट’ पुस्तक दिए । बाह्य पुस्तक खासै नपढ्ने नेपाल प्रहरी आवासीय विद्यालयका योगेनले जब श्रीश भण्डारी लिखित उक्त पुस्तक पढ्न थाले, चाख लाग्दै गयो ।

शनिबार नेपाल प्रज्ञा प्रतिष्ठानमा भण्डारीको सोही पुस्तकबारे गरिएको अन्तक्र्रियामा योगेन पुस्तकप्रतिका आफ्ना धारणा साझा गर्दै थिए । उनले पुस्तकमा रहेको ‘खुशी’ खण्डले निकै उत्प्रेरणा दिएको दावी गरे ।

‘पहिले साथीहरूको प्रगति देख्दा आफू दु:खी हुन्थें’ योगेनले भने, ‘तर पुस्तकले आफ्नो खुसी आफैंमा खोज्नुपर्ने रहेछ भन्ने ज्ञान दियो । पहिले अरूको सुख देखेर त्यत्तिकै दु:खी पो हुँदो रै’छु ।’ कान्जिरोवा विद्यालयमा कक्षा ९ मा अध्ययनरत प्रेक्षा अधिकारीले चाहिँ ‘अठोट’ ले समयको महत्त्व बुझाउन मद्दत गरेको सुनाइन् ।

पुस्तकको ‘नभनौँ भोलि’ खण्डले आफ्नो रआफ्नो कामको महत्त्व बुझाएको उनले बताइन् । त्यसैगरी, अर्का विद्यार्थी पवन शर्माले मानिसमा आत्मविश्वास भयो भने, सफलताको शिखरमा पुग्न सकिने बताए । शर्माले कवाडीखानामा काम गर्ने गरिब बालक पछि गएर कसरी संसारकै प्रसिद्ध लेखक म्याक्सिम गोर्की बन्न पुगे भन्ने प्रसंगले उत्प्रेरणा दिएको बताए । उनले भने, ‘किताबै किन्न नसक्नेले किताब मागेर पढ्न सक्छ भने हामीसँग त किताब छन् । त्यसलाई उपयोग गर्न सक्नुपर्दाे रहेछ ।’

कार्यक्रममा विभिन्न विद्यालयका दर्जन बढी विद्यार्थीले उक्त पुस्तकबारे आफ्ना अनुभव साटेका थिए । पुस्तकबारे शिक्षाविद्, मनोविद्बीच अन्तरक्रिया पनि चलेको थियो । शिक्षाविद् प्रा. विद्यानाथ कोइरालाले अहिले बालबालिकालाई कुनै कुरा जबरजस्ती लाद्ने गर्दा सन्की हुने खतरा भएकोले हस्तक्षेप नगरी उनीहरूलाई नै सोचेर काम गर्न दिनुपर्छ भन्ने पक्ष पुस्तकले उठाएको बताए ।

बालबालिकाका लागि लेखिएको भए पनि ‘अठोट’ जुनसुकै उमेर समूहका पाठकका लागि उपयुक्त रहेको मनोवैज्ञानिक परामर्शदाता सनम पौडेलले बताइन् । पुस्तकमा रहेका सामाग्री मन छुने खालका भएको उनले दाबी गरिन् । बालसाहित्यकार कार्तिकेय घिमिरेले ‘अठोट’ मा विद्यार्थीलाई केन्द्रित गरेर सुहाउँदो विषयवस्तु समायोजन गरेको बताए ।

‘विदेशी राम्रा पुस्तक पढदा पनि विद्यार्थीहरूले त्यहाँको पात्र र परिवेश नबुझ्न सक्छन्,’ उनले भने, ‘तर लेखकले यहीँको पात्र र परिवेशमा रहेर पुस्तक लेखेकाले पाठकले विषयगत निकटता महसुस गर्न सक्छ ।’ पुस्तकलाई इन्टर्नल पब्लिकेसनले बजारमा ल्याएको हो ।

प्रकाशित : माघ २०, २०७५ ०८:१७
प्रतिक्रिया
पठाउनुहोस्
ADVERTISEMENT

पुस्तकमा लिम्बू दस्तावेज

कान्तिपुर संवाददाता

ललितपुर — लिम्बू जातिको ऐतिहासिक, पुरातात्त्विक विषयसहितको ‘समन्वेषण : नेपाली आदिवासी पहिचान’ नामक पुस्तक सार्वजनिक भएको छ । नेपाल प्रज्ञा प्रतिष्ठानको पूर्वकुलपति बैरागी काइँलाले शनिबार सार्वजनिक गरेका हुन् ।

इक्साहाङ इक्मिसो बेघा थोबोजुम संस्थाको १८औं वार्षिकोत्सवका अवसरमा उक्त पुस्तक प्रकाशन गरिएको हो ।

बेघा थोबोजुमले प्रकाशन गरेको पुस्तकको पहिलो खण्डमा सिरिजंगा हाङ र लिम्बू जातीय पुनरुत्थान, बेघावंशको इतिहास, माध्यमिककालको लिम्बू बिहेको दस्तुर, लिम्बूका पुरोहितहरू, लिम्बू भाषाको शिक्षाको इतिहास, लिम्बू महिलाहरूको स्थिति, ब्रिटिस सेनामा बहादुरीको तक्मा भिक्टोरिया क्रस (भीसी) प्राप्त रामबहादुर बेघा लिम्बूको परिचय समेटिएको छ ।

त्यसैगरी दोस्रो खडमा किराती भाषाहरूमा समानता र भिन्नता, लिम्बू स्रष्टाको नेपाली साहित्यमा योगदान, लिम्बू साहित्यको वर्तमान अवस्था, सिक्किमा लिम्बू साहित्य, भारतीय लिम्बूूको विवेचना, मुन्धुम संगीत, धाननाच, लिम्बू समुदायमा औषधोपचार रहेका छन् । लिम्बू समाजमा मर्चाको महिमा, लिम्बू जातिको तुम्मयाङ न्याय प्रणाली, विश्वभरिमा लिम्बू, लिम्बूवानका सम्पदाहरू, राष्ट्रिय विभूति फाल्गुनन्द र समाजसेवी कुमारहाङ बेघाको पनि चर्चा रहेका छन् ।

त्यसैगरी, बेघा थोबोजुमको प्रकाशन ‘इक्मिसो स्मारिका’ समेत सार्वजनिक गरिएको छ । काइँलाले लिम्बू जातिको इतिहास, भाषा, साहित्य, मुन्धुम संस्कृतिबारे स्वजातिले नै खोज्न सक्नु महत्त्वपूर्ण पक्ष रहेको बताए । संस्थाका अध्यक्ष प्रवीन बेघाले देशविदेशमा छरिएर रहेका वंशहरूबाट आर्थिक सहयोग जुटाएर पुस्तक र स्मारिका प्रकाशन गरिएको बताए ।

प्रकाशित : माघ २०, २०७५ ०८:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT