साहित्य–कला उत्सवले तरंग

श्यामसुन्दर शशि

जनकपुर — छदिने जनकपुर साहित्यकला एवं अन्तर्राष्ट्रिय नाटक उत्सव बिहीबार सम्पन्न भएको छ । समापन समारोहलार्ई सम्बोधन गर्दै प्रदेश २ का मुख्यमन्त्री लालबाबु राउतले उत्सवले समाजमा नयाँ तरंग ल्याएको बताए । उत्सवले मैथिली भाषा, साहित्य, कला, संस्कृतिसँगै सिंगै मधेसको संस्कृतिलाई विश्वव्यापी बनाएको उनको कथन थियो ।

महोत्सवको अन्तिम दिन बिहीबार राति पटनाको भंगिमा नामक संस्थाले प्रदर्शन गरेको काठक लोक नाटकको दृश्य । तस्बिर : कान्तिपुर

प्रदेश सरकार मैथिली भाषाको संरक्षण संवर्द्धन गर्न हरसम्भव लाग्ने उनले बताए । उनले प्रदेशमा सर्वाधिक बोल्ने मैथिली भाषा प्रदेशको कामकाजको भाषा बन्ने ठोकुवा गरे । तर मैथिली, भोजपुरी, बज्जिका लगायतका भाषासमेत रहेको यस प्रदेशमा सम्पर्क भाषाका रूपमा हिन्दीलाई राखिनुपर्ने उनको तर्क थियो ।

Citizen

‘म भोजपुरी क्षेत्रको हुँ तर अहिले मिथिला क्षेत्रमा सम्बोधन गर्नुपर्दा हिन्दीमा सम्बोधन गर्नुपरेको छ । प्रदेशभरि संवाद गर्न हिन्दीलाई सम्पर्क भाषा बनाउनुपर्छ,’ उनले भने ।

पूर्वाञ्चल विश्वविद्यालयका संस्थापक उपकुलपति एवं भाषावैज्ञानिक प्रा. रामावतार यादव उत्सवले मिथिला र मैथिलीलाई विश्वव्यापी बनाउन सफल भएको बताए । उनले भने, ‘उत्सवमा देशविदेशका साहित्यकार, पत्रकार, नाटककार निर्देशकको सहभागिता भयो । उनीहरूले यहाँको समाज बुझ्ने मौका पाए ।’

उत्सवमा कर्णाली, भारतको असम र पटना तथा अफगानिस्तानका समूहले नाटक प्रदर्शन गरेका थिए । यसअघि अन्तर्राष्ट्रिय मैथिली नाटक महोत्सवका क्रममा नेपाल र भारतका मैथिली नाटकहरू मात्र मञ्चन हुने गरेका थिए । यस महोत्सवमा पहिलो पटक मैथिलीका ४, हिन्दी, नेपाली र फारसी भाषाका १–१ गरी कुल सात नाटक प्रदर्शन भए ।

महोत्सवमा मिथिला पेन्टिङ, पेन्टिङ गरिएका टिसर्ट, भेस्ट, कुर्ता–पैजामा, झोला, सिकीको कलात्मक डाली–मौनी, मैथिली भाषाका लोकप्रिय पुस्तक एवं मुरही, कचरी, झिल्ली, बडी, बगिया, कोदोको रोटी–माछा, तिलकोरको तरुवाको स्वाद, मैथिली भाषा, साहित्य, कला, संस्कृतिका विभिन्न पक्षमाथि विचारोत्तेजक विमर्श अनि अपराह्न देशविदेशका नाटक र राति रंगारंग मैथिली सांस्कृतिक कार्यक्रम आयोजन गरिएको थियो ।

६ दिवसीय उत्सवमा मैथिली भाषा साहित्य संरक्षणमा चुनौती र निदान, प्रदेशको नामकरण र भाषा, मैथिली भाषामाथि जातीय विभाजनको प्रभाव, मैथिली फिल्मको सम्भावना, स्थानीय तहमा मातृभाषा शिक्षण, प्रदेशको सांस्कृतिक परिचय र मिथिला, केन्द्रीकृत मिडिया र मिथिला, महिला, युवा सशक्तीकरणलगायतका विषयमा बहस छलफल भएको थियो ।

प्रकाशित : फाल्गुन २५, २०७५ ०७:५०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

चिनियाँ राजदूतको नेपाली नाच

कान्तिपुर संवाददाता

काठमाडौँ — अन्तर्राष्ट्रिय महिला दिवसको उपलक्ष्यमा नेपालस्थित चिनियाँ दूतावासले शुक्रबार विभिन्न क्षेत्रका महिलासँग भेटघाट कार्यक्रम आयोजना गरेको थियो । सोही अवसरमा चिनियाँ राजदूत हो यान्कीले नेपाली गीतमा नाचेर सबैलाई दंग पारिन् ।

१०९ औं अन्तर्राष्ट्रिय महिला दिवसको अवसरमा शुक्रबार होटल याक एन्ड यतीमा नेपाली गीतमा नृत्य गर्दै नेपालका लागि चिनियाँ राजदूत हो यान्की (बीचमा) ।

‘मैले यहाँ आएको दुई महिनामै थुप्रै महिला साथी बनाएँ,’ यान्कीले भनिन्, ‘विशेषगरी राष्ट्रपति विद्यादेवी भण्डारी उत्कृष्ट लाग्यो ।’ महिलाको अधिकारलाई रक्षा गर्ने कुरालाई नेपालले महत्त्व दिएको भन्दै उनले यो सराहनीय भएको बताइन् । नेपाली महिलाको प्रतिभा र कामप्रतिको दृढतालाई आफूले आदर गर्ने उनको भनाइ थियो ।

समारोहमा उपस्थित महिला, बालबालिका तथा जेष्ठ नागरिक मन्त्री थममाया थापाले नेपाली महिला अझै पनि सामाजिक र आर्थिक रूपमा पछाडि रहेको बताइन् । चेलिबेटी बेचबिखन, महिला हिंसा, दाइजो र छाउपडी प्रथा, बालविवाहजस्ता कुरीति विद्यमान गरेको उनको भनाइ थियो । ‘संविधानको मर्मअनुसार महिलाको अधिकार प्राप्ति र हिंसा अन्त्यका लागि हामी पहल गर्दै छौं,’ उनले भनिन् ।

समारोहमा राजदूत यान्की र मन्त्री थापाले दुई देशका महिलाले एकअर्काबाट सिक्न बताए । थापाले नेपाल चीनसँग हातेमालो गर्न र शिक्षा आदनप्रदान गर्न चाहेको भनाइ राखिन् । ‘चिनियाँ रादूतावास अवश्य दुई मुलुकका महिलाको सहकार्यलाई समर्थन गर्नेछ,’ यान्कीले भनिन्, ‘हामी साथसाथै हिँडौं । दुई देशको विकास र मैत्रीपूर्ण सम्बन्धका लागि आफ्नो भूमिका निभाऔं ।’

काठमाडौंमा आयोजित कार्यक्रममा चिनियाँ कलाकारले मुरलीको धुन सुनाए भने चिनियाँ चिया र हस्तकला सामग्रीका स्टल अवलोकनका लागि राखिएका थिए । समारोहमा प्रधानमन्त्री पत्नीराधिका शाक्य, नेतृ पम्फा भुसाल र थुप्रै महिला सांसद, उद्योगी, कूटनीतिक क्षेत्रका महिलाको उपस्थिति थियो ।

प्रकाशित : फाल्गुन २५, २०७५ ०७:४८
पूरा पढ्नुहोस्
प्रतिक्रिया
पठाउनुहोस्
ADVERTISEMENT