रहेनन् भोजपुरी साहित्यकार मिश्र

कान्तिपुर संवाददाता

पर्सा — भोजपुरी भाषा तथा साहित्यका मूर्धन्य साहित्यकार पण्डित दीपनारायण मिश्रको निधन भएको छ । ८४ वर्षीय मिश्रको बिहीबार राति वीरगन्ज रेशमकोठीस्थित आफ्नै निवासमा निधन भएको पारिवारिक स्रोतले जनाएको छ ।

उनको अन्त्येष्टि शुक्रबार अशोक वाटिकामा गरिएको छ । मिश्रको निधनबाट नेपालको भोजपुरी भाषा र साहित्यको क्षेत्रमा अपूरणीय क्षति भएको साहित्यकारहरूले बताएका छन् ।

साहित्यकार अरुणविक्रमशाहले भोजपुरी साहित्यको 'भीष्मपितामह' को रूपमा अत्यन्त सम्मान र श्रद्धा गरिँदै आएका मिश्रको निधनले भोजपुरी भाषा र साहित्यको क्षेत्रमा ठूलो क्षति भएको बताए ।

अनवरत भोजपुरी भाषा साहित्यको साधनामा तल्लीन रहेका मिश्र पछिल्लो केही वर्ष शारीरिक रूपमा अशक्त थिए । उनलाई उच्च रक्तचाप, मधुमेह र मुटु रोगको समस्या थियो ।

उनले चार दशक लामो शिक्षण पेसाबाट ०४९ मा उनले अवकाश पाएका थिए । उनको कलम नेपाली, हिन्दी भाषामा पनि चलेको थियो । नेवारी संस्कृतिको बारेमा पनि उनले लेखेका थिए । कामेश्वर सिंह दरभंगा संस्कृत विश्वविद्यालयबाट उनले संस्कृतमा आचार्य गरेका थिए । उनको ९ वटा कृति प्रकाशित छन् । १० वटा कृति अप्रकाशित छन् ।

प्रकाशित कृतिहरूमा 'अजामिल' (भोजपुरी खण्डकाव्य), 'अजुरीके फुल' (राष्ट्रिय भोजपुरी कविता संग्रह), 'फूलझरी' -भोजपुरी सामाजिक कविता संग्रह),'उत्सर्ग' -हिन्दी कविता संग्रह), 'दोहा नीति सार' (नीतिसम्बन्धित दोहा संग्रह), 'असली नेता हम कहाई' -व्यंग्य कविता संग्रह), 'एघरीके धरनी' -व्यंग्य कविता संग्रह), 'ससुराली' (व्यंग्य कविता संग्रह) र 'करनी भरनी' (भोजपुरी कहानी संग्रह)रहेका छन् ।

प्रकाशित : वैशाख २१, २०७६ ०८:५२
ADVERTISEMENT
प्रतिक्रिया
पठाउनुहोस्

विराज अब निर्देशनमा

कान्तिपुर संवाददाता

काठमाडौँ — पछिल्लो समय भोजपुरीमा व्यस्त अभिनेता विराज भट्ट नेपाली फिल्म 'साङ्लो' को निर्माणसँगै निर्देशन गर्ने घोषणासहित देखिएका छन् । नेपाली दर्शकमाझ एक्सन हिरोको छवि बनाएका भट्टले यसै फिल्मबाट निर्देशनमा हात हाल्न लागेको बताए ।

पूर्व मिस नेपाल निकीता चाण्डकका साथ बिराज भट्ट

शुक्रबार राजधानीमा आयोजित एक कार्यक्रममा उक्त फिल्म वैशाख २४ देखि फ्लोरमा जाने बताइयो ।

फिल्ममा अभिनेता भट्ट नै मुख्य भूमिकामा हुनेछन् भने उनको समानान्तर भूमिकामा पूर्व मिस नेपाल निकिता चाण्डक हुने बताइएको छ । दुई करोड रुपैयाँको बजेटमा निर्माण दाबी गरिएको फिल्मलाई विराज भट्ट फिल्मको ब्यानरमा तेजबहादुर खड्काले निर्माण गर्न लागेका हुन् ।

फिल्ममा विराज र निकितासहित प्रकाश शाह, कामेश्वर चौरासिया, अमित गिरी, रमेश सोडारी, जयनन्द लामा, आरपी पन्त, भरत शाह, दुर्गा सुवेदीलगायत कलाकारको अभिनय रहने बताइएको छ । मानकृष्ण महर्जनले छायांकन रहने 'साङ्लो' को ५० दिनमा छायांकन सकिने निर्देशक भट्टले जनाए ।

सुरेश अधिकारी, राजनराज शिवाकोटी र विनोद खम्बुको संगीत रहने फिल्मलाई काठमाडौंसहित सुदूर पश्चिम डोटीको जोराइल, खप्तड र मुस्ताङमा खिचिने जनाइएको छ । फिल्मको पटकथा शिवम् अधिकारीले लेखेका हुन् भने कविराज गहतराज र रामजी लामिछानेको कोरियोग्राफी तथा श्री श्रेष्ठको द्वन्द्व निर्देशन रहनेछ ।

पहिलो निर्देशन भएकोले पनि फिल्मलाई उत्कृष्ट बनाउन आफूले कुनै कसर बाँकी नराख्ने भट्टले बताए । एक्सन लभस्टोरी जनरामा बनाउन लागेको 'साङ्लो' लाई भोजपुरी र हिन्दी भाषामा समेत डबिङ गरी रिलिज गरिने उनले बताए । चाण्डकको पनि 'साङ्लो' डेब्यु फिल्म हुनेछ । उनले फिल्मको स्क्रिप्ट पढेपछि फिल्म खेल्न राजी भएको बताइन् ।

प्रकाशित : वैशाख २१, २०७६ ०८:५१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT