किरात सभ्यताको नालीबेली

कान्तिपुर संवाददाता

काठमाडौँ — किरातहरूको मुन्धुम, संस्कार–संस्कृति, पूर्वीय मिथक तथा भाषा कस्ता छन् ? प्राग्ऐतिहासिक युगदेखि प्राचीन मन्त्र तथा तन्त्रकालीन समय हुँदै आधुनिक कालसम्ममा किरात जाति कहाँ पुगे ? कसरी जीविकोपार्जन गरे ? यी सबै केलाउने कोसिस गरेका छन् अनुसन्धाता जितमान राई ‘यालुङ’ ले । 

उनीद्वारा लिखित ‘किरात इतिहास तथा वंशावली’ पुस्तक उँभौली पर्वको अवसर पारेर राजधानीमा लोकार्पण गरियो । अनुसन्धाता राईले ‘किरात इतिहास तथा वंशावली’ पुस्तकमा त्रेतायुगको सुरुवातका कालखण्ड वा ककेसस, निग्रोइड र मंगोलाइड समय अनि सिन्धुघाँटी सभ्यता हुँदै भारतीय सभ्यता र किरातकालीन समयलाई चियाउने प्रयास गरेका छन् ।

अहिलेको मंगोल जातिले बोल्ने भाषा र लिपिले पूर्वज एउटै थिए भन्नेबारे पनि उनले तुलनात्मक अध्ययन गरेका छन् । तिनका विभिन्न शाखा–सन्तान फैलने क्रममा चाइनिज, जापानिज, मंगोलियन, कोरियन, बर्मिज, थाई, किरात आदि रूपमा विकसित भएको उनको दाबी छ ।

यालुङछा वंशावली प्रकाशन समिति, काठमाडौंले छापेको पुस्तकमा लेखक जितमानले किरातभित्र को–को पर्छन् ? जिउने क्रममा कुन–कुन बाटो हुँदै बसाइँसराइ गरे ? को कोसँग कहाँ युद्ध गर्नुपर्‍यो ? राई शब्द के हो ? कति पुरानो जस्ता प्रश्नको उत्तर दिएका छन् ।

प्रकाशित : जेष्ठ २०, २०७६ ०८:०२
ADVERTISEMENT
प्रतिक्रिया
पठाउनुहोस्
ADVERTISEMENT

प्रतिष्ठा ‘पब्लिसिटी क्विन’

कान्तिपुर संवाददाता

लन्डन — प्रतिष्ठा ‘तृष’ राउत बेलायतको एउटा प्रतिष्ठित सौन्दर्य प्रतिस्पर्धा ‘मिस इंग्ल्यान्ड’ को फाइनल प्रवेश गरेकी छन् । बेलायत अल्डरसट निवासी २६ वर्षीया प्रतिष्ठा शुक्रबार लेस्टर टाइगर स्टेडियममा भएको सेमिफाइनलबाट अन्तिम प्रतिस्पर्धाका लागि ४० मध्ये छानिएकी हुन् । उनी फोटो हिट चरण पार गरेर सेमिफाइनल पुगेकी थिइन् । 

प्रतिस्पर्धामा भाग लिन करिब २० हजारले आवेदन दिएका थिए । सेमिफाइनलमा इको ड्रेस राउन्ड, लिटल ब्ल्याक ड्रेस राउन्ड र ब्युटी विथ पर्पोज गरी ३ राउन्ड भएको थियो । पब्लिक भोटले उनलाई ‘पब्लिसिटी क्विन’ उपाधि दिलाएको छ । ‘सबैको भोटले उपाधि जितेकामा ज्यादै प्रसन्न छु,’ उनले भनिन्, ‘ती सहयोगी र प्रायोजकप्रति म कृतज्ञ छु ।’

प्रतिष्ठाले यस खालका प्रतियोगिताले महिलाको आत्मविश्वास अभिवृद्धिसाथै समुदायमा एक रोल मोडल भूमिका, च्यारिटी एवं महिला सशक्तीकरणमा लाग्न उत्प्रेरित गर्ने बताइन् । प्रतिष्ठाले यही सिलसिलामा एक च्यारिटीका लागि १४ सय पाउन्डसमेत संकलन गरेकी छन् र उठ्ने क्रम जारी छ । हङकङमा जन्मिएकी प्रतिष्ठा ५ वर्षको उमेरदेखि बेलायत बस्छिन् । भूपू ब्रिटिस गोर्खा प्रकाश राउत र मीना राउतकी एक्ली छोरी उनले १६ वर्षमै मोडलिङ थालेकी थिइन् ।

युनिभर्सिटी अफ ब्राइटनबाट इन्टेरियर आर्किटेक्चरमा ब्याचलर उत्तीर्ण प्रतिष्ठा पेसाले प्लोर प्लान आर्किटेक्ट हुन् । उनले गत वर्ष बेलायतको चर्चित फार्नबोरो एयर शोको फलोर प्लान गरेकी थिइन् । छिट्टै रेजिडेन्सियल हाउजिङ आर्किटेक्ट फर्म खोल्ने र मोडलिङ पनि एकसाथ अगाडि बढाउने सोच उनको छ ।

मिस इंग्ल्यान्ड विजेताले टाइटिलसहित २५ हजार पाउन्ड पुरस्कार, मिस वर्ल्डमा सहभागिता र विभिन्न च्यारिटी कार्यमा आबद्ध हुन मौका पाउने आयोजकले जनाएका छन् । अन्तिम प्रतिस्पर्धा समरमा हुने बताइए पनि विस्तृत विवरण आउन बाँकी छ ।

प्रकाशित : जेष्ठ २०, २०७६ ०८:०२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT