६ कविलाई पुरस्कार र पदक 

कान्तिपुर संवाददाता

काठमाडौँ — नेपाल प्रज्ञा प्रतिष्ठानद्वारा गत वर्ष आयोजित राष्ट्रिय कविता महोत्सवका विजेताहरुलाई मंगलबार राजधानीमा राष्ट्रपति विद्यादेवी भण्डारीले पुरस्कृत गरेकी छन् । महोत्सवमा प्रथम भएका कवि फूलमान वललाई राष्ट्रपति भण्डारीले स्वर्ण पदकसहित ३० हजार रुपैयाँ, दोस्रो हुने सुनिता खनाललाई कास्य पदकसहित २५ हजार रुपैयाँ र तृतीय हुने मेनुका चापागाईं र एलिना दुलाललाई जनही २० हजार रुपैयाँ रजत पदक हस्तान्तरण गरेकी हुन् । 

राष्ट्रपति कार्यालय शितल निवासमा आयोजित पुरस्कार वितरण समारोहमा २०७२ को महोत्सवमा पुरस्कार दिन बाँकी रहेका प्रथम प्रोल्लास सिन्धुलिया र द्वितीय सरस्वती दुमी राईलाई पनि राष्ट्रपति भण्डारीले पुरस्कार प्रदान गरिन् । समारोहमा भण्डारीले नेपाली साहित्य सिर्जनाले माटोको सुगन्ध प्रस्तुत गर्दै मुलुकको सामाजिक रुपान्तरणमा विशिष्ट योगदान दिँदै आएको बताइन् । प्रतिष्ठानका कुलपति गङ्गाप्रसाद उप्रेतीले कविलाई सिर्जनामा उत्प्रेरित गर्ने उद्देश्यले वि.सं २०२२ देखि नै कविता महोत्सव गरिँदै आएको बताए ।

सदस्य सचिव जगतप्रसाद उपाध्यायले आगामी दिनमा महोत्सवलाई अझ व्यवस्थित र देशव्यापी बनाउने बताए । काव्य विभागका प्रमुख हेमनाथ पौडेलले यस वर्षदेखि वाचनलाई पनि मूल्यांकनको आधार बनाइने जनाए ।

प्रकाशित : असार ३, २०७६ २१:४८
प्रतिक्रिया
पठाउनुहोस्

अनुशासन समितिको निर्णयप्रति आपत्ति

कान्तिपुर संवाददाता

काठमाडौँ — कांग्रेसको केन्द्रीय अनुशासन समितिले क्षेत्रधिकार बाहिर गएर निर्णय लिएको भन्दै समितिका सदस्य उमाकान्त चौधरीले आपत्ति जनाएका छन । 

समितिको मंगलबार बसेको बैठकले स्थानीय तह, प्रदेश र प्रतिनिधिसभाको निर्वाचनमा आधिकारिक उम्मेदवारविरुद्ध बागी बनेका उम्मेदवार, तीनका प्रस्तावक र समर्थकलाई कारवाही गरी पार्टीको अभिलेखबाट हटाउन जिल्लाहरुलाई निर्देशन दिने निर्णय लिएको थियो ।

पार्टी विधानको धारा ३४ को उपधारा ४ (क) अनुसार त्यस्ता व्यक्तिहरु स्वतः निलम्बनमा पर्ने उल्लेख छ । स्वतः निलम्बनमा परेपनि पार्टीमै रहिरहेकाले अभिलेखबाट उनीहरुको नाम हटाउन निर्देशन दिनुपरेको समितिका सदस्य धनराज गुरुङले बताए । ‘समितिले गरेको यो कुनै नयाँ कारवाहीको निर्णय होइन । विधानमा स्वतः भएको व्यवस्थालाई कार्यन्वयन गर्न निर्देशन मात्रै दिइएको हो,’ उनले भने ।

चौधरीले भने पार्टीद्धारा जारी कार्यदेश विपरित समितिले निर्णय गरेको बताएका छन् । पार्टीले समितिलाई सहमतिबाट मात्रै निर्णय लिन सक्ने कार्यदेश तोकेको छ । पाँच सदस्यीय समितिको मंगलबारको बैठकमा चौधरी र अर्का सदस्य किशोरसिंह राठोरको अनुपस्थित थियो । ‘विधानले स्वतः निलम्बनमा हुने कारवाहीको प्रावधानप्रति मेरो असहमति होइन तर, मेरो अनुपस्थिति भएको बेला समितिले लिएको निर्णय प्रक्रियाप्रति मेरो आपत्ति हो,’ चौधरीले भने,‘यसले गलत नजिर बसेको छ । निर्णय प्रक्रियाप्रति मेरो सहमति छैन ।’

प्रकाशित : असार ३, २०७६ २१:३२
पूरा पढ्नुहोस्
प्रतिक्रिया
पठाउनुहोस्